Tamou Marie i te Manako Rapurapu!
1 Kua kite a Iesu e poto ua tona tuatau i te enua nei i te akaoti i te angaanga a tona Metua. (Ioane 9:4) No reira, kua rave aia i tana angaanga orometua ma te manako rapurapu, e kua tereni aia i tana au pipi kia pera katoa. (Luka 4:42-44; 8:1; 10:2-4) Kare te au apinga pae kopapa i te mea puapinga roa kiaia. (Mata. 8:20) No reira, kua rauka iaia i te akaoti i te angaanga ta Iehova i oake mai kia rave aia.—Ioane 17:4.
2 Poto ua te Tuatau: E poto katoa te tuatau i te tutu i te tuatua meitaki “e kako rava ake te ao katoa nei.” (Mata. 24:14) Te akakite maira te totou Pipiria e tei roto roa tatou i te tuatau openga. Kare e roa atu ko “te aronga kare i kite i te Atua, e tei kore i akarongo i te evangelia o to tatou Atu o Iesu Mesia . . . ka akautungaia mai ïa i te mate mutu kore.” (2 Tesa. 1:6-9) Ka rokoia viviki ua mai taua akavaanga ra. (Luka 21:34, 35; 1 Tesa. 5:2, 3) Ka anoanoia te tangata kia kite i to ratou turanga kino. Na tatou ia apainga i te tauturu ia ratou kia kimi i ta Iehova akaperepereanga koi vai ei te tuatau.—Zepha. 2:2, 3.
3 Rave Anga i te ka Rauka ia Tatou: Te kite anga e “te poto nei te tuatau,” te tuku nei te au tavini o te Atua i te angaanga tutu anga na mua. (1 Kori. 7:29-31; Mata. 6:33) Kua akaruke etai pae i te au tikaanga no te pae moni me kore i te au aruaruanga ke mai kia akamaata atu i ta ratou tuanga i roto i te angaanga orometua. (Mareko 10:29, 30) Ko etai kua rave atu rai kia ‘maata te rave anga i te angaanga a te Atu’ noatu te maata o te timataanga. (1 Kori. 15:58) E manganui tei akakite pu ua ana i te tuatua meitaki no te au rau ngauru mataiti ma te ngaueue kore. (Ebera 10:23) Te manako akaperepere maira a Iehova i taua au akaatingaanga katoa ra i te turu i te Patireia.—Ebera 6:10.
4 Te akanoo anga i to tatou oraanga ki runga i ta Iehova akamorianga, kapiti mai i te angaanga tutu anga, ka tauturu ia tatou kia akamanako marie i te ra o Iehova. Ka paruru ia tatou kia kore e tatipakeia e to Satani ao e ka akaketaketa i ta tatou ikianga kia akono marie i te tu tapu. (2 Pe. 3:11-14) E tikai e, ka riro te rave anga i ta tatou angaanga orometua ma te manako rapurapu ei akaora, ia tatou uaorai e te aronga katoa e akarongo maira ia tatou.—1 Timo. 4:16.