Akapeea te Akanoonooanga no te Apii Puka Putuputuanga ei Tauturu Anga ia Tatou
1. Akapeea ta tatou au uipaanga e rima i roto i te epetoma ei tauturu anga ia tatou?
1 Pouroa ta tatou au uipaanga e rima i roto i te epetoma, e tuke ana i tona akanoonooanga e tona akakoroanga. Inara, e puapinga katoatoa te reira i te tauturuanga ia tatou kia ‘akono marie rai tetai ki tetai, kia akamaroiroi atu ei kia maata te aroa.’ (Ebera 10:24, 25) Eaa tetai au tuanga takake e te puapinga no te akanoonooanga no te Apii Puka Putuputuanga?
2. Eaa te au puapinga ka rauka mai mei te uipaanga anga ki tetai pupu apii puka meangiti?
2 Tauturu kia Tere ki Mua i te Pae Vaerua: Tei matauia, e meangiti atu te numero tangata e aere ana ki tetai apii puka ki te numero tangata e aere ana ki tetai au uipaanga putuputuanga ke atu. Ka mama atu i reira i te akatupu i te au akataeake anga te ka tauturu ia tatou i te pae vaerua. (Maseli 18:24) Kua tauta ainei koe i te kite mai i te katoatoa i roto i toou pupu apii puka, penei i te patianga ia ratou tataki tai kia angaanga kapiti mai kia koe i roto i te angaanga orometua? Te tauturu katoa ra te akanoonooanga no te apii puka i te akaaere apii kia kite mai i te au turanga takake o te tangata tataki tai i roto i te pupu e kia oronga i te akamaroiroianga uaorai.—Maseli 27:23.
3. Akapeea te akanoonooanga no te apii puka i te akamaroiroianga i te paupauanga e kia tae katoa mai te aronga apiipii Pipiria?
3 Kua pati ainei koe i taau aronga apiipii Pipiria kia aru mai ia koe ki te apii puka? Penei, te aronga e emiemi ana i te aere mai ki ta tatou au uipaanga maata, kare e mataku roa ana i te aere mai ki tetai uipaanga meangiti mai, i roto tikai i tetai ngutuare. No te turanga oaoa, ka ngoie ua te au tamariki e te aronga ou kia piri mai ki roto i te paupauanga. E i te mea e meangiti ua te pupu, e maata atu to tatou au taime i te paupau e te akapaapaa ia Iehova.—Sa. 111:1.
4. Na roto i teea au tu e meitaki ei te akanoonooanga no te apii puka?
4 Tei matauia e raveia ana te au apii puka i te au ngai vaitata ua atu i roto i te au ngai tutu anga. I te mea e kare e rauka i te tuku i te katoatoa ki te ngai vaitata atu kia ratou, penei i te aere anga ki te apii puka i akanooia ai tatou, kare e mamao roa ana i te aere me akaaiteia ki te aere anga ki tetai au uipaanga ke atu. Penei ka rauka katoa te ngai o te apii puka i te taangaangaia ei ngai uipaanga meitaki no te angaanga tutu anga.
5. Akapeea e rauka ai ia tatou te tauturu i roto i te angaanga orometua mei to tatou akaaere apii puka?
5 Tauturu no te Angaanga Orometua: Te inangaro ra te akaaere apii puka i te tauturu i te tangata tataki tai kia putuputu, kia puapinga e kia mataora to ratou piri anga ki roto i te angaanga orometua. No reira, ka tauta aia i te angaanga kapiti atu ki te katoatoa i roto i te pupu, i te oronga anga i te tauturu uaorai i roto i te au tuanga tukeke o te angaanga orometua. Me te kite maira koe i tetai tuanga o te angaanga orometua ei akaaoanga tikai, mei te akonoanga i te au atoro akaouanga, e akakite atu koe ki toou akaaere apii puka. Penei ka akanoo aia kia angaanga kapiti atu koe ki tetai papuritia tukatau i roto i te pupu. Toou kite i te apiianga i te au apii Pipiria, ka meitaki atu na te akamanako meitakianga i te au ravenga apiianga meitaki a te akaaere apii puka iaia e akono ra i te apii puka.—1 Kori. 4:17.
6. Eaa tatou ka kimi atu ei kia puapinga maataia mei te akanoonooanga o te puka apii?
6 E aka akameitakianga tikai te Apii Puka Putuputuanga! Teia akanoonooanga takinga meitaki mei ia Iehova, te tauturu ra ia tatou kia akono tamou i to tatou takainga papu i te pae vaerua i roto i te au tuatau ngata e noo nei tatou.—Sa. 26:12.