Akapumaana i te Aronga Ngakau Mamae
1 Kare atu e tuatau ke i roto i te tuatua enua o te tangata nei tei anoanoia kia oronga i te akapumaana. I te aruanga i te aratakianga a to tatou Ariki, ia Karaiti ko Iesu, te tauta katoa ra tatou i te akaora “i te aronga ngakau mamae ra.”—Isa. 61:1, NW.
2 Ravenga: Ei akapumaana i te au tangata, kia akatutuia ta tatou angaanga orometua e tetai oronga anga tau meitaki e te akamaroiroianga. Me poto ua ta tatou au uriurianga no runga i te au angaanga kino i te ao nei e te au apiianga pikikaa, ko te tuatua mou o te Tuatua Tapu e te manakonakoanga mataora o te au taputou pumaana a te Atua, te apinga maataia i roto i ta tatou pukapukaanga. Kare te aiteanga e kare e tau kia uriuriia a Aramakito. Ta tatou angaanga koia oki kia akakite i “te mataiti inangaroia e Iehova, e te rā akaoko anga na to tatou Atua,” e kia akamatakite “i te tangata kino i tona ra aerenga kino.” Inara, te akamatakiteanga no Aramakito e te akatakaanga o te reira au tupuanga kino kare e anoanoia kia akaaveave i te tumu tuatua maata o te tuatua meitaki o te Patireia o te Atua.—Isa. 61:2; Eze. 3:18; Mata. 24:14.
3 I te Au Ngutupa: E mea matauia i te kite i te au tangata tei taitaia no te maki, te mate o tetai tangata akaperepereia, te au tu tika kore, me kore te au manamanata i te pae moni. Ei aronga aru ia Karaiti, te akakeuia ra tatou e te “aroa” kia akaari i te tu tangi ki te aronga ta tatou e aravei ra i roto i te angaanga orometua. (Luka 7:13; Roma 12:15) Noatu e kua oronga tatou e tai me kore e rua irava no runga i te manamanata, kia ‘rapurapu tatou i te akarongo,’ i te tuku anga i reira i te tangata kia akakite mai i tona au manako. (Iako. 1:19) I muri ake i te akarongo anga na mua, ka papa meitaki atu tatou i te oronga i te akapumaana.
4 I tetai tuatau tau i roto i te pukapukaanga, penei ka karanga tatou e, “Te inangaro nei au i te akaari atu kia koe i tetai au tuatua akamaroiroi mei te Pipiria.” Kia akono i te akamanakoanga meitaki e auraka e patoi i te au manako tarevake pouroa ta te tangata ka akakite mai. Mari ra, to tatou akakoroanga, koia oki kia oronga i te akamaroiroi e te akapumaana na te taangaanga anga i te au Tuatua Tapu i te akaketaketa i te ngakau. No runga i te reira, ka rauka ia koe i te akara i te Reasoning From the Scriptures kapi 117-121 i raro i te tumu manako “Encouragement.” Me kore penei ka oronga koe ki te tangata ngutuare i tetai kopi o te vaanga pepa Pumaana Anga no Tei Taitaiaia e e uriuri i te manako akamaroiroi i roto i te reira.
5 Kimi te Au Atianga kia Akapumaana: Kua kite ainei koe i tetai tangata tupu, oa angaanga, oa apii, me kore tetai mema pamiri te anoano ra kia akapumaanaia? Kore koe e tauta i te atoro atu i te reira aronga i to ratou kainga ma te akakoroanga i te oronga i te akapumaana mei te au Tuatua Tapu? I te kiteanga i te tumu e anoano ra ratou i te pumaana, ka rauka ia koe i te akapapa no te reira turanga tikai. No runga i te reira, kua tata tetai pae i te au reta me kore kua ringi atu ia ratou. Te aroa mou tikai no te tangata tupu, ka akakeu ia tatou kia oronga i te akapumaana anoanoia mei te au Tuatua Tapu.—Luka 10:25-37.
6 Ae, te akaueia ra tatou kia akapumaana i te aronga mii, kia akaoraora i te au ngakau maromaroa, e kia tatanu i te manakonakoanga no tetai tuatau mataora ki mua. Ko te pumaana teia ta te au tangata takapini i te ao nei e anoano ra. Na te pukapuka mataora anga no runga i te au mea meitaki e manganui ta te Atua i taputou, ka oronga mai i te akapumaana e te manakonakoanga ki te aronga ngakau tika. Kia maara ua rai ia tatou te anoano kia rapakau i te aronga ngakau mamae ra.