Kua Tau Ainei Au i te Tutu Aere?
1. Eaa ra tatou ka kore ei e manako e kare tatou e tau no te tutu aere?
1 Me kite mai koe ia koe uaorai e ui ra i tera uianga, eiaa e manamanata! Kare no te apiianga e kare katoa e no te tu karape natura i akariro ia tatou ei au orometua tau. Kua akatakaia mai tetai au pipi mua e e aronga ‘apii koreia e te kite kore.’ Noatu ra, e aronga tukatau ratou i te tutu aere i te tuatua meitaki no te mea kua tauta ratou i te aru i te akaraanga tei akanooia e Iesu.—Anga. 4:13; 1 Pete. 2:21.
2. Eaa tetai au tu o ta Iesu apiianga?
2 Ta Iesu i Apii: Mama ua tana apii, akatumuia ki runga i te tu tika tikai, e te ngoie ua i te marama atu. Tana au uianga, te au akatutuanga, e te au akamataanga ngoie ua te akaariu maira i te manako o te aronga e akarongo maira. (Mata. 6:26) Kua akaari aia i te tu inangaro tikai i te tangata. (Mata. 14:14) Pera katoa, kua tuatua a Iesu ma te irinaki papu e te mana i te kite anga e na Iehova i akaue e i akamana iaia kia rave i tana tukuanga angaanga.—Luka 4:18.
3. Akapeea a Iehova i te tauturu anga ia tatou kia akatupu i ta tatou angaanga orometua?
3 Tauturu a Iehova ia Tatou: Na roto i tana Tuatua e te akaaerenga, te oronga maira to tatou Pu Ikuiku Maata Rava Atu i te terenianga ka inangaro tatou no te tutu meitaki aere anga i te tuatua meitaki. (Isa. 54:13) No te mea kua akono a Iehova i tetai rekoti no runga i te tu i apii ei a Iesu, ka rauka ia tatou i te akara e te aru i tana au ravenga. Te oronga maira a Iehova i tona vaerua tapu e te tereni ra ia tatou na roto i te au uipaanga a te putuputuanga. (Ioa. 14:26) Pera katoa, te oronga maira aia i te au papuritia tukatau ei ia tatou kia tukatau meitaki atu.
4. Eaa te tumu i manako ei tatou e ka tau tatou kia oronga atu i te tuatua meitaki ki etai ke?
4 E tumuanga to tatou kia manako e kua tau tatou i te tutu aere, no te mea ‘no ko mai i te Atua ra to tatou tika.’ (2 Kori. 3:5) Ia tatou e irinaki ra ki runga ia Iehova e te taangaanga akarongo mou i tana au orongaanga aroa, ‘ka mako, e ka papa tikai tatou no te au angaanga meitaki ravarai.’—2 Timo. 3:17, NW.