Rave Anga i te Au Apiianga Pipiria Tere ki Mua
Tuanga 8: Aratakianga i te Aronga Apiipii ki te Akaaerenga
1. No teaa ra i puapinga ai te oronga i tetai manako i tetai apii Pipiria no runga i ta Iehova akaaerenga i te epetoma tataki tai?
1 Ta tatou akakoroanga i te rave anga i te au apii Pipiria kare e kia apii ua i te akakiteanga no te akonoanga mari ra kia tauturu katoa i te aronga apiipii kia riro mai ei tuanga no te putuputuanga Kerititiano. (Zeka. 8:23) Ka tauturu te poroutia Au Kite o Iehova—Rave Taokotai ra i to te Atua Anoano i te Ao Katoa ia tatou i te rave i te reira. E oake atu i tetai kopi ki te aronga apiipii Pipiria ou, e akamaroiroi atu ia ratou i te tatau i te reira. Kapiti atu, e akono nga mea miniti ua i te epetoma tataki tai i te apii atu i tetai manako no runga i ta Iehova akaaerenga.
2. Akapeea koe i te akamaroiroi atu anga i te aronga apiipii Pipiria kia aere mai ki te au uipaanga putuputuanga?
2 Au Uipaanga Putuputuanga: Te mataara maata e rauka ai i te aronga apiipii Pipiria i te ariki i ta te Atua akaaerenga koia oki na te kapiti mai anga kia tatou i te au uipaanga putuputuanga. (1 Kori. 14:24, 25) No reira, penei ka rauka ia koe i te akamata i te akamatau atu ia ratou na te akatakaanga i te au uipaanga e rima i te epetoma, e tai uipaanga i te taime. E taiku i te ingoa o te tuatua papuriki te ka aru mai. E akaari atu kia ratou i te manako te ka uriuriia i te Apii Punanga Tiaki e i te Apii Puka a te Putuputuanga. E akataka atu i te Apii Orometua Teokaratiki e te Uipaanga Tavini Anga. Me e tuanga taau i runga i te apii, penei ka rauka ia koe i te akamatau atu i te reira kia ratou. E oronga atu i te au manako takake tikai tei orongaia i te au uipaanga. E taangaanga i te au tutu i roto i ta tatou au puka e tauturu atu ia ratou i te akamanako tikai eaa te tupu ra ki reira. Mei te apii mua tikai, e pati atu ia ratou kia aere mai.
3. Eaa te au tu o te akaaerenga e penei ka rauka ia tatou i te uriuri atu?
3 Me ka raveia te Akamaaraanga, te au akaputuputuanga, e tetai atoroanga mei te akaaere kotinga, e akono i nga mea miniti ua i te akataka e te akamaroiroi i te tu maoraora no teia au akanoonooanga. Ma te marie e pau atu i te au uianga mei te ra: Eaa oki tatou i kapikiia ai ei Au Kite o Iehova? Eaa ra tatou e taiku ana i to tatou au ngai uipaanga ei au Are Uipaanga Patireia? Eaa te au angaanga a te aronga pakari e te au tavini orometua? Akapeea te angaanga tutu anga e te ngai ka angaangaia e akaaereia ana? Akapeea ta tatou au puka e neneiia ana? Akapeea te akaaerenga i te tutakiia? Eaa te au angaanga a te opati manga e te Pupu Akaaere i te akaaere anga i te angaanga?
4, 5. Akapeea e rauka ai i ta tatou au vitio i te akatupu i te ariki anga rekareka no te akaaerenga?
4 Au Vitio Ikuiku: Tetai ravenga akaou mai ka rauka i te aronga apiipii Pipiria i te kite i ta Iehova akaaerenga umere tikai koia oki na roto i ta tatou au vitio. Ka taki atu teia ia ratou To the Ends of the Earth, akamatau atu ia ratou ki te Our Whole Association of Brothers, e te akaari anga kia ratou e akapeea tatou e United ei by Divine Teaching. Tetai vaine e rave ua ana aia i ta tatou au makatini e tetai atu au puka e rima mataiti kua tae tona roimata no te vitio Jehovah’s Witnesses—The Organization Behind the Name. Kua akatupu oki aia i te irinaki ki roto i te Au Kite tei atoro mai iaia, inara i muri ake i te akarakaraanga i te vitio, kua manako mai aia e ka rauka katoa iaia i te irinaki i te akaaerenga. Kua akamataia tetai apii tikai kiaia, e te epetoma tei aru mai, kua aere atu aia ki te au uipaanga i te Are Patireia.
5 Na te akapou anga nga mea miniti ua i te epetoma tataki tai ma ta tatou aronga apiipii e te taangaanga anga i te au apinga tei orongaia mai, ka rauka ia tatou i te arataki marie i te aronga apiipii Pipiria ki te akaaerenga okotai ta Iehova e taangaanga ra i teia tuatau.