Apii i te Aronga Maru kia Aere na te Mataara o te Atua
1. Eaa te o maira ki te akariro anga i te tangata ei au pipi?
1 E karangaia ana te au pipi a Karaiti i te anere mataiti mua e no “Te Mataara.” (Anga. 9:2, NW) Ko te Akonoanga Kerititiano mou te o maira te mataara katoa o te oraanga e noo ra tetai. (Maseli 3:5, 6) No reira, no te rave anga i tetai apiianga Pipiria, e maata atu te ka anoanoia kia rave tatou i to te oronga ua i te kite tika tikai no te apiianga a te Pipiria. Ka anoano katoaia tatou kia tauturu i te aronga apiipii Pipiria kia aere na roto i to Iehova mataara.—Sa. 25:8, 9.
2. Eaa te ka akakeu i tetai tangata apiipii Pipiria kia akono i te au akauenga a te Atua?
2 Aroa no Iehova e no Iesu: E mea ngata tikai no te tangata apa nei kia tarotai i to ratou au aerenga manako, au tu, tuatua, e te angaanga ki te anoano o te Atua! (Roma 7:21-23; Ephe. 4:22-24) Inara, ka akakeu te aroa no te Atua e tana Tamaiti i te aronga maru kia akono i teia akaaoanga. (Ioane 14:15; 1 Ioane 5:3) Akapeea ra tatou me tauturu i ta tatou aronga apiipii Pipiria kia tatanu i teia aroa?
3. Akapeea tatou me tauturu i te aronga apiipii kia tatanu i te aroa no Iehova e no Iesu?
3 Tauturu i taau tangata apiipii kia kite i to Iehova tu peretana tikai. Kua akamarama mai tetai taeake, “Kare e rauka i te tangata kia aroa i tetai tangata kare ratou i kite, no reira mei te akamataanga tikai o te apii, ka apii au ia ratou i te ingoa o te Atua mei roto mai i te Pipiria, e ka kimi au i te au atianga ei akaketaketa i te au tu o Iehova.” Tetai mataara meitaki roa atu i te rave i teia koia oki na te akamaata anga atu i to Iesu akaraanga. (Ioane 1:14; 14:9) Pera katoa, e taangaanga i te pia no te uriurianga i te openga o te pene tataki tai o te puka Pipiria e Apii Maira ei tauturu i te tangata apiipii kia akamanako meitaki no runga i te au tu umere roa o te Atua e tana Tamaiti.
4. (a) No teaa te manganui o te aronga apiipii e manako ei e e ngata te angaanga tutuanga? (e) Akapeea tatou me tauturu i ta tatou aronga apiipii me akamata ratou i te piri ki roto i te angaanga orometua Kerititiano?
4 Apii na Roto i te Akaraanga: Ei au puapii e te au arataki, ka akaari tatou ki etai ke atu na roto i ta tatou au raveanga eaa te aiteanga kia aere na te mataara o te Atua. (1 Kori. 11:1) Ei akaraanga, kare te maataanga o te aronga apiipii Pipiria i matau i te aravei atu i te aronga ke ua i te akakite atu i to ratou irinakianga. No reira, penei ka anoanoia te akakoromaki e te kite i te tauturu ia ratou kia akatupu i te aroa, te akarongo, e te mataku kore tei anoanoia no te piri atu ki roto i te angaanga tutuanga e te akariro anga i te tangata ei au pipi. (2 Kori. 4:13; 1 Tesa. 2:2) Ka akakeu to tatou inangaro i te arataki i ta tatou aronga apiipii ia tatou kia turuturu ia ratou me akamata ratou i te piri ki roto i te angaanga orometua Kerititiano.
5. Akapeea te akaraanga meitaki i te tauturu anga i te aronga apiipii kia akono i te au mea e o maira ki te aru anga i te au akauenga a te Atua?
5 Ka riro taau akaraanga ei apii i te aronga apiipii i roto i tetai au tuanga ke mai o te oraanga Kerititiano. Me atoro koe i te maki me kore te aravei pumaana atu i etai ke i ko i te au uipaanga putuputuanga, ka kite ratou i te aroa e taangaangaia ra. (Ioane 15:12) Me piri koe ki te tama anga i te Are Uipaanga Patireia me kore me rave i tetai au angaanga tauturu i etai ke, te apii ra koe ia ratou akapeea me tavini. (Ioane 13:12-15) Me kite ratou e te akono ra koe i te tu oraanga ngoie ua, ka marama ratou i te aiteanga e kia ‘na mua ra i te kimi i te basileia.’—Mata. 6:33.
6. Eaa ra te ka tupu mai no te tauturu anga i te aronga maru kia tavini ia Iehova?
6 Te angaanga apii i etai ke mei roto mai i te Tuatua a te Atua e te akariro anga i te tangata ei au pipi e maata tikai te tautaanga ka o mai. Inara e rekareka anga maata tikai te ka rauka kia kite i te aronga maru e ‘aere ra na te tuauta-mou’!—3 Ioane 4.