“Kia Maora Katoa”
1. Eaa te apainga ta tatou tataki tai e apai ra?
1 I roto i te taokotaianga taeake Kerititiano, tei ia tatou tataki tai te apainga kia oronga ki te pumaana o te putuputuanga. (1 Pe. 1:22; 2:17) Ka akatupuia taua pumaana ra me “maora katoa” tatou i to tatou ngakau aroa ua ki tetai e tetai. (2 Kori. 6:12, 13) Eaa ra i puapinga maata ai kia kite meitaki atu i to tatou au taeake e te au tuaine?
2. Eaa oki e puapinga ai kia akatupu i te au pirianga oa ma te au taeake irinaki ra?
2 Ka Tupu Pakari te Au Pirianga Oa: Ia tatou e kite meitaki maira i to tatou au oa akarongo, kua ariki maata mai tatou i to ratou akarongo, te akakoromaki, e tetai ua atu au tu meitaki. Kia tatou i te akaraanga kua meangiti mai to ratou au tu apa ua, e kua akamata te au pirianga oa i te tupu mai. I te kite meitaki anga i tetai e tetai, tei roto tatou i te turanga meitaki i te akamaroiroi e te akapumaana i tetai e tetai. (1 Tesa. 5:11) Ka riro mai tatou ei “tauturu akapumaana” ki tetai e tetai i te patoi i te au mana tau kore o to Satani ao. (Kolosa 4:11, NW) I te akamanako anga i teia au ra openga tei ki i te taomi anga, mei teaa ra to tatou mareka anga i te rauka anga te au taeake meitaki i rotopu i to Iehova iti tangata ra!—Maseli 18:24.
3. Akapeea tatou e riro ei ei tauturu akapumaana ki etai ke?
3 Ka riro te au oa piri vaitata ei tumu takake no te maroiroi e te pumaana me aro atu tatou i te au timataanga pakari tikai. (Maseli 17:17) Kua maara i tetai Kerititiano tei putoto i te au manako puapinga kore e: “Te vai ra te au oa te ka tuatua i te au apinga meitaki no runga iaku kia tauturu iaku i te autu i te au manako tau kore taku i manako mai.” Kua riro taua au oa ei akameitakianga mei ia Iehova.—Maseli 27:9.
4. Akapeea e rauka ai ia tatou i te kite meitaki atu i etai ke i roto i te putuputuanga?
4 Itae Atu ki Tetai Ke: Akapeea tatou i te maora anga katoa i to tatou ngakau aroa ua no te au oa akarongo? Kapiti mai i te aravei atu anga i etai ke i te au uipaanga Kerititiano, e tauta i te akamata i tetai pukapuka anga puapinga tikai. Kare ko te inangaro e kia kite maata atu i to ratou oraanga muna, e akaari i te inangaro oonu uaorai. (Philipi 2:4; 1 Pe. 4:15) Tetai mataara i te itae atu anga ki etai ke na te patianga ia ratou kia aere mai no tetai kaikai anga. (Luka 14:12-14) Me kare penei ka akanoo koe kia angaanga kapiti kia ratou i roto i te angaanga orometua koro. (Luka 10:1) Ia tatou e rave ra i te akamataanga kia kite meitaki atu i to tatou au taeake, ka akamaroiroiia te taokotaianga i roto i te putuputuanga.—Kolosa 3:14.
5. Eaa tetai mataara i te akamaata atu i to tatou au pirianga oa?
5 E iki ana ainei tatou i te au oa vaitata no roto ua mai i te pupu aronga e tai o tatou mataiti me kore te aronga e aiteite te au inangaro ki to tatou uaorai? Auraka tatou e akatika i taua au tumu i te kotinga i te au pirianga oa ta tatou e tatanu ra i roto i te putuputuanga. Kua akatupu a Davida e Ionatana e pera katoa a Ruta raua ko Naomi i tetai taokotaianga ketaketa o te pirianga oa noatu te au tuke i te mataiti e te ngai i aere mai ei ratou. (Ruta 4:15; 1 Samu. 18:1) Ka rauka ainei ia koe i te akamaata atu i toou au pirianga oa? Na te raveanga i te reira ka apai mai i te au akameitakianga kare i tapapaia ana.
6. Eaa etai au akameitakianga o te maora katoa i to tatou au ngakau aroa no to tatou au taeake?
6 Na te maoraora anga i to tatou au ngakau aroa ua no etai ke, kua akaketaketa tatou i tetai e tetai, e te akamaroiroiia ra te au i roto i te putuputuanga. Pera katoa, ka akameitaki a Iehova ia tatou no te akaari anga i te aroa ki to tatou au taeake. (Sa. 41:1, 2; Ebera 6:10) Kore koe e akariro ei akakoroanga naau kia kite meitaki mai i te manganui te ka rauka ra?