Te Tuatau Akamaaraanga—E Taime no te Angaanga Akamaataia
1. Eaa te tupuanga ta te “au oroa” i rave i runga i te au Iseraela tei mataku i te Atua ra?
1 I te au taime tei akatakaia i te mataiti, kua akamaara te au Iseraela taito ra i te “au oroa a Iehova.” (Levi. 23:2) Na te akonoanga i te tuatau i te akamanakoanga i runga i te tu meitaki o to ratou Atua kua akatupu te reira i te rekareka maata e kua akakeu ia ratou kia maroiroi rava atu no te akamori mou.—2 Para. 30:21–31:2.
2, 3. Eaa i tau ei e kia akamaata atu tatou i ta tatou angaanga pae vaerua i te tuatau Akamaaraanga, e aea tatou e akono ei i te Akamaaraanga?
2 I teia au tuatau, e akamaataia ana ta tatou angaanga teokaratiki rekareka i te au mataiti ravarai i te tuatau Akamaaraanga. Ko te taime te reira e akamanako oonu ana tatou i runga i te apinga aroa kare e tutaki ta Iehova i oronga mai no tatou uaorai—tana Tamaiti anau tai. (Ioane 3:16; 1 Pe. 1:18, 19) Ia tatou e akamanako oonu ra i runga i te aroa tei akaariia mai e te Atua e tana Tamaiti, ka akakeuia tatou kia akapaapaa ia Iehova e kia akamaroiroi ua rai ia tatou uaorai i te raveanga i te anoano tu-Atua.—2 Kori. 5:14, 15.
3 I teia mataiti ka akonoia te Kaikai Anga Aiai a te Atu i te Paraparau, Mati 24, i muri ake i te opunga ra. Akapeea e rauka ai ia tatou i te akamaata atu i ta tatou tuanga i roto i te angaanga orometua i te au marama o Mati, Aperira, e Me?
4, 5. (a) Eaa tei tauturu i tetai papaki i te itae maata atu i te au tangata ma te tuatua meitaki? (e) Eaa taau i kite mai e te angaanga meitaki ra i toou ngai?
4 Itae Maata Atu i te Au Tangata: Akara i te au mataara te ka rauka kia itae maata atu i te au tangata me piri atu koe i roto i te angaanga koro. Ka rauka ainei ia koe i te parani kia kapiti atu ki roto i te angaanga mei tera are ki tera are me maata ake te tangata i te kainga, mei te aiai avatea rai me kore i te aiai? Me ka inangaro tetai papaki i roto i toou pupu apiipii puka i te piri atu ki roto i te angaanga i mua ake i te apii, penei ka rauka i te akaaere apii puka i te akanoo kia raveia tetai uipaanga poto ua no te tavinianga e rauka ai kia angaanga i tetai ngai i te pae ua mai.
5 Tetai mataara ke atu i te itae maata atu i te au tangata koia oki na te akakitekiteanga i te au ngai tangata. Kua inangaro tetai tuaine i Tiapani i te painia tauturu noatu e e angaanga tinamou tana. Kua akakite atu tetai tangata pakari e i te au ra tataki tai i mua ake ka aere atu ei ki tana angaanga tinamou, penei ka rauka iaia i te rave i te akakitekiteanga i runga i te mataara i te pae mai i tetai ngai rerue. I muri ake i te autu anga i tona uaorai tu akama e te avirianga a tetai aronga i runga i te rerue, kua akatupu aia i tetai ara tuaanga makatini no tetai 40 tangata, kapiti mai te aronga i runga i te rerue, te aronga angaanga i te ngai rerue, e te au ona toa i te pae mai. E tuku ana aia i te avereti e 235 makatini i te marama. Na te oronga anga i te au manako Tuatua Tapu ma te au tangata no nga mea tuatau iti ua i te ra tataki tai, kua rauka iaia i te akamata e ono apii Pipiria.
6. Akapeea e rauka ai i te au mapu i te akamaata atu i ta ratou angaanga pae vaerua?
6 Au Tuatau i te Akakitekite Anga: Manganui te au papuritia e aere apii ra e au tuatau orote to ratou i te mataiti. Penei e au tuatau meitaki teia kia painia tauturu. Kapiti katoa atu, ka rauka te au mapu Kerititiano i te akamaata atu i ta ratou angaanga na te oronga anga i tetai akakitekiteanga i te apii. Penei ka poitirere koe i te inangaro o te au oa apii kia kite maata atu no runga i toou au irinakianga. Kore ei koe e taangaanga i te tuatau no te au uriurianga i roto i te are apii me kore i te au tataanga tua a te apii i te oronga i tetai akakiteanga? Kua rauka i tetai papaki te reira na te taangaanga anga i ta tatou au vitio. Kua akamata tetai papaki i te au apii Pipiria ma te au oa apii e kua tauturu atu ia ratou kia tere ki mua ki te akatapuanga e te papetitoia anga. E au mataara meitaki teia i te “akameitaki i te ingoa o Iehova.”—Sa. 148:12, 13.
7. (a) Akapeea tetai taeake i te taangaanga anga i te au tuatau kia tutu atu ki tetai ke ra? (e) Kua rekareka ana ainei koe i tetai tupuanga mei teia rai?
7 I roto i taau angaanga matauia, e akara i te au mataara i te tuatua atu anga ki te au tangata no runga i to tatou Atua umere tikai e tana au taputouanga manea tikai. Tetai taeake e aere ua ana na runga i taua au rerue rai i te au ra tataki tai e tutu ana me te tau ra ki te au taeake e aru ana i te rerue. Ei akaraanga, iaia e tiaki ra i tona rerue i tetai ngai tiaki anga rerue, kua tutu atu aia ki tetai tangata mapu i te au ra ravarai mei tetai rima miniti. Tei tupu, kua akatika teia tangata mapu e tona taeake ki tetai apii Pipiria. Kua raveia te apii Pipiria i runga i te rerue ia ratou e aaere ra. I tetai tuatau i muri mai, tetai vaine pakarikari ko tei akarongorongo mai ana ki ta ratou au pukapukaanga kua aravei mai i te taeake e kua pati mai kiaia no tetai apii Pipiria. Te rekareka katoa ra aia i tana apii i te au ra e aru ana aia i te rerue. Na roto i teia mataara, kua apii teia taeake ki te au tangata tataki tai tukeke e tai ngauru i runga i te rerue.
8. Eaa tetai ravenga no te tavinianga te ka rauka ia e te aronga tei kotingaia no tei pakari me kore te au manamanata i te pae o te oraanga kopapa i te akamaata atu i ta ratou piri atu anga ki roto i te angaanga orometua?
8 Akapeea me kua kotingaia koe i roto i taau ka rave no tei pakari me kore te au manamanata i te pae o te oraanga kopapa? Penei te vai ra rai te au mataara ka rauka ia koe i te akamaata atu i taau akapaapaanga kia Iehova. Kua tamata ana ainei koe i te akakitekiteanga terepaoni? Me kare koe e papu roa ana e akapeea i te raveanga i teia, e akakite atu ki toou akaaere apii puka. Penei ka rauka iaia i te akanoo i te au papuritia te taangaanga ra i teia ravenga kia angaanga kapiti atu kia koe. Na te angaanga kapitianga ei tokorua, ka rauka ia korua i te kite mai mei tetai e tetai e kia tauturu i tetai e tetai i te oronga anga i tetai akakitekiteanga meitaki tikai. Ka kiteaia te au tamanakoanga meitaki i te raveanga i te akakitekiteanga terepaoni i roto i te Our Kingdom Ministry Peperuare 2001, kapi 5-6.
9. Akapeea e rauka ai ia tatou i te tauturu atu i te aronga apiipii Pipiria kia tau kia piri atu ma te putuputuanga i roto i te angaanga orometua papuriki?
9 Penei i te tae atu anga ki te Akamaaraanga kua akakeuia te aronga ou kia inangaro i te akamaata atu i ta ratou akapaapaa anga kia Iehova. Ka rauka ia koe i te tauturu ia ratou i te autu i tetai ua atu tu mataku no runga i te angaanga tutu aere ua na te akakite anga i te au tupuanga meitaki tikai i roto i te angaanga koro e na te tereni ua atu anga ia ratou i te akataka i te au apiianga Pipiria e i te turuturu i to ratou akarongo. (1 Pe. 3:15) Me akakite mai tetai tangata apiipii Pipiria i te inangaro i te akamata i te akakiteanga i te tuatua meitaki, e tuatua atu ki te akaaere akatere. Nana e akanoo i tetai uipaanga ma te tangata apiipii i te akara me te tau ra aia i te piri atu ma te putuputuanga i roto i te angaanga orometua papuriki. Mei teaa tikai ta te reira akarekareka anga i to Iehova ngakau i te kite anga i te aronga ou i te apaianga i to ratou turanga i tona tua no te itiu i te ao e pini ua ake!—Maseli 27:11.
10. (a) Akapeea tetai akapapaanga meitaki i te tauturu anga ia tatou kia painia tauturu? (e) Kua rauka ana ainei ia koe i te akanoo i te painia tauturu i te mataiti i topa akenei i te tuatau Akamaaraanga? I akapeea?
10 Ka Rauka Ainei ia Koe i te Painia Tauturu? Te umuumuanga e 50 ora no te painia tauturu ka tau kia akamanako pakariia. (Mata. 5:37) Teia te aiteanga e ka inangaroia koe i te akanoo kia akapou e 12 ora te avereti i roto i te angaanga koro i te epetoma takitai. Te tau ra ainei tetai o te akaraanga i te au akapapaanga no te painia tauturu i runga i te kapi 5 ki toou au turanga? Me kare rai, ka rauka ainei ia koe i i te akanoo i tetai akapapaanga te ka akatika ia koe i te painia tauturu i roto ia Mati, Aperira, me kore ia Me? E pati atu kia Iehova kia akameitaki mai i taau au tautaanga kia akamaata atu i taau angaanga tavinianga.—Maseli 16:3.
11. Akapeea e rauka ai i te aronga pakari e te au tavini orometua i te turuturuanga i te aronga te ka tavini ei au painia tauturu?
11 Ka turuturu pu tikai te aronga pakari e te au tavini orometua i taau au tautaanga kia akariro i teia tuatau Akamaaraanga ko tetai akapaapaaanga takake kia Iehova. Papu e, e maata ratou te ka painia tauturu. Ka akanoo te aronga pakari kia raveia te au uipaanga akaou mai no te tavinianga, mei taua ra i te au aiai avatea, i te au aiai i te ra tatakitai, e te au openga epetoma, i tei inangaroia. I te akaraanga iea e aea taua au uipaanga e raveia ai e koai te ka va mai kia akono i te aratakianga, penei ka tuatua te aronga pakari ki te aronga e kua papu te au parani e ka painia rai me kore te manakonako ra i te raveanga i te reira. Ka aruaru te aronga pakari i te taokotai i te au akanoonooanga kia rauka i te angaanga kapiti atu ma tetai atu au papuritia i te au ra e te au ora taau i akanoo tikai no te tavinianga. Na roto i teia mataara, ka rauka te au parani kia akanoo tikai ia e e maata te meitaki te ka akatupuia.—Maseli 20:18.
12 Eaa te akakeu ra ia tatou i te akapaapaa ia Iehova i te au taime ravarai?
12 Kia Rave Meitaki Maata Koe: Me kare toou au turanga e akatika ia koe i te painia tauturu, e akamaara ua e te ariki ra Iehova i ta tatou au tautaanga e te au akaatinga anga ‘e ārikiia ïa ta tatou e rauka ra, kare i tei kore i rauka ia tatou ra.’ (2 Kori. 8:12) E maata ta tatou au apinga no te akameitaki anga ia Iehova. Ma te tumu meitaki kua tata a Davida e: “Ka akameitaki rai au ia Iehova, kare e tivata; kia vai tamou rai te akameitaki iaia i roto i toku nei vaa.” (Sa. 34:1) Kia rauka ia tatou taua akakoroanga papu i teia tuatau Akamaraanga.
[Pia i te kapi 3]
Akapeea Koe i te Akamaata Atu Anga i Taau Angaanga?
◼ Tutu atu me tei te kainga te au tangata
◼ Akakitekite i te au ngai papuriki
◼ Akakitekite i te ngai angaanga me kore i te apii
◼ Rave i te akakitekite anga terepaoni
◼ Tavini ei painia tauturu
[Tutu i te kapi 5]
Akaraanga o te Au Akapapaanga no te Painia Tauturu
Au Mataara i te Akapapa e 12 Ora no te Angaanga Koro i te Epetoma Tataki Tai
Au Popongi—Monite ki te Maanakai
Ka rauka te Tapati kia tupauia ki tetai ua atu ra
Ra Tuatau Ora
Monite Popongi 2
Ruirua Popongi 2
Ruitoru Popongi 2
Paraparau Popongi 2
Varaire Popongi 2
Maanakai Popongi 2
Ora Katoa: 12
E Rua Ra Katoa
Ka rauka i tetai ua atu nga ra e rua i te epetoma kia ikiia
(Tei runga i te au ra tei ikiia, penei ka taeria te katoa anga o teia akapapaanga ki te 48 ua rai ora no te marama)
Ra Tuatau Ora
Ruitoru Ra Katoa 6
Maanakai Ra Katoa 6
Ora Katoa: 12
E Rua Aiai e te Openga Epetoma
Ka rauka i tetai ua atu nga aiai e rua i te epetoma kia ikiia
Ra Tuatau Ora
Monite Aiai 11⁄2
Ruitoru Aiai 11⁄2
Maanakai Ra Katoa 6
Tapati Apa Ra 3
Ora Katoa: 12
Toru Avatea e te Maanakai
Ka rauka te Tapati i te tupauia no tetai ua atu ra
Ra Tuatau Ora
Monite Avatea 2
Ruitoru Avatea 2
Varaire Avatea 2
Maanakai Ra Katoa 6
Ora Katoa: 12
Taku Uaorai Akapapaanga Tavinianga
E iki i te numero ora no te tuatau tatakitai
Ra Tuatau Ora
Monite
Ruirua
Ruitoru
Paraparau
Varaire
Maanakai
Tapati
Ora Katoa: 12