E Akaperepere ana Tatou i ta Tatou Au Tuanga Ngateitei!

¹ I roto i te tuatau o te oraanga tangata, kua oronga a Iehova ki tana au tavini i te au tuanga ngateitei e manganui. Kua oronga aia i te au tuanga ngateitei kia ratou noatu to ratou tu, mataiti, me kore te turanga i roto i te oraanga. (Luka 1:41, 42; Anga. 7:46; Philipi 1:29) Eaa te au tuanga ngateitei tana e oronga maira kia tatou i teia tuatau?

² Tetai Au Tuanga Ngateitei a Tatou: Kua rauka ia tatou te tikaanga ngateitei e kia apiiia e Iehova. (Mata. 13:11, 15) I te akapaapaanga ia Iehova na roto i ta tatou au paupauanga i te au uipaanga putuputuanga, ko tetai tuanga ngateitei akaouia e mataora ana tatou. (Sa. 35:18) Me rauka ia tatou te au atianga kia paupau, kia rave tatou i te reira ma te maoraora. Mei te reira katoa rai, me akamanako tatou i te tukuanga angaanga tataki tai i roto i te putuputuanga ei mea akangateitei, ka rave tatou i te reira ma to tatou maroiroi katoa. E piri putuputu ana ainei tatou ki roto i te tuanga ngateitei kia tama i te Are Uipaanga Patireia e kia akono meitaki i te reira?

³ Noatu e e ekoko ana te au mirioni me te akarongo maira te Atua i ta ratou au pure, e mataora ana tatou i te tu ngateitei e te akarongoia maira ta tatou au pure e te Peretana puapinga rava atu i roto i te ao katoa e pini ua ake. (Maseli 15:29) Ko Iehova tikai te akarongo maira ki te au pure a tona au tavini. (1 Pe. 3:12) Kare aia e kotinga ana i te maata o to tatou taime i te tuatua anga kiaia. E apinga aroa akaperepere tikai ta tatou, kia rauka i te pure atu i te “au atianga ravarai”!​—Ephe. 6:18, NW.

⁴ ‘Oa Rave Angaanga no te Atua’: Ko tetai o ta tatou tuanga ngateitei koia oki ko te akakiteanga i te tuatua meitaki o te Patireia o te Atua ei ‘oa rave angaanga no te Atua.’ (1 Kori. 3:9) E angaanga teia te oronga maira i te merengo anga e te akaoraoraanga. (Ioane 4:34) Kare a Iehova e anoanoia kia taangaanga i te au tangata kia akatupu i teia angaanga, inara kua oronga mai aia i teia tukuanga angaanga ei akakiteanga o tona aroa. (Luka 19:39, 40) I te rave anga i te reira, kare a Iehova i oronga i teia tikaanga ngateitei ki tetai tangata ua. Te aronga e piri atura ki roto i te angaanga orometua ka anoanoia kia akatupu e kia akono tamou i tetai au umuumuanga tikai i te pae vaerua. (Isaia 52:11) Te akaari ra ainei tatou e te akaperepere ra tatou i teia tikaanga ngateitei na te akariroanga i te angaanga orometua ei tuanga puapinga maata o ta tatou papaanga i te au epetoma?

⁵ Te au turanga ngateitei no ko mai ia Iehova, te akamerengo ra i to tatou oraanga. (Maseli 10:22) Auraka e akapuapinga kore i te reira! Na te akaarianga e te akaperepere tikai ra tatou i ta tatou tuanga angaanga ngateitei, te akamareka ra tatou i to tatou Metua i te rangi, Tei Oronga mai i te ‘au mea memeitaki, e te au mea tika ravarai.’​—Ia. 1:17.