Au Kite o Iehova—Akaaereia kia Akakitekite i te Tuatua Meitaki
Tere atu i te 100 mataiti, te akaaereia anga te Au Kite o Iehova kia akakitekite i te tuatua meitaki. Tei riro mai ei kamupeini tutuanga maata rava atu tei kiteaia ana i teianei ao, te tuatua nei tatou i teia karere i roto i te au anere reo e tere atu i te 230 enua. (Mata. 24:14) Eaa ra teia angaanga ka anoanoia ai? Akapeea teia te akatupuia anga i te ao katoa? Te pau ra te vitio Jehovah’s Witnesses—Organized to Share the Good News i te nga uianga na te akamarama mai anga i ta tatou au angaanga takapini i te ao nei. Muri ake i te akara anga i te vitio, e akamanako i te au uianga e aru mai nei.
Akapeea teia vitio i te akamaata anga i toou ariki rekareka no te (1) tautaanga a te akaaerenga a Iehova kia akakitekiteia te tuatua meitaki? (2 Timo. 4:2) (2) au pamiri Betela takapini i te ao? (3) apii anga i te au mitinari e te au akaaere? (2 Timo. 2:2) (4) puapinga i te akamata anga i te au ra na te akamanako anga i te irava Pipiria, e te akapapa anga no te au uipaanga a te putuputuanga i te au epetoma? (Anga. 17:11) (5) puapinga no te aere anga ki ta tatou taokotaianga Kerititiano? (Ebe. 10:24, 25) (6) au akameitakianga ka rauka ia koe me akatupu akaouia te Parataito ki te enua nei? (Isa. 11:9) (7) tikaanga ngateitei tei rauka ia koe kia piri atu ki te angaanga kokotianga?—Ioa. 4:35.
E apinga meitaki tikai teia vitio kia kite meitaki te aronga tei akaari mai i te inangaro i te angaanga tei raveia e te Au Kite o Iehova i te ao katoa. (8) Eaa te tuatau meitaki no te akaari anga i te vitio ki ta tatou aronga apii Pipiria, te kopu tangata e tetai ke? (9) Akapeea te tangata te ariu mai anga toou akaari anga i te reira kia ratou?
Ia tatou e akamanako ra i ta Iehova e akatupu ra, ka akakeu ia tatou kia tuatua i teia au tuatua a te tata taramo e: “E manganui, e taku Atua, e Iehova, te au angaanga taka ke i raveia e koe ra, e toou ra manako ia matou nei: kare e tika kia tatau ua atu ki mua ia koe na.” (Sala. 40:5) E taangaanga meitaki tatou i teia vitio i te tauturu i tetai ke kia ariki rekareka ia Iehova e tana akaaerenga!