E Toru Ravenga ei Akameitaki Atu i Taau Apiianga
1. Eaa ra tatou ka akameitaki atu ei i ta tatou apiianga?
1 E au puapii te au orometua Kerititiano pouroa. Me te rave ra tatou i te aravei anga mua, te oki akaou ra i te akamaata atu i te inangaro, me kore te rave ra i tetai apii Pipiria, te oronga ra tatou i te au manako. E puapinga tikai te au manako ta tatou e apii ra. Te akakite nei tatou i te “tuatua tapu i tataia ra,” te ka akariro i te au tangata kia ‘pakari no te ora.’ (2 Timo. 3:15) E turanga ngateitei tikai teia! E toru ravenga i konei no te akameitaki atu i ta tatou apiianga.
2. Akapeea tatou me apii ma te tu mama ua?
2 Kia mama ua: Me marama meitaki tatou i tetai tumu manako, penei ka ngaropoina ia tatou e kare tetai ke e marama mai i te reira. No reira, me rave i te apii Pipiria, eiaa e akamaata rava i te manako kare e anoanoia i roto i taau apiianga. Mari ra, e akakite ua i te au manako maata. Me maata taau tuatua, kare te aiteanga e te meitaki ra taau apiianga. (Mase. 10:19) E mea meitaki kia tatau ua i te au irava puapinga. Muri ake te tatau anga i te irava, akamou i te manako o te irava kia tau ki taau tumu manako. Tei roto i te Tuatua i runga i te Maunga, tei rekotiia i roto ia Mataio pene 5 ki te 7, te au tuatua mou puapinga, inara kua akamama ua a Iesu i tana au apiianga, kare i akamaata ana i tana au tuatua.
3. Eaa te puapinga o te au akatutuanga, e eaa te au mea meitaki kia taangaangaia?
3 Au akatutuanga: E akakeu ana te au akatutuanga i te manako e te ngakau, e e tauturu ana i tetai kia akamaara i te manako. Kare koe e anoanoia kia akakite i te au mea ravarai no runga i te akatutuanga. Kua taangaanga a Iesu i te au tuatua poto e te mama ua. (Mata. 7:3-5; 18:2-4) Ka riro katoa te tutu toro mama ua i runga i tetai aenga pepa ei tauturu anga. Me akapapa meitakiia te reira na mua, ka tauturu te reira ia koe kia manako mai i tetai akatutuanga meitaki.
4. Akapeea tatou me taangaanga meitaki i te au uianga?
4 Au uianga: Au uianga te ka akakeu i taau tangata apii kia akamanako. No reira, kia akakoromaki i muri ake me ui koe i tetai uianga. Me oronga vave koe i te pauanga, kare koe e kite eaa ta te tangata apii e marama ra. E mea meitaki atu kia uiui i tetai au uianga ke kia kite mai aia i te pauanga, eiaa e akatano atu iaia, me ka pau tarevake mai aia. (Mata. 17:24-27) E tika, kare tatou i te au puapii apa kore. No reira te akamaroiroi maira te Pipiria ia tatou kia akamanako ua rai i ta tatou e apii ra. Na te rave anga i te reira ka rauka ia tatou e te aronga katoa e akarongo maira te au akameitaki anga mutu kore.—1 Timo. 4:16.