Tetai Vitio ma Tetai Karere Kotinga Koreia

Eaa te karere i roto i te vitio David​—He Trusted in God? Kia irinaki tatou, mei ia Davida rai, ki roto ia Iehova. (Sa. 91:2) I te kiteanga i te au tupuanga maata akatutuia maira i roto i te oraanga o Davida ka tauturu i te tamariki e te aronga mamaata i te apii mei tana akaraanga i akanoo mai. (Sa. 31:14) No to tatou puapinga katoa, te kapitiia maira i roto i teia DVD te “Video Quiz” e te “Learning Activities” e manganui.

E akara i te vitio, e i reira e ui rai kia koe uaorai: (1) Eaa oki a Iehova i iki ei i tetai ariki meitaki atu? (1 Samu. 15:10, 11; 16:1) (2) Eaa oki aia i kore ei i iki i tetai ua atu o te ai taeake o Davida? (1 Samu. 16:6, 7) (3) Eaa ra a Saula i rekareka ai ia Davida i te akatangi i te kinura? (1 Samu. 16:14-23) (4) Koai a Golia? (1 Samu. 17:4-10) (5) Eaa oki a Davida i inangaro ei i te ta ia Golia? (1 Samu. 17:23, 24, 36, 37) (6) Koai a Ionatana? (1 Samu. 14:1) (7) I teea taime i riro mai ei a Saula ei enemi kino roa atu no Davida? (1 Samu. 18:25-29) (8) Eaa oki a Davida i kore i ta ia Saula? (1 Samu. 26:7-11) (9) Akapeea a Saula i te mateanga? (1 Samu. 31:1-6) (10) Eaa to Davida manako ki te mateanga o Ionatana? (2 Samu. 1:11, 12) (11) Eaa te taputou ta Iehova i akono kia Davida? (2 Samu. 7:12, 13, 16) (12) Eaa te tarevake kino ta Davida i rave? (2 Samu. 11:1-5, 14-17) (13) Akapeea a Davida i te akaarianga e kua mii tikai aia i tana i rave? (Sa. 51) (14) Eaa te au apiianga ta Davida i oronga atu ki te mapu ko Solomona? (1 Ariki 2:1-4; 1 Para. 22:6-13; 28:9, 10) (15) Akapeea to Iesu tutaraanga e akapuapinga ia Davida, Ionatana, e ia koe?​—Isaia 11:6-9; Ioane 11:25, 26.

I teianei e akamanako ana: Akapeea e rauka ai ia koe uaorai i te aru i te irinaki ki roto i te Atua tei akaariia e Davida ra?

Te au metua, kia tatanu ki roto i ta kotou tamariki i te puapinga kotinga koreia no te irinaki anga i te Atua, mei ia Davida rai.​—Sa. 56:11.