“Kia Noo au ua Kotou i Roto i te Tangata Katoa”
1. Eaa te akoanga Pipiria ta tatou ka taangaanga me aro atu i te au tangata ngutuare kare e reka mai ana?
1 E mea inangaro na te iti tangata o Iehova te au, e ta tatou angaanga orometua e mea au te reira. (Isa. 52:7) Tetai au taime ra, e aravei ana tatou i te aronga kare e reka mai ana no tei aere atu tatou ki to ratou kainga. Eaa te ka tauturu ia tatou kia au ua i roto i taua turanga ra?—Roma 12:18.
2. Eaa i puapinga ai no tatou kia marama i te turanga o te tangata?
2 Kia Marama i te Turanga o te Tangata: Penei e tuatua riri mai ana tetai pae no te mea te patoi ra ratou i te tuatua mou, e ko etai pae penei e au tumu ke ua to ratou i riri ei, kare no ta tatou karere. Penei kare i te taime tau to tatou aere atu anga. Penei e manamanata ke ua tona i riri ei. Noatu ko te tuatua meitaki tana e riri ra, e akamaara tatou e penei kua akavareia aia i akapera mai ei aia. (2 Kori. 4:4) Me marama tatou i tona turanga, ka tauturu tera ia tatou kia maru ua e kia kore e riri atu.—Mase. 19:11.
3. Akapeea tatou me akaari i te tu akangateitei no te tangata ngutuare?
3 Akaari i te tu Akangateitei: E maata te tangata i roto i te ngai tutuanga e ketaketa to ratou irinakianga. (2 Kori. 10:4) E tikaanga to ratou kia iki e me ka akarongo mai e me kare. Eiaa rava tatou e aviri i te irinakianga o te tangata ngutuare me kore eiaa e maani e ko koe tei kite atu. Me patiia mai tatou kia aere, e akangateitei rai i tana patianga.
4. Eaa te aiteanga kia tuatua ma te tu takinga meitaki?
4 Tuatua ma te tu Takinga Meitaki: Noatu me tuatua akakinoia mai tatou, kia maru me pau atu ma te takinga meitaki. (Kolo. 4:6; 1 Pete. 2:23) Kia kore e o atu ki roto i te taumaro, e tuatua no runga i tetai mea ka akatika korua roa ai. Penei ka rauka ia tatou i te ui marie atu i te tumu i patoi mai ei aia. Inara kia kore tatou e akariri roa atu iaia, tetai au taime e meitaki atu kia akamutu ua i reira.—Mase. 9:7; 17:14.
5. Eaa te au puapinga ka rauka mai me akaari tatou i te tu akamoeau i roto i te angaanga orometua?
5 Me e aronga akamoeau tatou, penei ka maara i te tangata ngutuare to tatou tu e ka akarongo mai me aere atu tetai taeake a muri mai i te tuatua kiaia. (Roma 12:20, 21) Noatu e akaraanga ngaueue kore tona turanga i te patoi mai, penei a tetai ra ka riro mai aia ei taeake no tatou. (Gala. 1:13, 14) Noatu me ka inangaro aia i te tuatua mou e me kare, ka akangateitei rai tatou ia Iehova e ka akakaka i ta tatou e apii ra me akakoromaki marie tatou e me akaari i te tu akamoeau.—2 Kori. 6:3.