Aru i te Akaraanga a te au Peroveta—Amosa
1. No teaa ka riro ei te akaraanga o Amosa ei akamaroiroi ia tatou?
1 E tukatau kore ana rai koe i te tutu aere no te mea kare koe i aere ana ki te apii teitei, e e oraanga akaaka ua toou i utuutuia mai ei? Me ko tera toou manako, akamaroiroi, aru i te akaraanga o Amosa. E tangata angai mamoe aia, e angaanga ana aia no tetai tuatau ua i te mataiti, e oti akera kua akamana a Iehova iaia kia akakite i tetai karere puapinga. (Amo. 1:1; 7:14, 15) Mei te reira rai te tu i to tatou nei tuatau, e taangaanga ana a Iehova i te aronga maru e te akaaka. (1 Kori. 1:27-29) Eaa tetai au apiianga ka rauka ia tatou no ta tatou angaanga orometua, mei te akaraanga o te peroveta ko Amosa?
2. No teaa ka rauka ai ia tatou kia vai ngaueue kore me aro atu i te patoianga i roto i te angaanga orometua?
2 Kia Vai Ngaueue Kore me Aro Atu i te Patoianga: Te rongo anga a Amazia, te taunga akamori punua puakatoro o te patireia tino ngauru o Iseraela i te tua tokerau i te totou a Amosa, mei te mea rai e te tuatua riri ra aia i te karanga anga e: ‘E oki ki toou enua! Eiaa e tamanamanata mai ia matou! E akonoanga rai ta matou!’ (Amo. 7:12, 13) I tona pati anga ki te Ariki ko Ieroboama kia arai i te angaanga a Amosa, kua takaviri a Amazia i te tuatua a te peroveta. (Amo. 7:7-11) Inara kare a Amosa i mataku ana. Teia tuatau, e umuumu ana te au orometua kia turu mai te kavamani i ta ratou tautaanga kia takinga kino i te iti tangata o Iehova. Inara te akapapu maira a Iehova e kare e patoianga e manuia i te tamaki i tona au tavini.—Isa. 54:17.
3. Eaa nga tuanga e rua o ta tatou karere i teia tuatau?
3 Akakite i ta te Atua Tukuanga Tika e te Akameitakianga a te Tuatau ki Mua: Noatu kua totou a Amosa e ka akautunga te Atua i te patireia tino ngauru o Iseraela, kua akakite aia i te pae openga o te puka Pipiria o Amosa, i ta Iehova taputou kia akaoki akaou mai i tona iti tangata, e kia akameitaki akaou ia ratou. (Amo. 9:13-15) E akakite katoa ana tatou ki te tangata e te vaitata maira te “rā akavaanga” o te Atua, inara ko tetai tuanga ua teia o “te evangelia o te basileia” ta tatou e tutu aere nei. (2 Pete. 3:7; Mata. 24:14) Me takore a Iehova i te aronga kino i te tuatau o Aramakito, ka akatuera te reira i te mataara no te enua parataito.—Sala. 37:34.
4. Eaa te akapapuanga kia tatou e ka rauka ia tatou i te akatupu i to Iehova anoano?
4 Riro te tutu aere i te karere o te Patireia i roto i tetai ao e maata te aronga patoi, ei timata i to tatou inangaro ngaueue kore kia akatupu i ta tatou akatapuanga e kia rave i to Iehova anoano. (Ioa. 15:19) Noatu ra, papu ia tatou e ka oronga mai a Iehova i tei anoanoia kia rauka ia tatou i te akatupu i tona anoano, mei tana rai i rave no Amosa.—2 Kori. 3:5.