Akatangi Anga Imene te Akaoraora Ra
1 E tuanga puapinga maata no te akamori mou te imene anga e te akatangi anga imene. Ia Iseraela taito ra, kua imene a Asapha e tona ai taeake: “E akameitaki ia Iehova, . . . E imene iaia, e imene iaia i te salamo, e tuatua i te au angaanga taka ke ravarai nana ra.” (1 Para. 16:8, 9) I teia tuatau te taki ra tatou i to tatou au reo na roto i te imene anga kia Iehova i ta tatou au uipaanga putuputuanga i te au epetoma. (Ephe. 5:19) Mei teaa tikai teia te tuatau umere kia oronga i te akapaapaa anga ki tona ingoa!—Sa. 69:30.
2 Na te akarongorongo anga ki te Kingdom Melodies, te au akanoonooanga pupu akatangi o te au imene Patireia, ka akakiia to tatou manako ma te au manako pae vaerua. “I te au imene e akatangiia ra, kua rongo mai au i te au tuatua i roto i toku manako,” i akataka mai ei tetai tuaine. “Mei teaa tikai te mataara meitaki i te akono ia Iehova i roto i toku au manako iaku e rekareka ra i te akatangi anga imene!”—Philipi 4:8.
3 Te Au Tuatau e Rekarekaia ai te Reira: Na te akatangi anga i te Kingdom Melodies i te kainga te akatupu ra i tetai tu pae vaerua, e te pumaana te oronga maira i te au ki te ngutuare tangata ra. “E akatangi putuputu ua ana matou i teia [akatangi anga imene] i roto i to matou kainga e te motoka e kare takiri e roiroi ana i te au akanoonooanga akakeuanga,” i tata mai ei tetai ngutuare tangata. “E putuputu ana te Kingdom Melodies i te oronga anga i te tu ponuiaau tau me te akapapa ra no te au uipaanga Kerititiano me kare me te aere ra ki tetai akaputuputuanga.” Kua karanga tetai tuaine e: “Kua riro te reira ei rekarekaanga kia akarongoia iaku e tama ra i te are—koai tei manako ana te mataora ra au iaku e atuatu ra i te kakau? Kua parani mai au i te akatangi i teia akatangi anga imene me kite mai au e kua taitaia toku ngakau. Kua riro te akatangi anga imene ei tupu anga tamataora anga tikai! . . . Te akakeu ra te au imene katoatoa i te mataora.” E au tuatau ainei tetai e ka puapingaia koe e taua akatangi anga imene akaoraora ra?
4 Te maata anga o te akatangi anga imene i teia tuatau te akaata ra i te vaerua o te ao nei. Ka rauka i te au metua i te tauturu i ta ratou tamariki i te akatupu i tetai tongi anga no te akatangi anga imene tau na te taangaanga meitaki anga i te au rekotianga o te Kingdom Melodies. Ka mareka katoa te aronga apiipii Pipiria e manganui e te aronga te inangaro ra i te kite mai no runga i teia au imene manea i te pae vaerua, te akakaka ra ia Iehova e te akareka ra i te vaerua.—Sa. 47:1, 2, 6, 7.