Akamaata Atu i ta Tatou Angaanga Orometua
1 Kua ako te apotetoro ko Paulo i te au Kerititiano kia aaere na te arataa o te Atua e ‘kia maata atu rai i te akapera anga.’ (1 Tesa. 4:1) Eaa te aiteanga o teia kia tatou? Ko tetai apinga koia oki kia kimi ua atu rai tatou i te au ravenga kia aruaru maata atu i te au angaanga pae vaerua, i te tautaanga ua rai kia “rave akaope takiri” i ta tatou angaanga orometua.—2 Timo. 4:5.
2 Akakeuanga: I te aruaru maata atu anga i roto i ta tatou angaanga orometua, kua akakeuia to tatou inangaro kia tavini pu tikai i Tei Anga mai ia tatou. Ka inangaro tatou kia tupu atu i te pae vaerua e kia kimi i te au ravenga kia akameitaki atu i ta tatou angaanga orometua. Ka tauturu tetai papaanga meitaki ma te akakeuanga tau ia tatou kia itae atu i te au akakoroanga teokaratiki.—Sa. 1:1, 2; Philipi 4:6; Ebera 10:24, 25.
3 I te tautaanga i te akamaata atu i ta tatou angaanga orometua, te umuumuia ra e kia tatanu tatou i tetai tu oronga e te akaatinga uaorai. Ka rauka te reira tu i te tatanuia na te akamanako oonuanga ma te pure i te akaraanga meitaki o Iesu. (Mata. 20:28) Kua rauka ia Iesu i te rekareka maata mei te tavinianga i tetai ke i roto katoa i tana angaanga orometua. (Anga. 20:35) Ka rauka ia tatou i te aru ia Iesu na te akaarianga i te inangaro uaorai i roto i te au tangata e kia kite meitaki i te au atianga kia aruaru maata atu i roto i ta tatou angaanga orometua.—Isaia 6:8.
4 Tuanga a te Au Metua: Tetai inangaro kia tavini atu i tetai ke e kia akamaata atu i ta tatou angaanga orometua, ka rauka i te tatanuia i roto i te au tamariki i te varevare anga mai. Ka kite mai te au tamariki i te maroiroi o te au mema pamiri e to ratou piri maroiroi anga i te akamaata atu anga i ta ratou angaanga orometua. Kua akakeuia tetai taeake kia aruaru maata atu mei tona meangiti anga mai no te angaanga kapiti atu anga ki tona papa ruau i roto i te au angaanga teokaratiki. I te kiteanga i te maroiroi e te mataora o tona papa ruau, kua akakeuia aia kia kimi i te au atianga kia tavini atu i tona au taeake. E tavini tauturu aia i teianei.
5 Anoanoia te Au Taeake: Kia aruaru maata atu tetai tangata i tetai taoonga akaaere, te inangaro ra aia i te angaanga meitaki. (1 Timo. 3:1) Te akamaroiroi nei teia au tuatua i te au taeake kia aruaru maata atu kia tau no te au angaanga takake i roto i ta Iehova akaaerenga. I te rave anga i te reira, kare e umuumuia te au tu kite karape umere tikai. Tetai taeake e aruaru maata atura, ka kimi aia na mua i te Patireia e ka piri maroiroi katoa ki roto i te angaanga orometua. (Mata. 6:33; 2 Timo. 4:5) Ka tauta aia kia riro mai ei akaraanga meitaki no tetai ke.
6 I te Ao Katoa: Te akarapurapu nei a Iehova i te akaputuputuanga. (Isaia 60:22) E anoano rapurapu tetai no te aronga katoatoa e aru ra i te akaraanga o Iesu kia angaanga maata atu i roto i ta ratou angaanga orometua. Te akaari maira te ripoti takapini i te ao katoa no te mataiti tavinianga 2006 e e 248,327 tei papetitoia. Te akatutu maira te reira e 680 aronga ou e tere atu i te avereti i te au ra ravarai! Kia tauta ua atu rai tatou katoatoa kia kimi i te au ravenga kia angaanga maata atu ki roto i ta tatou angaanga orometua.