Teatea te Au Koro no te Mou
1. Eaa te angaanga puapinga e raveia ra?
1 Muri ake i te akakitekite anga ki te vaine Samaria, kua akakite a Iesu ki tana au pipi e: “Ka akateitei i to kotou mata, ka akara i te au koro ra; kua teatea ïa i teianei kua mou.” (Ioa. 4:35, 36) Kua raveia tetai kokotianga pae vaerua, e kua kite mamao atu a Iesu i taua angaanga e totoa ra ki te ao katoa e pini ua ake. Mei tona turanga i te rangi, te o maata maira a Iesu ki roto i te kokotianga. (Mata. 28:19, 20) Eaa te au akaarianga e ka maata atu teia angaanga e vaitata atura ki te take o te reira?
2. Eaa te au tupuanga e akaari maira e te maata atura te angaanga kokotianga i te ao e pini ua ake?
2 Kokotianga i te Ao Katoa: I te mataiti tavini anga 2009, kua maata e 3.2 patene papuritia i te ao katoa nei. Kua maata te numero e 14 patene i roto i te au enua e tapupuia ra te angaanga tutuanga. Te numero o te apii Pipiria i te kainga tei ripotiia i te au marama kua tere atu i te 7,619,000—e numero maata atu i te take o te papuritia, e e vaitata e apa mirioni te maata atu i te numero o te au apii tei ripotiia i te mataiti i topa. I te angaanga e totoa viviki atura i roto i te au oire, te maata maira te au patianga no te au mitinari tereniia i Gileada. Te riro ra te au ngai tutuanga i roto i te reo ke ke ei tupuanga maata i roto i te au enua e manganui. Kitea uaia e, te taviviki nei a Iehova i te angaanga i te openga o te kokotianga. (Isa. 60:22) E manako papu ainei toou i taau “koro”?
3. Eaa ta tetai aronga ka taopenga no te kokotianga i roto i ta ratou koro?
3 Taau Ngai Kokotianga: “Kare te tangata e ariu mai ana i roto i taku ngai tutuanga,” penei ka karanga tetai aronga. Tika rai, kare tetai au ngai tutuanga e puapinga roa ana mei tetai atu, me kore e uua rao ana mei mua atu ana. Penei ka taopenga tetai Au Kite e kua taea te take o te kokotianga i roto i taua au ngai ra, e i teianei kua akaitiia mai ta ratou angaanga ki te akaputuputu ua i te aronga e toe nei. Te reira tikai ainei te tupu ra?
4. Eaa te manako tau no ta tatou angaanga orometua ka tau tatou kia tatanu, e eaa te tumu?
4 Mei te akamataanga e tae atu ki te openga, e taime angaanga pakari tikai te kokotianga. Akara ana i te tu rapurapu i roto i teia au tuatua a Iesu e: “Te maata ua nei te mou, te iti nei ra te aronga e kokoti: E teianei, e pure kotou i te Atu o te mou, kia unga mai aia i tetai aronga ei rave i taua mou nana ra.” (Mata. 9:37, 38) Na Iehova te Atu o te mou, te apainga i te akakite e aea, e iea e tupu ei te kokotianga. (Ioa. 6:44; 1 Kori. 3:6-8) Eaa ra ta tatou tukuanga angaanga? Te pau ra te Pipiria e: “Ei te popongi ka ruru ei i taau ua, e ei te aiai auraka e tāpu ua i to rima.” (Kohe. 11:4-6) Ae, kare te taime e vaitata atura te kokotianga ki tona take, i te taime no te tapu i toou rima!
5. Eaa tatou ka tutu aere ua atu ei ma te maroiroi i roto i te ngai tutuanga kare te tangata e ariu roa mai ana?
5 Kokoti Ua Atu Rai: Noatu e e kapi putuputuia ana ta tatou ngai tutuanga, e mei te mea e kare te tangata e ariu mai ana, e tumu meitaki kia angaanga maroiroi e kia akamanako i te tu rapurapu. (2 Timo. 4:2) Te au akatukeanga mamaata i roto i teianei ao te akariro ra i te tangata kia taui i to ratou tu e kia akamanako pakari i te tuatau ki mua. I te au mapu e mamaata maira, penei te manako ra ratou no te kimi i te tu tinamou e te tu au o te manako. Penei ka marekaia ta tatou tautaanga maroiroi e etai ke. Ae, penei ka akarongo mai te aronga kare i akarongo mai ana i mua ana, e ka ariu mai. Inangaro katoaia te aronga e patoi akakoro maira i ta tatou karere, kia akamatakiteia.—Eze. 2:4, 5; 3:19.
6. Me e ngata tikai ta tatou ngai tutuanga, eaa te ka tauturu ia tatou kia maroiroi ua atu?
6 Me e ngata tikai ta tatou ngai tutuanga, eaa te ka tauturu ia tatou kia akamaroiroi ua atu? Penei ka rauka ia tatou te taui i te angaanga tutuanga mei tera are ki tera are ki tetai atu au tu angaanga orometua, mei te akakitekite anga i te ngai pitiniti me kore i runga i te terepaoni. Me kore e akatuke i ta tatou orongaanga kia rauka te tuatuaanga ou. Penei e taui i ta tatou papaanga e e tutu aere i te aiai me kore i tetai atu taime tei te ngutuare te tangata. Penei ka rauka ia tatou te apii i tetai reo ou kia rauka i te itae maata atu i te tangata ki te tuatua meitaki. Penei ka rauka ia tatou kia akamaata atu i ta tatou angaanga orometua na te painia tamou anga. Me kore ka neke tatou ki tetai ngai e iti ua te aronga kokoti. Me te tau ra to tatou manako no te kokotianga, ka aruaru tatou kia rave pu tikai i te ka rauka i roto i teia angaanga puapinga.
7. Eaa te roa ia tatou i te rave ua atu anga i te angaanga akaputuputu anga?
7 E poto ua te tuatau o te au pama i te kokoti i ta ratou kai, no reira kare ratou e akangaroi me kore e rave marie i te angaanga e oti ua atu. Te umuumuia ra taua tu rapurapu ra no te kokotianga pae vaerua. Aea tatou e rave ua atu ei i te angaanga akaputuputu anga? I te tuatau o “te openga o te akatereanga o te au mea nei” e tae ua atu ki “te openga.” (Mata. 24:14; 28:20, NW) Mei te Orometua puapinga maata o Iehova, ka inangaro tatou i te akaoti i te angaanga tei orongaia mai kia tatou. (Ioa. 4:34; 17:4) No reira kia rave ua atu rai tatou i ta tatou angaanga orometua ma te maroiroi, rekareka, e te tu papu e tae ua atu ki te openga. (Mata. 24:13) Kare te kokotianga i oti ake!
[Tataanga i te kapi 2]
Mei te akamataanga e tae atu ki te openga, e taime angaanga pakari tikai te kokotianga