Tu Puapinga Rava Atu o te Puapii Meitaki
1. Eaa te tu puapinga rava atu o te puapii meitaki?
1 Eaa te tauturu ana i tetai kia riro mai ei puapii meitaki no te Pipiria? Te apii a teianei ao? Au tu karape? Au tu kite natura? Kare, mari ra ko te tu tei akatupuia e te Ture, tei akataka mai i ta Iesu au pipi, e ko te tu maata rava atu ia e te meitaki i roto i to Iehova au tu puapinga tikai. (Ioa. 13:35; Gala. 5:14; 1 Ioa. 4:8) Koia oki te aroa. Ka akaari mai te puapii meitaki i te aroa.
2. Eaa ra i puapinga ai no tatou kia aroa i te tangata?
2 Aroa i te Au Tangata: Kua akaari mai te Puapii Maata, ko Iesu, i te aroa no te tangata, e kua akakeu teia ia ratou kia akarongo kiaia. (Luka 5:12, 13; Ioa. 13:1; 15:13) Me e inangaro to tatou i te au tangata, ka tutu aere tatou i te au atianga ravarai. Kare te tu arairaianga mei te takinokinoanga e te tu inangaro kore e tapu ia tatou. Ka akaari tatou i te inangaro ngakau tae ki te aronga ta tatou ka tutu atu, e ka akatanotano tatou i ta tatou au tuatua kia tau ki to ratou au manamanata. Ka akapou tatou i tetai taime ki ta tatou aronga apii Pipiria tataki tai, e me akapapa katoa no te apii tataki tai.
3. Akapeea te aroa no te tuatua mou Pipiria me tauturu ia tatou i roto i te angaanga orometua?
3 Inangaro i te Au Tuatua Mou Pipiria: Inangaro katoa ra a Iesu i te au tuatua mou Pipiria e te manako ra i te reira ei au apinga akaperepere. (Mata. 13:52) Me e inangaro to tatou i te tuatua mou, ka tuatua tatou ma te maoraora, e ka akakeu te reira i te aronga e akarongo maira kia mataora. Ka tauturu taua inangaro ra ia tatou kia akamou ki runga i te au manako puapinga e tuatua ra tatou, kare ki runga i to tatou tu tukatau kore, kare i reira tatou e ru me rave i te angaanga orometua.
4. Akapeea tatou me akatupu i te aroa?
4 Akatupu i te Aroa: Akapeea tatou me akatupu i te aroa no te au tangata? Na te akamanako anga i te aroa ta Iehova e ta tana Tamaiti i akaari mai e te turanga kino o te au tangata i te pae vaerua i roto i ta tatou ngai tutuanga. (Mare. 6:34; 1 Ioa. 4:10, 11) Ka maata atu to tatou aroa no te au tuatua mou Pipiria me apii putuputu e me akamanako oonu tatou i te reira. E tuanga te aroa no te au ua o te vaerua. (Gala. 5:22) No reira ka pati tatou kia Iehova no te vaerua tapu e kia tauturu mai ia tatou kia maata te aroa. (Luka 11:13; 1 Ioa. 5:14) Noatu ta tatou i rauka mai mei te apii a teianei ao, to tatou tu karape i roto i te tuatua mou, me kore to tatou au tu kite natura, ka riro mai tatou ei puapii meitaki tikai no te Pipiria me akaari tatou i te aroa.