Akaari i te ‘Ngakau Aroa Maru’
1. Eaa ta te au tangata e anoano maata nei i teia tuatau?
1 Maata te au tangata e anoano maata nei i te tauturu aroa takinga meitaki, tei kare rava i tupu ana i roto i te tuatua enua i mua ana. No te au turanga kino tikai o teianei ao, kua tupu maata mai te au manako maromaroa, taitaia e te puapinga kore. E mirioni ua atu te inangaro ra i tetai tauturu, no reira ka anoanoia tatou ei au Kerititano kia manako tikai atu i to tatou au tangata tupu. (Mata. 22:39; Gala. 6:10) Akapeea me akaari i taua tu manako ra?
2. Eaa te mataara meitaki atu kia akaari tatou i te aroa takinga meitaki?
2 Akaari i te Aroa Takinga Meitaki: Ko te Atua anake ua te tumu o te akapumaana mou e te mutu kore. (2 Kori. 1:3, 4) Kua raurau mai a Iehova ia tatou kia aru iaia na te akatupu anga i te ‘ngakau aroa maru,’ e kua oronga mai aia i te akaueanga kia akakite i te tuatua meitaki o te Patireia ki to tatou au tangata tupu. (1 Pete. 3:8) Ko te mea meitaki rava atu ko te piri maroiroi anga ki roto i teia angaanga, kia akapumaana i “te aronga ngakau paruparu,” no te mea ko te Patireia anake ua o te Atua te manakonakoanga tika tikai no te au tangata e mamae ra. (Isa. 61:1) Kare e roa atu ka takore a Iehova i te au kino e ka akatupu i tona ao ou tuatua tika, no tona aroa takinga meitaki i tona iti tangata.—2 Pete. 3:13.
3. Akapeea tatou me manako atu i te tangata mei ta Iesu rai e manako ra?
3 Manako i te Tangata mei ta Iesu e Manako Ra: Te tutuanga ki te urupu maata, kua akamanako a Iesu i te tangata tataki tai. Kua kite aia i te au anoano pae vaerua o te tangata tataki tai. Mei te au mamoe rai ratou kare e tiaki ei arataki ia ratou. Kua akakeuia a Iesu e tana i kite atu, e kua inangaro aia i te apii ia ratou ma te akakoromaki. (Mare. 6:34) Me manako tatou i te au tangata mei ta Iesu e manako ra, ka akakeuia tatou kia akaari i te aroa ngakau tae ki te tangata tataki tai. Ka kiteaia mai teia na roto i ta tatou tuatua e to tatou tutu mata. Ka riro te tutuanga ei mea puapinga kia tatou, e ka akatanotano tatou i ta tatou au tuatua kia tau ki te au manamanata o te tangata tataki tai.—1 Kori. 9:19-23.
4. Eaa ra tatou ka aru ei i te aroa takinga meitaki?
4 Te ariu meitaki maira te urupu tangata mei te au enua ravarai ki te karere o te Patireia e te akaari maira i te inangaro. Ia tatou e aru ra i te tu aroa takinga meitaki, ka akangateitei e ka akamareka tatou i te Atua aroa takinga meitaki ko Iehova.—Kolo. 3:12.