Akakitekite Anga ki te Kopu Tangata—Akapeea Ra?
1. Eaa ra i umuumuia ai te tu kite me te akakitekite ra ki te kopu tangata?
1 Eaa atu te rekareka maata te ka rauka ia tatou i te tomo atu anga ki roto i te ao ou ma to tatou aronga akaperepereia, te taokotaianga kia ratou i roto i te akamorianga ia Iehova! Na ta tatou akakitekite anga ki te kopu tangata, penei ka riro teia manakonakoanga rekareka ei mea tika tikai. Inara, i te raveanga i teia i roto i te tu akaoraora, te umuumuia ra te tu kite. Kua kite mai tetai akaaere kotinga e: “Kua akatupuia te au tupu anga meitaki roa atu e te aronga tei akaaraara i te tu inangaro i te kite atu i roto i to ratou kopu tangata na te akakitekite marie ua anga .” Akapeea tatou i te raveanga i teia?
2. Akapeea te tu inangaro tikai i roto i to tatou kopu tangata e tauturu ei ia tatou kia akaaraara i to ratou inangaro i te kite atu?
2 Akaaraara i to Ratou Inangaro i te Kite Atu: E akamanako meitaki tikai ana na mua e akapeea koe i te akakeu anga i te inangaro o toou au kopu tangata. (Maseli 15:28) Eaa to ratou au manakoanga? Eaa te au akaaoanga ta ratou e aro atura? Penei ka rauka ia koe i te akaari atu i tetai atikara me kore akakite atu i tetai irava pumaana no runga i tetai tumu manako te inangaro tikai maira ratou. Me kare toou kopu tangata e noo vaitata mai ana, penei ka rauka ia koe i te rave i teia na roto i tetai reta me kore na te terepaoni. Ma te kore e akateiaa anga ia ratou, e tatanu i te au ua no te tuatua mou, e e akara atu kia Iehova kia akatupu i taua au ua ra.—1 Kori. 3:6.
3. Akapeea te inangaro o te kopu tangata i roto ia tatou e akatuera ra i te mataara no tetai akakitekite anga?
3 Kua ikuiku atu a Iesu i tetai tangata tana i tuaru atu ei i te au temoni e manganui: “Ka aere i to ngutuare i toou au taeake, e akakite atu kia ratou i taua mea maata ta te Atua i rave io nei i te aroa ia koe.” (Mareko 5:19) E akamanako ana i te akakeuanga ta teia i akatupu ki tona kopu tangata! Penei paa kare koe e kite mai ana i tetai apinga ma teia tupuanga tikai, penei ua ake te inangaro ra toou kopu tangata i te kite meitaki i taau au angaanga me kore i te au angaanga a taau tamariki. Te taikuanga i tetai ako no roto mai i te Apii Orometua Teokaratiki, i tetai uruoaanga taau i aere atu ana, tetai atoroanga ki te Betela, me kore tetai tupuanga maata tikai kia koe uaorai penei ka akatuera i te mataara noou kia oronga atu kia ratou i tetai apinga akaou mai no runga ia Iehova e tana akaaerenga.
4. Eaa te au puereere ka tau tatou kia kopae i te akakitekite anga ki te kopu tangata?
4 Kia Kite Meitaki: Me te akakitekite ra ki te kopu tangata, e kopae i te tuatua maata roa e tai aereanga. I te akamaaraanga i te taime i akamata ai aia i te apii i te Pipiria, kua ariki rai tetai taeake e: “E i reira kua tuatua ua atu au ki toku mama no te au tuatau e roa kare e ope anga ma te au akatakaanga e vaitata rai no runga i te au apinga taku i kite mai mei te Pipiria, e kua taki putuputu atu teia ki te au karo anga, ma toku papa tikai.” Noatu me te akaari maira tetai kopu tangata i te inangaro i roto i te karere a te Pipiria, e pau atu na roto i te mataara te akakeu ra i te tangata i te inangaro i te kite maata atu. (Maseli 25:7) E akaari ua i te tu ngateitei, takinga meitaki, e te akakoromaki, mei ia koe e tuatua ra ki te au tangata i roto i te angaanga orometua.—Kolosa 4:6.
5. Eaa ta tatou ka rave me kare te kopu tangata e ariki rekareka mai ana me akakitekite atu tatou kia ratou?
5 I tetai atianga, kua manako mai te kopu tangata o Iesu e kua auouoia aia. (Mareko 3:21) Inara, i muri mai, kua riro mai tetai ei aronga irinaki. (Anga. 1:14) Me kare taau au tautaanga ma toou kopu tangata e ariki meitakiia ana i te akamataanga, auraka e tuku i te au. E taui ua ana te au turanga e te au tu manako. E akara tamou ua atu rai no tetai atianga akaou mai kia oronga atu i tetai tumu manako e penei ka akaaraara i to ratou inangaro i te kite atu. Penei ka rauka ia koe te rekareka i te tauturu anga ia ratou kia akamata i runga i te mataara ki te oraanga mutu kore.—Mataio. 7:13, 14.