Akapeea te Akariro Anga te Au Oronga Anga Makatini ei Au Apiianga Pipiria
1. Eaa ta tatou akakoroanga i te oronga anga i te au makatini?
1 I te au Maanakai, e oronga ua ana tatou i te Punanga Tiaki e te Awake! makatini i roto i te angaanga orometua. Inara, ko te takainga mua ua teia ki te itaeanga i ta tatou akakoroanga no te apiianga i te aronga ngakau tika i te tuatua mou. Tei aru mai, ko tetai au tamanakoanga e akapeea i te oronga i te puka ta te Pipiria e Apii Maira i tetai atoroanga e te akamataanga i tetai apii Pipiria. Penei ka rauka teia i te akatanoia ki taau ngai tutu anga e kia akakiteia i roto i taau uaorai au tuatua. Ka rauka ia koe i te taangaanga i tetai ravenga ke atu me kua puapinga te reira kia koe.
2. Akapeea tatou i te taangaanga anga i te au kapi mua i roto i te puka ta te Pipiria e Apii Maira kia akamata i tetai apii Pipiria?
2 Taangaanga i te Au Kapi Mua: Me oki koe, ka rauka ia koe i te karanga e: “Te au makatini taku i akaruke mai kia koe, te arataki ra te manako ki te Pipiria. E akara ana e eaa i puapinga tikai ei te tatauanga Pipiria.” Tatau ia Isaia 48:17, 18; Ioane 17:3; me kore i tetai atu irava tau. E oti i muri ake i te akaarianga i te puka ta te Pipiria e Apii Maira e te oronga anga i tetai kopi ki te tangata ngutuare, ka rauka ia koe i te aru i tei taikuia i raro mai:
◼ “Te oronga maira te Pipiria kia tatou i tetai manakonakoanga tika tikai no te tuatau ki mua.” E akaari ki te ngutuare tangata i te kapi 4-5 e e ui atu e, “Ko teiea te au taputou taau e inangaro nei kia akatupuia?” E arataki atu iaia ki te pene e uriuri ra i te taputou Tuatua Tapu tana i iki mai, e e akamanako poto ua e tai me kore e rua parakarapa me ka akatika mai aia.
◼ Me kore penei ka karanga koe e, “Te pau maira te Pipiria i te au uianga puapinga rava no te oraanga.” E arataki i tona manako ki te kapi 6, e e ui atu me kua manako ana ainei aia i tetai au uianga i raro i te kapi. E uri ki te pene te oronga maira i te pauanga, e e uriuri poto ua e tai me kore e rua parakarapa.
◼ Me kore penei ka rauka ia koe i te tou atu ki te au tumu maata i roto i te papaanga i mua e e ui atu e ko teea tana tumu manako ka inangaro i te kite mai. E uri atu ki te reira pene, e e akatutu poto ua i tetai apii Pipiria.
3. Akapeea tatou i te akamata anga i tetai apii Pipiria me oronga tatou i te au makatini te akamanako ra i te (a) au turanga kino pakari atura o te ao? (e) pamiri? (nga) tu irinaki papu tikai o te Pipiria?
3 Akaruke i Tetai Uianga i te Araveianga Mua: Tetai ravenga ke atu koia oki kia akanoo i tetai papaanga i te araveianga mua no te atoro akaouanga. I muri ake i te arikianga te tangata ngutuare i te au makatini, e ui koe i tetai uianga, e e akapapu i te pau atu i te reira me atoro atu koe iaia. E tauta kia akono i tetai akanoonooanga papu tikai kia oki akaou, e kia oki akaou rai koe. (Mata. 5:37) Me oki akaou koe, e akamaara i te tangata ngutuare i te uianga, e oti e tatau e e uriuri poto atu i te pauanga mei te puka ta te Pipiria e Apii Maira. E oronga i tetai kopi kiaia kia rauka iaia i te aru mai i roto i tana puka. Ko teia tetai au akaraanga:
◼ Me te akamanako ra taau makatini i akaruke ei koe i te au turanga kino pakari atura o te ao, penei ka karanga koe e, “Me oki akaou mai au ka rauka ia taua i te uriuri i te pauanga a te Pipiria no runga i teia uianga, Eaa te au tauianga ta te Atua ka apai mai ki runga i te enua?” E akaari i te kapi 4-5 me oki akaou koe. Me kore penei ka ui koe i te uianga, “Kua akakoro ainei te Atua kia tupu te au tumatetenga?” I te oki akaouanga, e akaari i te tangata ngutuare i te parakarapa 7-8 i roto i te pene 1.
◼ Me te akamanako ra taau makatini i akaruke ei koe i te pamiri, i mua ake ka aere ei koe, penei ka ui koe i tetai uianga, “Eaa ta te mema tataki tai i roto i te pamiri ka rave kia mataora atu te oraanga pamiri?” Me oki akaou koe, e akamanako i te parakarapa 4 i roto i te pene 14.
◼ Me te akamanako ra taau makatini i akaruke ei koe i te tu irinaki papu tikai o te Pipiria, ka rauka ia koe i te ui atu i teia uianga no taau uriurianga ka aru mai, “Te tika ra ainei te Pipiria ki te apiianga taineti?” I te oki akaou anga, e akamanako i te parakarapa 8 i roto i te pene 2.
4. Eaa ta tatou ka rave me kare tetai tangata ngutuare e ariki i te puka ta te Pipiria e Apii Maira?
4 I te openga o te uriurianga tataki tai, e ui akaou i tetai uianga te ka pauia me oki akaou mai koe. Me akanooia ana tetai apii tinamou, e apii i te puka i tei papaia mei mua mai ki te openga. Akapeea me kare te tangata ngutuare e ariki i te puka ta te Pipiria e Apii Maira? Ka rauka rai ia koe i te apai ua atu i tana au makatini e kia akono i te au pukapukaanga Tuatua Tapu kiaia. Ia koe e akatupu ra i tona inangaro, penei ka ariki aia i tetai apii Pipiria i te openga iora.
5. Eaa tatou ka tauta ei kia rave maata atu i te akaruke ua anga i te au makatini ki te au tangata?
5 Penei ka akakeu Te Punanga Tiaki e te Awake! i te inangaro o tetai tangata kia kite mai i ta te Pipiria tikai e apii maira. No reira, e tauta pakari i te akamata i te au apii Pipiria ki te aronga tei ariki i te au makatini. Na roto i teia mataara, te akarongo ra tatou ki te au ikuikuanga a Iesu kia “akariro i to te pa enua katoa ei pipi . . . , ma te apii atu ia ratou.”—Mata. 28:19, 20.