Akaperepere i Taau Tavinianga Ngateitei

1. Eaa te manako o te manganui o teianei ao no runga i ta tatou angaanga tutuanga?

¹ Manganui i roto i to Satani ao e manako ana i ta tatou angaanga tutuanga ei mea “neneva.” (1 Kori. 1:18-21) Me kare tatou e matakite, ka akatupu teia tu manako ia tatou kia paruparu e kia iti mai te maroiroi. (Mase. 24:10; Isa. 5:20) Eaa te au tumu kia akaperepere tatou i to tatou turanga ngateitei ei Au Kite no Iehova?​—Isa. 43:10.

2. Eaa ra te angaanga orometua i kapikiia ai ei “angaanga tapu”?

² E “Angaanga Tapu”: Kua taiku te apotetoro ko Paulo i te angaanga orometua ei “angaanga tapu.” (Roma 15:15, 16, NW) Akapeea i riro ei te angaanga orometua ei “angaanga tapu”? Na te rave anga i te reira kua riro tatou ei “oa rave angaanga” no ‘Tei Tapu,’ ko Iehova, e te turuturu anga i te akatapuanga i tona ingoa. (1 Kori. 3:9; 1 Pete. 1:15) Te manako maira a Iehova i ta tatou angaanga tutuanga ei ‘atinga akameitaki anga,’ no reira e tuanga puapinga tikai ta tatou akamorianga.​—Ebe. 13:15.

3. Eaa ra i riro ei te tutuanga i te tuatua meitaki ei akangateiteianga maata?

³ E akangateiteianga tikai te tutuanga i te tuatua meitaki ta tetai pupu tangata meangiti e mataora ra i te rave. Ka mataora te au angera i te rave i teia angaanga, papu e ka rave meitaki ratou i te reira. (1 Pete. 1:12) Inara, kua iki a Iehova ia tatou te au tangata apa, “te āriki karakaraea,” no teia tikaanga ngateitei umere tikai!​—2 Kori. 4:7.

4. Akapeea tatou me akaari e te akaperepere ra tatou i te angaanga orometua?

⁴ E Mea Puapinga: No te mea te akaperepere tikai nei tatou i teia tikaanga ngateitei, te manako nei tatou i te angaanga orometua ei “au mea e maata ua atu te meitaki” i roto i to tatou oraanga. (Phili. 1:10) No reira, e akapapa tatou i tetai taime i te au epetoma kia piri atu ki te reira. Ko tetai tangata akatangi imene te akaperepere ra i tona tikaanga ngateitei i te akatangi anga i roto i tetai pupu akatangi imene rongonui o teianei ao, ka akapapa aia i te au taime ravarai e ka akamaata atu i tona tu karape. Ka akapapa katoa rai tatou i mua ake ka aere ei ki te angaanga orometua kia rauka ia tatou i te ‘rave tika i te tuatua mou,’ e ka akameitaki mai tatou i ta tatou ‘apii karape anga.’​—2 Timo. 2:15; 4:2.

5. Koai ma te ariki meitaki maira i ta tatou angaanga orometua?

⁵ Eiaa e akatika i te manako o te maata anga o te tangata kia akaparuparu ia koe. Kia maara e e manganui i roto i ta tatou ngai tutuanga te ariki rekareka maira i ta tatou atoro anga. Inara, kare tatou e kimi ra i ta te tangata ariki anga. Te mea puapinga roa atu to Iehova manako, e te akaperepere maata maira aia i ta tatou tauta anga maroiroi.​—Isa. 52:7.