Te Apii ra Ainei Koe i Taau ka Rauka mei ia Iehova?

1. Eaa to Iehova manako no runga i te apiianga?

¹ Te inangaro ra a Iehova, to tatou “Pu Ikuiku Maata Rava Atu” ia tatou kia apiiia. (Isa. 30:20, NW) Kua akamata aia i te apii i muri ake te anga mai anga aia i tana Tama mua. (Ioa. 8:28) Muri ake i to Adamu meameaau anga, kare a Iehova i akamutu ana i te apii, inara kua oronga aroa ua mai aia i te ikuikuanga no te au tangata apa kore.​—Isa. 48:17, 18; 2 Timo. 3:14, 15.

2. Eaa te apiianga kamupeini e raveia nei?

² Teia tuatau, te arataki nei a Iehova i tetai apiianga kamupeini maata rava atu i roto i te tuatua enua. Mei tei totouia e Isaia, mirioni ua atu takapini i teianei ao te aere ra ki te ‘maunga akatutu ra o te are o Iehova.’ (Isa. 2:2) Eaa ra tatou ka aere ei ki reira? Kia apiiia i to te Atua au arataa, ae, kia apiiia mai e Iehova! (Isa. 2:3) Te tuatau o te mataiti tavini anga 2010, kua akapou te Au Kite o Iehova tere atu i te 1.6 pirioni ora no te tutu anga e te apii anga i te tuatua mou Pipiria ki te au tangata. Kapiti mai, te oronga anga i te ikuikuanga pae vaerua i te au epetoma ki te 105,000 tuma putuputuanga i te ao katoa, e te puka apii Kerititiano tei na roto mai i te tavini akono meitaki e te pakari i roto i te 500 tuma reo.

3. Akapeea koe te puapingaia anga mei te apiianga ta Iehova i oronga mai?

³ Puapinga Tikaiia: Te puapinga tikaiia nei tatou mei teia apiianga a te Atua! Kua apii tatou e e ingoa to te Atua e te manako tikai maira aia ia tatou. (Sala. 83:18; 1 Pete. 5:6, 7) Kua kite mai tatou i te au pauanga no tetai au uianga puapinga roa atu no te oraanga: Eaa te au tangata i mamae ei e i mate ei? Akapeea e rauka ai iaku te mataora tika tikai? Eaa te akakoroanga o te oraanga? Kua oronga katoa mai a Iehova i te aratakianga akono tau kia tatou kia ‘meitaki to tatou aerenga.’​—Iosu. 1:8.

4. Eaa tetai au apiianga puapinga ka rauka i te au tavini o te Atua, e eaa ra tatou ka apii ei i ta tatou ka rauka mei ko mai ia Iehova?

⁴ Te oronga katoa maira a Iehova i te au apiianga puapinga ei tauturu i tetai o tona au tavini kia akamaata atu i te tavinianga iaia. Tei roto i te kapi 4-6 tetai papaanga no te reira. Noatu e kare to tatou au turanga e akatika ana ia tatou kia rave i teia terenianga tei papaia mai, te rave maroiroi ra ainei tatou i te apiianga a te Atua e rauka maira no tatou? Te akamaroiroi ra ainei tatou i te au mapu, te akaanga ke ia ra e te au puapii e tetai ke kia aruaru i te apii teitei o teianei ao, kia akanoo i te au akakoroanga pae vaerua, eiaa te apiianga teitei, mari ra te apiianga a te Atua? Te apiianga i ta tatou ka rauka mei ko mai ia Iehova, ka tauturu ia tatou kia rekareka i tetai oraanga mataora i teianei e a te tuatau ki mua e mutu kore ua atu.​—Sala. 119:105; Ioa. 17:3.

Tetai Au Apiianga Puapinga mei taIehova Akaaerenga

Au Apii no te Tatau e te Tata

• Akakoroanga: Ei apii i te au tangata kia kite i te tatau e te tata e kia rauka ia ratou i te rave i tetai apii Pipiria e te apii atu i te tuatua mou ki tetai ke.

• Te Roa: Kia tau ki tei anoanoia.

• Te Ngai: Are Uipaanga Patireia i te reira ngai.

• Koai Ma ka Piri Atu: Pouroa te au papuritia e te aronga e inangaro ra.

• Akapeea me O Atu: Ka akanoonoo te aronga pakari o te putuputuanga i te apii no te tatau e te tata kia tau ki tei anoanoia, e ka akamaroiroi ratou i te katoatoa ka tae mai kia puapingaia.

Apii Orometua Teokaratiki

• Akakoroanga: Kia tereni i te au papuritia kia riro mai ei aronga tutu aere e te au puapii tukatau no te tuatua meitaki.

• Te Roa: Ka rave uaia atu rai te reira.

• Te Ngai: Are Uipaanga Patireia i te reira ngai.

• Koai Ma ka O Atu: Au papuritia katoatoa. E te aronga katoa te piri maroiroi ra ki te putuputuanga, te ariki ra i te au apiianga a te Pipiria, e te rotai ra to ratou oraanga ki te au kaveinga Kerititiano.

• Akapeea me O Atu: Tuatua atu ki te akaaere o te Apii Orometua Teokaratiki.

Au Apii Reo Ke

• Akakoroanga: Ei apii i te au papuritia akapeea me tutu aere i te tuatua meitaki i roto i tetai reo ke.

• Te Roa: E a me kore e rima marama. Ka raveia te au apii i te au popongi Maanakai e tai me kore e rua ora.

• Te Ngai: Tei matauia, i te Are Uipaanga Patireia i te pae mai.

• Koai Ma ka O Atu: Au papuritia e turanga meitaki to ratou te inangaro ra i te tutu aere i roto i tetai reo ke.

• Akapeea me O Atu: Ka akanoonoo te opati manga i tetai au apii kia tau ki tei anoanoia.

Akatu Anga Are Uipaanga Patireia

• Akakoroanga: Ei akatu anga e te akaou anga i te au Are Uipaanga Patireia. Kare teia i te apii, inara i raro ake i teia akanoonooanga ka apiiia te aronga tauturu kia kite i te au tu karape kia rauka ia ratou te tauturu atu i te angaanga akatu anga.

• Te Roa: Kia tau ki te au turanga o te tangata tauturu.

• Te Ngai: Tetai ua atu ngai te akanooia e te Kumiti Patu Anga Tapere. Ka patiia mai tetai aronga tauturu ei tauturu i te angaanga i tetai ngai mamao atu tei tupu tetai tumatetenga.

• Aronga ka Tau: Au taeake e te au tuaine kua papetitoia e kua ikiia e te pupu o te aronga pakari. Me e kite karape to ratou me kare.

• Akapeea me O Atu: Akaki i tetai pepa King­dom Hall Volunteer Worker Questionnaire (S-82) e kia tuku atu ki te aronga pakari i toou ngai.

Apii Tavini Anga Painia

• Akakoroanga: Ei tauturu i te au painia kia ‘rave tamou i ta ratou au angaanga orometua.’​—2 Timo. 4:5, NW.

• Te Roa: E rua epetoma.

• Te Ngai: Na te opati manga e iki i te reira; mei tei matauia i te Are Uipaanga Patireia i te pae mai.

• Aronga ka Tau: Aronga kua painia tamou ana e tai mataiti.

• Akapeea me O Atu: Ka o atu te au painia tau e ka akakite atu te akaaere kotinga i te reira kia ratou.

Apii na te Au Mema Ou o Betela

• Akakoroanga: Kua akanooia teia apii ei tauturu i te au mema ou kia puapingaia mei ta ratou tavinianga i Betela.

• Te Roa: E tai ora i te epetoma tataki tai no tetai tai ngauru ma ono epetoma.

• Te Ngai: I Betela.

• Aronga ka Tau: E au mema tinamou no te pamiri o Betela me kore e aronga tauturu no tetai tuatau roa me kore poto (e tai mataiti me kore roa atu).

• Akapeea me O Atu: Ka o atu te au mema tau o te pamiri o Betela.

Apii Orometua no te Patireia

• Akakoroanga: Ei terenianga i te aronga pakari e te au tavini orometua kia akaaere e kia akanoonoo meitaki i ta ratou au apainga. (Anga. 20:28) Ka raveia teia apii no tetai au mataiti kia tau ki te ikianga a te Pupu Akaaere.

• Te Roa: Te au mataiti i topa akenei kua raveia ana e tai e te apa ra no te aronga pakari e e tai ra no te au tavini orometua.

• Te Ngai: Mei tei matauia i te Are Uipaanga Patireia me kore te Are Akaputuputuanga i te pae mai.

• Aronga ka Tau: Aronga pakari me kore au tavini orometua.

• Akapeea me O Atu: Ka patiia atu te aronga pakari e te au tavini orometua tau e te akaaere kotinga.

Apii na te Aronga Pakari o te Putuputuangaa

• Akakoroanga: Ei tauturu i te aronga pakari kia akono meitaki i ta ratou au apainga i roto i te putuputuanga.

• Te Roa: E rima ra.

• Te Ngai: Na te opati manga e iki i te reira; mei tei matauia i te Are Uipaanga Patireia me kore te Are Akaputuputuanga i te pae mai.

• Aronga ka Tau: Aronga pakari.

• Akapeea me O Atu: Ka patiia mai te aronga pakari tau e te opati manga.

Apii na te Au Akaaere Tutaka e ta Ratou Au Vaineb

• Akakoroanga: Ei tauturu i te au akaaere kotinga e te au akaaere tapere kia tukatau meitaki i te tavini i roto i te au putuputuanga, e kia ‘maata atu te angaanga i te ako e te apii’ e kia tiaki i te aronga e akono ra ratou.​—1 Timo. 5:17; 1 Pete. 5:2, 3.

• Te Roa: E rua marama.

• Te Ngai: Na te opati manga e iki i te reira.

• Aronga ka Tau: Au akaaere kotinga me kore te au akaaere tapere.

• Akapeea me O Atu: Ka patiia atu te au akaaere tutaka e ta ratou au vaine e te opati manga.

Apii Pipiria na te Au TaeakeKare i Akaipoipoc

• Akakoroanga: Ei terenianga i te aronga pakari e te au tavini orometua kare i akaipoipo no tetai au apainga ke atu. Ka tukuia te maata anga o te aronga tei na roto ana i te apii kia tavini i te ngai ka anoanoia te tauturu i to ratou enua. Ka orongaia tetai apainga ki tetai pae kia tavini i tetai enua ke me ka rauka ia ratou.

• Te Roa: E rua marama.

• Te Ngai: Na te opati manga e iki i te reira; mei tei matauia i te Are Akaputuputuanga me kore i te Are Uipaanga Patireia.

• Aronga ka Tau: Au taeake kare i akaipoipo, e 23 mataiti ki te 62 mataiti, meitaki te oraanga kopapa e te inangaro ra i te tavini i te au taeake e te rave ra i te au anoano o te Patireia i te ngai e anoanoia ra te tauturu. (Mare. 10:29, 30) Kua tavini ana ratou e rua mataiti ei tavini orometua me kore ei aronga pakari.

• Akapeea me O Atu: Me te raveia ra teia apii i roto i taau ngai tutu anga o te opati manga, ka raveia tetai uipaanga no te aronga e inangaro ra kia o atu, i ko i te akaputuputuanga kotinga. Maata atu te au akakiteanga ka orongaia atu i roto i teia uipaanga.

Apii Pipiria na te Au Tokorua ­Akaipoipo Kerititianod

• Akakoroanga: Ei tereni meitaki i te au tokorua akaipoipo kia taangaanga meitakiia ratou e Iehova e tana akaaerenga. Ka tukuia te maata anga o te aronga tei rave i te apii kia tavini i te ngai ka anoanoia te tauturu i to ratou enua. Ka orongaia tetai apainga ki tetai pae kia tavini i tetai enua ke me ka rauka ia ratou i te rave.

• Te Roa: E rua marama.

• Te Ngai: Ka raveia te au apii mua i te Ngai Apii Anga Punanga Tiaki i Patterson, New York, U.S.A. Muri ake, ka raveia teia apii i te au ngai te ka ikiia e te opati manga, mei tei matauia i te Are Akaputuputuanga me kore i te Are Uipaanga Patireia.

• Aronga ka Tau: Au tokorua akaipoipo e 25 mataiti ki te 50 mataiti, meitaki te oraanga kopapa e te tau ra te au turanga kia tavini i te ngai ua atu e anoanoia ra te tauturu, e ka ariki e: “I na, teia au; ko au taau e tono.” (Isa. 6:⁠8) Kua akaipoipo ana ratou e te tavini tamou nei e rua mataiti kare i akamutu ana.

• Akapeea me O Atu: Me te raveia ra teia apii i roto i toou ngai tutu anga o te opati manga, ka raveia tetai uipaanga no te aronga e inangaro ra kia o atu i ko i te ra akaputuputuanga takake. Maata atu te au akakiteanga ka orongaia atu i roto i teia uipaanga.

Apii Pipiria PunangaTiaki o Gileada

• Akakoroanga: Ei terenianga i te au painia e te au tavini tamou no te angaanga mitinari.

• Te Roa: E rima marama.

• Te Ngai: Ngai Apii Anga Punanga Tiaki i Patterson, New York, U.S.A.

• Aronga ka Tau: Au tokorua akaipoipo kua papetitoia e toru mataiti, e e 21 ki te 38 o ratou mataiti me tuku mai i ta ratou pepa patianga mua. E tuatua Papaa ana ratou, kua akaipoipo ana e te tavini tamou nei e rua mataiti kare i akamutu ana. Meitaki to ratou oraanga kopapa. Ka o katoa mai te au painia e tavini ra i tetai enua ke (kapiti mai te au mitinari); au akaaere tutaka; au mema pamiri o Betela; aronga i o atu ana ki te Apii Terenianga Orometua, te Apii Pipiria na te Au Taeake Kare i Akaipoipo, e te Apii Pipiria na te Au Tokorua Akaipoipo Kerititiano me ka tau ratou.

• Akapeea me O Atu: Ka raveia tetai uipaanga no te aronga e inangaro ra i teia apii i ko i te uruoaanga tapere i roto i te ngai e akatereia ra e te opati manga. Maata atu te au akakiteanga ka orongaia atu i roto i teia uipaanga. Me kare e uipaanga i ko i te au uruoaanga i toou enua e ka inangaro koe kia o atu, e tata ki te opati manga no tetai atu akakitekiteanga.

Apii na te Au Mema o te Kumiti Manga e ta Ratou Au Vaine

• Akakoroanga: Ei tauturu i te aronga e tavini ra i roto i te Kumiti Manga kia akono meitaki i te angaanga no te akaaere anga i te au kainga Betela, te akono anga i te au angaanga tavinianga e tupu ra i roto i te au putuputuanga, te akaere anga i te au kotinga e te au tapere i roto i ta ratou ngai tutuanga, pera katoa te ngai urianga, neneianga, e te tukuanga i te au puka, e te akono anga i tetai atu au tipatimani ke.​—Luka 12:48e.

• Te Roa: E rua marama.

• Te Ngai: Ngai Apii Anga Punanga Tiaki i Patterson, New York, U.S.A.

• Aronga ka Tau: Au mema no te Kumiti Manga me kore Kumiti Oire me kore kua ikiia no te reira.

• Akapeea me O Atu: Ka patiia atu te au taeake tau e ta ratou au vaine e te Pupu Akaaere.

[Au Tataanga i Raro Ake]