Ka Puapingaia Ainei Koe me Naau Rai Taau Ngai Tutuanga?

1. Eaa taau ka rauka i te rave me e maata te ngai tutuanga a te putuputuanga?

¹ Me e maata te ngai tutuanga a te putuputuanga, penei ka inangaro koe i taau uaorai mapu, koia oki tetai ngai vaitata mai i te ngai e noo ra koe. Te akamarama maira te puka Akaaereia i te kapi 103 e: “Te rauka anga mai tetai ngai tutuanga tau naau uaorai ka tauturu ia koe kia taangaanga tau tikai i te taime ka rauka ia koe i te oronga ki te angaanga tutuanga. Penei ka inangaro katoa koe i te pati atu i tetai papuritia ke kia angaanga korua i roto i taau uaorai ngai tutuanga.”

2. Akapeea me taangaanga i ta tatou uaorai mapu, kia kapiti mai ki te uipaanga no te angaanga orometua?

² Kapiti Mai ki te Uipaanga no te Angaanga Orometua: Me e ngai tutuanga taau vaitata mai ki taau ngai angaanga, ka rauka ia koe e tetai atu papuritia vaitata mai tana ngai angaanga, i te tutu aere i te tuatau kaikai i te avatea me kore i mua ake ka oki ei ki te kainga. Me e ngai tutuanga taau vaitata ki toou kainga, ka mama ua ia koe e toou pamiri i te taangaanga i te reira no te tutuanga i te aiai. E tika me kare koe e aere ki te uipaanga no te angaanga tutu, e mea tau kia pure no ta Iehova aratakianga i mua ake ka akamata ai koe i te tutu aere. (Phili. 4:6) Tetai katoa, e paunu meitaki i toou taime no taau uaorai mapu e toou taime kia turuturu i te uipaanga a te putuputuanga no te angaanga orometua. I te openga epetoma tikai, te taime e akaputuputu mai ana te au taeake no te angaanga tutu aere, e mea tau kia turuturu i taau pupu.

3. Eaa te au akameitakianga me naau rai taau ngai tutuanga?

³ Au Akameitakianga: Me naau rai taau ngai tutuanga, ka rauka ia koe i te tutu aere i tetai ua atu taime. Ka maata toou taime no te tutuanga e kare te ngai taau ka aere e mamao. No te mama ua i te akatanotano, kua rauka i tetai pae i te painia tauturu me kore i te painia tamou. No te mea te au tangata ngutuare tei akaari mai i te inangaro kare ratou e mamao mai ana, ka mama ua i te oki akaou e te rave i te au apii Pipiria. Maata tei kite e me tutu aere i tetai ngai tutuanga na ratou uaorai, ka tauturu te reira ia ratou kia akamatau atu ki te au tangata ngutuare e kia akatupu i to ratou irinaki, te tuatau tikai me maata te taime ka angaanga i taua ngai ra i mua ake ka tuku ei e na tetai ke e rave. Ka tauturu ainei te reira ia koe e toou pamiri kia rave akaope takiri i taau angaanga orometua?​—2 Timo. 4:5.