Taangaanga Meitaki i ta Tatou Au Puka Tei Akatumuia ki Runga i te Pipiria
1, 2. Eaa te manako o te maata anga o te au tangata no runga i ta tatou au puka, e eaa te uianga ta teia i akatupu mai?
1 “E tatau ana au i ta kotou au puka mei te 1965 mai. E akara ana au ki te Pipiria me tatau ana au, e pouroa te au apinga i roto i ta kotou au puka te aite ra ki te Pipiria. E inangaro ua ana au i te kite i te tuatua mou tikai no runga i te Atua raua ko Iesu, e ka rauka tikai iaku i te karanga e te kite mai nei au i te au pauanga tika i roto i ta kotou au puka e te Pipiria.” Ko ta tetai tangata ia i tata atu ki te opati maata o te Au Kite o Iehova. I roto i taua reta rai, kua pati atu aia i tetai apii Pipiria.
2 Mei taua tangata rekareka ra, e ariki ana te au mirioni ua atu tangata takapini i te ao katoa i te au puka apii Pipiria tauturu tei orongaia mai e “te tavini akono meitaki e te pakari.” (Mata. 24:45) I te au mataiti ravarai, e aka putunga puka te neneiia ra i te tauturu i te au tangata ngakau tika kia “rauka te kite i te tuatua-mou.” (1 Timo. 2:4) Akapeea tatou i te taangaanga meitaki anga i ta tatou au puka tei akatumuia ki runga i te Pipiria?
3. Akapeea tatou i te kopae anga i te kaimoumou anga i te au puka?
3 Kopae i te Kaimoumou: I te aereanga o te tuatau, maata atu ta tatou au puka e akaputu ana i ta tatou e taangaanga tikai ana. Eaa ta tatou ka rave kia kopae i te kaimoumou anga i ta tatou au puka puapinga tikai? Te umuumuia ra te kite meitaki i te tiki anga i te au puka no te taangaanga anga i roto i te angaanga orometua. E kia rave maata ua mai i te au kopi o tetai puka ta tatou ka oronga atu, penei ka rauka ia tatou i te tiki atu e tai ua me kore e rua kopi e oti e oki akaou atu i te tiki mai i tetai i muri ake i te orongaia anga te reira. Ka kopae teia i tetai aka putunga puka i te akaputu ua anga i roto i to tatou kainga. Pera rai, me e aka putunga makatini ta tatou kare i orongaia ake, e mea tau kia tameangiti mai i te numero ta tatou e pati ra.
4. Eaa te ka raveia me te vai maata ra te au puka i roto i tetai putuputuanga?
4 Au Puka te Vai Maata Ra: Me te vai maata ra tetai au puka tikai i roto i te putuputuanga, penei ka inangaro te puka akaaere i te ui atu ki tetai au putuputuanga ke i roto i tona ngai me ka inangaro ratou i te au puka. Ka rauka i te au papuritia i te oronga i te au puka takere ki te au mema pamiri irinaki kore, te aronga apii Pipiria, e tetai aronga ke. Penei ka inangaro te aronga tei akapiri ou ua akenei ki te putuputuanga i teia au puka takere no ta ratou uaorai runanga puka teokaratiki.
5. Akapeea tatou i te akaarianga i te ariki anga rekareka no ta tatou au puka?
5 Ka inangaro tatou i ta tatou au puka kia akatupu i ta te reira akakoroanga, koia oki, kia tauturu i te au tangata ngakau tae kia kite maata atu no runga i ta Iehova au akakoroanga umere tikai. Mei ia Iesu rai kare i kaimoumou ana i te kai tei toe mai i muri ake iaia i te angai temeio anga i te urupu tangata, to tatou akakoroanga koia oki kia taangaanga meitaki i te au puka puapinga maata orongaia mai tei akatumuia ki runga i te Pipiria. (Ioane 6:11-13) Te karere akaoraanga te vai ra i roto i ta tatou au puka kare e rauka i te akakeu i te au ngakau o te au tangata tei inangaro i te tuatua tika me te vai ua ra te reira i runga i to tatou kaparata puka me kore i roto i ta tatou au kete puka. No reira, kia tau meitaki tatou me te tiki ra i te au puka no te angaanga orometua e kia taangaanga meitaki i te reira kia puapingaia tetai ke.—Philipi 4:5.