Paruru Anga i Toou Akava Ngakau

1. Eaa te tumu manako maata o te ra akaputuputuanga takake no te 2013, e eaa te akakoroanga o te porokaramu?

¹ I te au ra tataki tai e aro atu ana tatou i te au turanga te ka akakeu ia tatou kia takino i to tatou akava ngakau. No reira rai i o mai ei ki roto i te porokaramu o te ra akaputuputuanga takake no te mataiti tavini anga 2013, te ka akamata i roto ia Tepetema ra 1, mataiti 2012, te tumu manako maata e kia “Paruru Anga i Toou Akava Ngakau.” (1 Timo. 1:19) Kua akapapaia te porokaramu ei tauturu ia tatou tataki tai kia akamanako pakari e akapeea tatou me taangaanga i teia apinga aroa meitaki tikai no ko mai i Tei Anga mai ia tatou.

2. Eaa te au uianga puapinga te ka pauia i te tuatau o te porokaramu?

² Akara i Teia au Tumu Manako: Ka pau mai te porokaramu e itu au uianga puapinga no runga i te akava ngakau:

• Eaa te mea te ka takino i to tatou akava ngakau?

• Akapeea tatou me tereni i to tatou akava ngakau?

• Akapeea tatou e ma ei mei te toto o te au tangata ravarai?

• Eaa to tatou manako e ta tatou taangaanga anga i te au kaveinga Pipiria e akaari maira no runga ia tatou?

• Akapeea tatou me kopae i te takino anga i te akava ngakau o tetai ke?

• E te au mapu, akapeea koe me autu atu i te taomianga kia kore e tuku i te au?

• Eaa te au akameitakianga te ka rauka mai i te aronga e taangaanga ra i to ratou akava ngakau tei aratakiia e te vaerua tapu?

3. Akapeea tatou e puapingaia ai mei teia porokaramu?

³ Ka tauturu mai a Iehova ia tatou kia autu atu i ta Satani tauta anga i te takino i to tatou akava ngakau. Na roto i te Tuatua a te Atua e tana akaaerenga, te akakite maira to tatou Metua aroa i te rangi e: “Teia te mataara. E aaere na reira.” (Isa. 30:21) Te oronga maira a Iehova i taua arataki anga na roto i teia porokaramu. No reira, e akapapa kia tae atu ki te katoa anga o te porokaramu. Akarongo meitaki, e kia akamanako e akapeea koe me taangaanga i teia au manako. Tuatua no runga i te porokaramu ki te pamiri. Ka riro te taangaanga anga i te au ikuikuanga e rauka maira ia tatou ei akaketaketa anga ia tatou, kia rave tamou ua rai i te “akava-ngakau meitaki” kia kore tatou e akavareia e te au mea navenave o te ao o Satani.​—1 Pete. 3:16.