Apii Puka a te Putuputuanga—Eaa oki i Anoanoia ai e Tatou

1. Eaa te au akamataanga no te akanoonooanga no te Apii Puka a te Putuputuanga?

¹ I te 1895, te pupu apii o te Aronga Apiipii Pipiria, tei kapikiia te Au Kite o Iehova i taua taime ra, kua kiteaia mai e ko te Pupu Akamataanga no te Apii Pipiria. Kua taangaangaia te au voriumu o te Millennial Dawn e ko te tango ia no te apii. I muri akera, kua kapikiia teia au uipaanga e ko te Pupu Berea no te Apii Pipiria. (Anga. 17:11) E putuputu te taime e aravei ana tetai pupu e meangiti ua tona maata i roto i te are o tetai i te po tei tau ra ki te katoatoa. Kua riro teia au uipaanga e ko te mea mua o te Apii Puka a te Putuputuanga.

2. Akapeea tatou i te oronga atu anga ki “te akamaroiroi anga tetai i tetai” i te ngai apii puka?

² Akamaroiroi Anga e te Tauturu: Mei te mea e kua akakoroia kia meangiti ua te pupu apii puka, e maata atu i reira te tuatau no te aronga tei tae atu kia akakite i to ratou akarongo na te paupauanga. Te ka tupu “te akamaroiroi anga tetai i tetai.”​—Roma 1:12, akaaite NW.

3, 4. Akapeea te akanoonooanga no te apii puka i te tauturu anga ia tatou i te akatupu i ta tatou angaanga orometua?

³ Ka tauturu te akaraanga i te tu o te apiianga a te akaaere apii puka ia tatou kia ‘akono meitaki i te tuatua mou ra.’ (2 Timo. 2:15, NW) E tamou e akapeea aia i te akamaata anga i te tumu anga mei te Tuatua Tapu o te tumu tuatua. Me ka tau ki te puka e uriuriia ra, penei ka akamaata aia i te au tumu puapinga na roto i tetai uriurianga taopenga, i te taangaanga ua anga i te Pipiria. Ka rauka tana akaraanga meitaki i te tauturu ia tatou i te akameitaki atu i ta tatou apiianga i roto i te angaanga orometua Kerititiano.​—1 Kori. 11:1.

⁴ Kapiti mai ki te akaaereanga i te apii i te epetoma, ka rave te akaaere apii puka i te arataki i roto i te tutu evangeria. Ma te taokotaianga ki te akaaere tavini, ka akono aia i te au akanooanga tau no te angaanga koro. Ka kimi aia i te tauturu i te katoatoa i roto i te pupu kia akatupu i ta ratou apainga Kerititiano i te tutu aere i te tuatua meitaki e kia akariro i te tangata ra ei pipi.​—Mata. 28:​19, 20; 1 Kori. 9:16.

5. Eaa te tauturu kia koe uaorai te vai ra na roto i te apii puka?

⁵ E inangaro to te akaaere apii puka i roto i te oraanga pae vaerua o te tangata tataki tai i roto i te pupu. Kua akaari aia i teia inangaro ki te au uipaanga putuputuanga e iaia e angaanga ra ma etai ke i roto i te angaanga koro. Kua taangaanga katoa aia i te au atianga me atoro aia i te au taeake i to ratou kainga i te oronga i tetai apinga aroa i te pae vaerua. Kia manako ngoie ua te katoatoa i te aravei atu i te akaaere apii puka no tetai tauturu pae vaerua me e inangaro ua ake ratou.​—Isaia 32:​1, 2.

6. (a) Akapeea to tatou au taeake i roto i tetai au enua i te akamaroiroiia anga na te akaputuputuanga i roto i te pupu meangiti ua? (e) Akapeea koe i te puapinga anga mei te akanoonooanga no te apii puka?

⁶ Akamaroiroi Atu i Tetai e Tetai: I te au enua kua kotingaia te angaanga a te iti tangata o te Atua, e akaputu putuputu ana te au taeake i roto i te pupu meangiti ua. Kua maara i tetai taeake: “Noatu e kua araiia ta matou au angaanga Kerititiano, me ka rauka kua rave ua matou i ta matou au uipaanga i te epetoma i rotopu i te 10 e te 15 i roto i te pupu. Mei te au uipaanga kua rauka ia matou te maroiroi i te pae vaerua, mei ta matou apii Pipiria e ta matou pirianga katoa i muri ake i te apii. E akaaite ana matou i ta matou au tupuanga, e kua tauturu teia ia matou i te kite mai e e aiteite ua te putotoanga kia matou tataki tai.” (1 Pe. 5:9) Kia rauka ia tatou, katoa, i te akamaroiroi i tetai e tetai na te turuturuanga tikai i te akanoonooanga no te Apii Puka a te Putuputuanga.​—Ephe. 4:16.