Ta Tatou Au Makatini—Maaniia kia Rekaia e te Au Tangata
1. Akapeea te pupu tavini akono meitaki e te pakari i te aru anga i te apotetoro ko Paulo?
1 Mei ta te apotetoro ko Paulo i akatanotano i te tu i te oronga anga aia i te tuatua meitaki kia rauka i “te tangata ravarai nei,” kua taangaanga te pupu tavini akono meitaki e te pakari kia itae i te au tangata e tukeke te au turanga e te au irinakianga. (1 Kori. 9:22, 23) E rauka ai ia tatou i te taangaanga meitaki i Te Punanga Tiaki e te makatini E Ara! e mea meitaki kia akamaara i te aronga ka tatau i teia au makatini.
2. Kua maaniia te makatini E Ara! kia rekaia mai e ai ma?
2 E Ara!: Kua akakoroia teia makatini kia itae i taua au tu tangata ra mei ta te apotetoro ko Paulo e tuatua ra e ko te “au tangata Atene nei.” (Anga. 17:22) Kare taua au tangata ra i te au Kerititiano, e kare ratou e marama roa ana i te au Tuatua Tapu. Kare katoa te aronga tatau i te makatini E Ara! i marama i te Pipiria. Kare a ratou apinga i kite no runga i te au apiianga a te Kerititiano, kare e irinaki ana i te akonoanga e kare e kite ana i te puapinga o te Pipiria. Te akakoroanga maata o te makatini E Ara! kia akapapu ki te aronga tatau e te vai nei te Atua mou. Te akakoroanga katoa o teia tianara, kia akamaroiroi i te akorongo ki roto i te Pipiria e kia tauturu i te aronga tatau kia marama e e tuke rai te Au Kite o Iehova mei tetai atu au pupu akonoanga.
3. Eaa te akakoroanga o te aronga tatau o te nga makatini o Te Punanga Tiaki?
3 Te Punanga Tiaki: Te akakoroanga o te tuanga a te papuriki no teia makatini, no te aronga tatau kia akangateitei i te Atua e te au Tuatua Tapu. Kua kite ratou i tetai ngai o te Pipiria, inara kare ratou e marama ana i te au apiianga tika tikai i roto i reira. Aiteite rai ki te aronga ta Paulo i taiku ra e ko tei “mataku i te Atua.” (Anga. 13:14-16) Kua tataia te tuanga apii o Te Punanga Tiaki na te Au Kite o Iehova. Kua manako a Paulo e kua kite te aronga i tatau i tana au reta i te au Tuatua Tapu e kua kite tika tikai i te tuatua mou. (1 Kori. 1:1, 2) Kua tata katoaia te au atikara i roto i te tuanga apii no te aronga te aere maira ki ta tatou au uipaanga e kua marama i te au tuatua e te au manako o te Au Kite.
4. Eaa ra tatou ka anoanoia ai kia kite meitaki i te nga makatini ka taangaanga tatou i te ngai tutuanga?
4 Noatu e ka oronga kapiti tatou i te nga makatini, ka akaari ua ra tatou e tai makatini i roto i ta tatou orongaanga. No reira, kia kite meitaki i te au mea i roto i te nga makatini. Ka tukatau meitaki koe i reira i te akaari i te makatini ka reka mai te aronga ka aravei atu koe.