Mataku Kore Kareka ra kia Au Ua
1 E manganui te au tangata ta tatou e tutu aere atu ana e akakite mai ana i te au irinakianga ngakau tae tei tuke ki te tuatua mou Pipiria. I te mea e ka tutu aere tatou ma te mataku kore, ka inangaro katoaia tatou kia ‘au ua i roto i te tangata katoa nei’ e kia kopae i te akariri manako kore ua atu i te tangata. (Roma 12:18; Anga. 4:29) Akapeea tatou i te mataku kore anga kareka ra kia akamoe au ua ia tatou e oronga ra i te karere Patireia?
2 Kimi i te Au Ravenga no te Ariki Anga: E kopae ana tetai tangata akamoe au ua i te au tauetonoanga. Te patoi manako kore anga i te au irinakianga pakari a tetai tangata ngutuare kare te reira e akakeu iaia kia ariki mai i ta tatou karere. Me akakite mai aia i tetai apinga tarevake, penei ka rauka ia tatou i te tauru marie ua atu i tetai manako te ka arikiia mai. Na te akaketaketaanga i tetai apinga e irinaki kapiti ana tatou, ka rauka ia tatou i te akakore atu i tetai ua atu au manako papu kore e i te akakeu atu i tona ngakau.
3 Me tuku ua atu tatou i te manako tarevake o tetai tangata ngutuare, te aati ra ainei tatou me kore te taparuparu ra ainei tatou i te tuatua mou? Kare. Kare ta tatou angaanga ei au orometua Kerititiano, kia patoi i te au manako tarevake katoatoa ta tatou ka kite mai, mari ra kia akakitekite i te tuatua meitaki o te Patireia o te Atua. (Mata. 24:14) Auraka e riri atu me akakiteia mai tetai manako tarevake, ka rauka ia tatou i te akamanako i te reira tuatau ei atianga kia kite meitaki tatou i te manako o te tangata.—Maseli 16:23.
4 Akono i te Tu Ngateitei: E au taime tetai ka tau tatou kia mataku kore e kia maroiroi i te patoi anga i te au apiianga tarevake. Inara, ei aronga akamoe au ua, e kopae tatou i te taitoitoanga e te taangaanga anga i te au tuatua akakino i te akataka anga i te aronga te irinaki ra e te apii ra i te tarevake. Tetai tu akatietie e akaariu ke ana i te tangata, inara tetai tu araveianga akaaka e te takinga meitaki e akatuera ana i te au manako o te aronga e inangaro ra i te tuatua mou. Te akaarianga i te ngateitei no ta tatou aronga e akarongo maira e no ta ratou au irinakianga, te akono ra i to ratou tu ngateitei, tei akakeu ngoie ua i reira ia ratou i te ariki i ta tatou karere.
5 Kua akamanako te apotetoro ko Paulo i te au irinakianga a te aronga tana i tutu aere atu ei e kua kimi i te oronga atu i te tuatua meitaki na roto i tetai tu te akakeu ra i to ratou au ngakau. (Anga. 17:22-31) Kua riro mai aia ei “au mea katoa i te tangata ravarai nei,” kia “ora [iaia] tetai papaki i taua au ravenga katoa nei.” (1 Kori. 9:22) Ka rauka katoa ia tatou i te rave i te reira na te akamoe au ua anga ia tatou e tutu mataku kore ra i te tuatua meitaki.