Aru i te Akaraanga o te au Peroveta—Hosea
1. Eaa ra te uianga penei tei ui ana koe kia koe uaorai?
1 ‘Eaa ra te au akaatingaanga taku e inangaro nei i te rave no Iehova?’ Penei kua ui ana koe i taua uianga ra, ia koe e manakonako ra no runga i tona takinga meitaki maata e te aroa ua. (Sala. 103:2-4; 116:12) Kua rave puareinga ua a Hosea i ta Iehova i akaue iaia kia rave, noatu kua kite aia e ka o mai te au akaatingaanga. Ka akapeea tatou i te aru anga i to Hosea tu?
2. Akapeea tatou me aru i te akaraanga meitaki a Hosea i te tauta ua atu anga i roto i te angaanga tutuanga?
2 Tutu i te Tuatau Ngata: I akakoroia te karere a Hosea, no te kopu tino-ngauru o te patireia Iseraela, no te mea kua vaitata roa te akamorianga mou i te takore takiriia. Kua rave te Ariki ko Ieroboama II i te kino maata i mua i te aroaro o Iehova, e kare i akaruke i te akamorianga punua puakatoro tei akamataia e Ieroboama I. (2 Ari. 14:23, 24) Kua aru atu rai te au ariki o muri mai i te turanga pae vaerua kino o te patireia kopu tino-ngauru, e tae ua atu ki te takore takiri angaia te reira i te mataiti 740 M.T.N. Inara, noatu te totoa ua ra te akamorianga pikikaa, kua tavini tiratiratu ua atu rai a Hosea ei peroveta, no tetai 59 mataiti. Mei te reira ainei to tatou tu ngaueue kore i te tutu aere mei tera mataiti ki tera mataiti, noatu te inangaro kore e te patoianga a te tangata?—2 Timo. 4:2.
3. Akapeea ra to Hosea oraanga i te akatutu mai anga i to Iehova aroa ua?
3 Akakite i to Iehova Aroa Ua: Kua akaue a Iehova ia Hosea kia akaipoipo i “tetai vaine akaturi.” (Hose. 1:2) Noatu kua anau mai tana vaine a Gomera i tetai tamaiti nana, inara i muri mai kua anau aia e rua nga tamariki puti. To Hosea tu puareinga i te akakore i te apa a tana vaine, te akatutu maira i to Iehova aroa ua i te akakore i te ara a to Iseraela akarongo kore, me tataraara ratou. (Hose. 3:1; Roma 9:22-26) Te inangaro ra ainei tatou i te akaruke puareinga ua i to tatou uaorai anoano, kia rauka ia tatou te akakite i to Iehova aroa ua ki te au tu tangata ravarai?—1 Kori. 9:19-23.
4. Eaa ra tetai au akaatingaanga ka rauka ia tatou i te rave no Iehova?
4 Tetai au tavini o Iehova kua akaruke i te au ngai angaanga moni maata kia rauka i te akapou maata atu i te taime i roto i te angaanga orometua. Tetai papaki kare i akaipoipo, me kore kare i anau tamariki, kia rauka i te rave i te au anoano o te Patireia. Me akamanako tatou no runga i te oraanga o Hosea, penei ka karanga tatou e, ‘Kare roa e rauka iaku i te rave i tana i rave.’ Inara, ia tatou e akatupu ra i te ngakau ariki rekareka i to Iehova aroa ua, e te irinaki ki runga i tona vaerua tapu no te maroiroi, penei ka taangaanga aia ia tatou na roto i tetai mataara kare roa tatou i manako ana, mei ia Hosea rai.—Mata. 19:26; Phili. 2:13.