Akatupu i te Kite Karape i te Uriurianga ma Tetai Ke
1. Eaa te tataanga Pipiria ta tatou ka akara matatio atu, e no teaa ra?
1 Te ako a te apotetoro ko Paulo i te tunako i Anetioka o Pisidia, tei rekotiia ia Angaanga 13:16-41, te oronga maira i tetai akaaraanga meitaki e akapeea i te uriurianga ma tetai ke. Kua akamanako a Paulo i te tupuanga e te manakoanga o tana aronga akarongo e kua akatano i tana oronga anga no te tuatua meitaki kia tau. Ia tatou e akara matatio ra i teia tataanga, e akamanako ana tatou e akapeea e rauka ai ia tatou i te rave akapera rai i teia i roto i ta tatou angaanga orometua.
2. Eaa ta tatou i kite mai mei te tu i akamata ai a Paulo i tana ako?
2 Kimi i Tetai Tu Aiteite: Noatu e kua akatumuia ta Paulo karere ki runga i te tuanga puapinga maata o Iesu i roto i te akatupuanga i ta te Atua akakoroanga, kare a Paulo i akamata ana i tana ako na te akakiteanga i te reira tumu manako. Mari ra, kua tuatua aia no runga i tetai apinga aiteite tei akapiri atu iaia ma tana aronga akarongorongo te maataanga e ngati Iuda—te tuatua enua no te au tangata ngati Iuda. (Anga. 13:16-22) Mei te reira tu rai, ka meitaki atu tatou i te itae anga i tetai ke me kimi tatou i tetai tu tei aiteite kia ratou. Penei ka umuumuia tatou kia akamaroiroi ia ratou kia akakite mai i to ratou manako ma te au uianga tau e i te akarongo meitaki anga e rauka ai i te kite meitaki e eaa te mea puapinga maata kia ratou.
3. Eaa ra i ngata roa ai no te aronga akarongo a Paulo kia ariki e ko Iesu te Mesia taputouia?
3 I te uriurianga i te tuatua enua no te ngati Iuda, kua akamaara a Paulo i tana aronga akarongo i ta te Atua taputou kia akatu mai i tetai Akaora mei te kopu tangata o Davida. Inara, e manganui te au ngati Iuda, te tiaki ra i tetai toa vaeau te ka titiri i te amo a te tutaraanga Roma e ka akateitei i te pa enua ngati Iuda ki runga ravao i te katoatoa. Papu ei e kua kite meitaki ratou e kua kopaeia a Iesu e te au arataki akonoanga ngati Iuda i Ierusalema, kua tukunaia atu ki te au mana akaaere o Roma, e kua tamateia. Akapeea e rauka ai ia Paulo i te akapapu kia ratou e ko teia Tangata ko te Mesia taputouia?
4. Akapeea a Paulo i te uriuri anga ma te tu karape ma tana aronga akarongorongo ngati Iuda?
4 Akatanotano i Taau Araveianga: I te kiteanga i te manakoanga o tana aronga akarongo, kua taangaanga a Paulo i te au Tuatua Tapu i te uriuri atu anga kia ratou no runga i te au tumu apinga ta ratou i ariki takere ana. Ei akaraanga, kua akakite atu aia ia Iesu e no te uanga o Davida e ko te tangata akatakaia e Ioane Papetito, ko tei manako maataia e e peroveta na te Atua. (Anga. 13:23-25) Kua akakite atu a Paulo e i te kopae anga ia Iesu e te akaapaanga iaia kia mate, “te tuatua a te au peroveta i tatauia kua akatupu io nei” e te au arataki akonoanga. (Anga. 13:26-28) Pera katoa, kua akataka atu aia e e aronga tetai tei kite e kua akatuia mai a Iesu mei te mate, e kua arataki atu aia i te manakoanga ki te au irava Tuatua Tapu matauia tei akatupuia i roto i te tuakaouanga o Iesu.—Anga. 13:29-37.
5. (a) Akapeea a Paulo i te akatano anga i tana araveianga i te tuatuaanga ki tetai aronga akarongo Ereni? (e) Akapeea e rauka ai ia tatou i te aru i to Paulo akaraanga me tutu aere i roto i ta tatou ngai tutu anga?
5 I tetai tua ra, i te tuatuaanga ki tetai pupu tangata Ereni i Areopago i Atene, kua taangaanga a Paulo i tetai araveianga ke atu. (Anga. 17:22-31) Inara, kua oronga aia i taua rai karere puapinga, e i roto i nga turanga roa rai kua akatupu tana au tautaanga i te au tupuanga meitaki. (Anga. 13:42, 43; 17:34) Aiteite rai i teia tuatau, ka puapinga maataia tatou i roto i ta tatou angaanga orometua, me kimi tatou i te tu aiteite ma ta tatou aronga akarongo e me akatanotano tatou i ta tatou araveianga kia tau ki to ratou tupuanga e to ratou manakoanga.