Angaanga Takake Okotopa 16–Noema 12!

¹ “Te Vaitata Maira te Openga no te Akonoanga Pikikaa!” Ko tera te tumu tuatua no te Tuatua Patireia Nu. 37, te ka tuaia takapini i te ao nei akamataanga i teia marama ki mua. I te tuanga mua o Okotopa, ka oronga tatou i te au makatini o te Punanga Tiaki e te Awake! Akamataanga i te Monite, Okotopa 16, aere atu ki te Tapati, Noema 12, ka piri atu tatou i roto i tetai tua anga maata o te Tuatua Patireia Nu.37. I te au openga epetoma i te tuatau o teia angaanga, ka oronga kapiti tatou i te reira ma te au makatini ou.

² Koai ka Piri Atu: Pouroa te aronga te akakitekite maroiroi nei i te tuatua meitaki ka inangaro ratou i te piri katoa atu i roto i te reira. Ka rauka tetai pae i te painia tauturu. E au tamariki me kore e aronga apiipii Pipiria ainei taau te tere meitaki ra i te pae vaerua? E tauturu ia ratou i te aravei atu i te aronga pakari kia akara me ka tau rai ratou ei au papuritia kare i papetitoia ake. Kia aere te aronga pakari i te tuatua atu ki te au papuritia paruparu kia akamaroiroi ia ratou kia piri mai, penei, na te angaanga kapiti atu anga ki te au papuritia kite.

³ Te tukunaia atu nei tetai putunga Tuatua Patireia Nu. 37 ki te au putuputuanga katoatoa kia tu te au papuritia e te au painia e 50 kopi. Te aronga te aere maira inara kare ratou i papuritia ake ka rauka ia ratou e rima kopi kia tua ki te au mema pamiri e te au taeake. Kia rekoti te katoatoa e eia a ratou i oake e kia tata atu i teia i muri ake i ta ratou au ripoti tavinianga i te openga o Okotopa e Noema. Ka tare te tekeretere i te katoatoa anga a te putuputuanga e ka ripoti atu i te reira ki te opati manga i te openga o te marama tataki tai. Te au kopi o te Tuatua Patireia tei toe mai me oti mai ana te angaanga penei ka rauka i te taangaangaia i roto i tetai ua atu tuanga o te angaanga orometua.

⁴ Te ka Tuatuaia: E tapoto i taau tuatua akamataanga, i te mea e te akatika ra te reira kia tua ateaia te karere. Penei ka karanga koe: “Ei angaanga puapinga no te katoatoa, te piri nei au i roto i tetai tua anga takapini i te ao katoa no teia karere puapinga maata. Teia taau kopi kare e tutaki. E tatau koe i te reira ine.” Penei e mea meitaki ake auraka e apai i tetai kete puka ki te au ngutupa. E akapapu kia tata i te au inangaro tei akaariia mai.

⁵ Akapeea i te Kapi i Taau Ngai Tutu Anga: E kia tua aere ua i te Tuatua Patireia i te tutu anga i te pae mataara, e tauta kia rauka ia kotou i te kapi i ta kotou ngai tutuanga mei tera are ki tera are e i te au ngai pitiniti, i ta kotou ka rauka. E tata ki raro i te au kainga e kare e tangata, e tauta i te oki akaou i tetai ora me kore e ra ke i roto i te epetoma. Akamataanga i te Monite, Noema 6, ka rauka tetai kopi i te vaooia i te au kainga e kare e tangata. Inara, me e maata rava te ngai tutuanga a te putuputuanga kia kapi ia i te tuatau i akatakaia, ka kite mai paa te aronga pakari e ka tau te Tuatua Patireia i te akarukeia i te au kainga e kare e tangata i te tuatau katoa o teia angaanga.

⁶ Te vaitata viviki maira te akapouanga o ‘Babulonia Maata.’ Te inangaroia ra te au tangata kia akaatea ke mai i vao iaia i mua ake ka takore takiriia aia. (Apo. 14:8; 18:8) E akono i te au parani i teianei kia piri katoa atu i roto i teia angaanga takapini i te ao katoa kia akakite ki te katoatoa e te vaitata maira te openga no te akonoanga pikikaa!