E Akaari i Toou Marekaanga
1 Noatu e te noo nei tatou i roto i “te au tuatau kikino tei ngata roa no te akono atu,” e manganui ta tatou au tumu no te marekaanga ia Iehova. (2 Timo. 3:1, NW) Te tumu maata roa i roto i teia koia oki ko te apinga aroa akaperepere o tana Tamaiti no tatou nei. (Ioane 3:16) Pera katoa, noatu e te onge ra te aronga i roto i te akonoanga pikikaa i te pae vaerua, te rekareka nei tatou i te maata i te kai pae vaerua. (Isa. 65:13) E tuanga tatou no tetai taokotaianga taeake i te ao katoa e te akameitakiia ra kia piri atu ki roto i te akatotoaanga marekaia o te akamorianga mou. (Isa. 2:3, 4; 60:4-10, 22) Akapeea tatou i te akaari i to tatou marekaanga kia Iehova no tana au akameitakianga e oronga maoraora maira ki runga ia tatou nei?—Kolosa 3:15, 17.
2 Angaanga Ngakau Katoa, e te Rekareka: I te uriuri anga i te oronga anga i te apinga materia, kua tata te apotetoro ko Paulo e: “Ko te tangata oronga ma te rekareka ta te Atua e inangaro.” (2 Kori. 9:7) Kua akono katoaia teia kaveinga ki ta tatou angaanga ki te Atua. Te akaataia ra te marekaanga i roto i to tatou tu maoraora no te tuatua mou, to tatou rekareka i te au uipaanga Kerititiano, to tatou maroiroi i roto i te angaanga orometua koro, e to tatou rekarekaanga i te akonoanga i te anoano tu-Atua.—Sa. 107:21, 22; 119:14; 122:1; Roma 12:8, 11.
3 Ia Iseraela taito ra kare te Ture i akataka ana i tetai tuanga tikai no tetai au oronga anga. Ka rauka te tangata akamori tataki tai i te akaari i tona ariki anga na te oronga anga tei “tau i te meitaki ta to Atua ra ta Iehova i oronga atu tei rauka mai iaia.” (Deu. 16:16, 17) Tei aiteite i teia tuatau, ka akakeu te ngakau ariki ia tatou kia rave i te maata te ka akatikaia e to tatou au turanga i roto i te angaanga tutuanga Patireia e te akariroanga i te tangata ei pipi. Ka rauka ainei ia tatou i te akono maata tikai i te au orote a te ao nei, te au orote a te apii, me kore te au ra openga o te epetoma kia akamaata i ta tatou akapou anga i te tuatau i roto i te angaanga koro, penei kia painia tauturu? Penei ka rauka i reira ia tatou i te akaari i to tatou marekaanga na roto i tetai mataara maata atu.
4 Maata Atu ma te Akameitaki: Tetai mataara maata e akakite ei tatou i ta tatou akameitakianga kia Iehova e na roto ia i te pure. (1 Tesa. 5:17, 18) Te raurau ra te Tuatua a te Atua ia tatou kia ‘maata atu te akarongo ma te akameitaki.’ (Kolosa 2:7) Noatu e te rave maroiroi ra tatou me kare tei raro i te taitaia, kia kapiti mai tatou i te akameitakianga i roto i ta tatou pure i te au ra tataki tai. (Philipi 4:6) Ae, na ta tatou angaanga orometua e pera katoa ta tatou au pure, penei ka “maringi ua [tatou] i te rai i te akameitaki i te Atua.”—2 Kori. 9:12.