Akamaata Atu i to Tatou Karape i te Tutu Aere—Peea me Ariu Atu me Patoi Mai te Tangata

Tumu i Puapinga Ai: Akamanako ana e kua kite koe e ka tupu tetai tumatetenga. Ka mate te tangata me kare ratou e oro i te kimi i tetai ngai kia ora mai ratou. Kua oro koe ki te kainga o tetai tangata i te akamatakite iaia, inara kua tāpu poitirere mai aia ia koe i te akakite e e maata tana angaanga e rave ra. Papu e kare koe e tuku ua atu ki tana, ka tauta koe i te tauturu iaia! E maata rai te tangata i roto i ta tatou ngai tutuanga kare e inangaro ana i te akarongo mai, no te mea kare ratou i kite i te puapinga o ta tatou karere. I te tuatau i aere atu ei tatou, e maata rai ta ratou angaanga e rave ra. (Mata. 24:37-39) Me kore kua akarongo ana ratou i tetai au tuatua kino a tetai ke no runga i te Au Kite o Iehova. (Mata. 11:18, 19) Penei te manako ra ratou e kare tatou i tuke mei te au akonoanga e akatupu ra i te tuatua pikikaa. (2 Pete. 2:1, 2) Me kare te tangata ngutuare e inangaro ana i te akarongo mai, eiaa e tuku vave ua i te au.

Peea me Rave i te Reira:

I mua ake ka tutu aere ei mei tera are ki tera are, akamanako meitaki na mua i te au patoi anga ka aro atu koe e ka akapeea koe me ariu atu.
Me e patoianga ta te tangata ngutuare, tauta rai i te tuatua kiaia na roto i te tu maru. Ei akaraanga, me karanga mai aia e e akonoanga tana, penei ka akameitaki atu koe iaia na te pau anga e, “Te mataora nei au i te akarongo e e tangata irinaki Atua koe.” Tetai taime na te ariki anga i te manako me kore i te turanga o te tangata ngutuare, ka tauturu te reira ia koe kia pukapuka ua atu rai kiaia. Ei akatauanga, me karanga mai aia e e maata tana angaanga, penei ka pau atu koe: “E tika rai taau. Inara i mua ake ka aere au, ka inangaro au i te oake atu i teia naau.” Tetai ravenga ke koia oki, e ui i tetai uianga me karanga mai te tangata ngutuare e kare aia e inangaro ana. Penei ka karanga koe e, “Ko te Pipiria ainei taau kare e inangaro, me ko te akonoanga?”
Akamanako meitaki. Kia akamaara e kare a Iehova e maro ana i te tangata kia akarongo kiaia. (Deu. 30:19) Ka anoanoia te katoatoa kia rave rai i tana uaorai apainga ki mua ia Iehova. (Gala. 6:5) Me kare rai te tangata ngutuare e taui i tona manako, e mea meitaki kia akaruke maru ua tatou. Na te akaari anga i te tu akangateitei no tona manako, te oronga ra tatou i tetai atianga no tetai taeake ka aru mai i te pukapuka atu kiaia.—1 Pete. 3:15.

No Teia Marama, Tamata i Teia:

I muri ake me akaruke koe i tetai tangata ngutuare tei patoi mai, e uriuri ki toou tokorua e angaanga kapiti ra korua, me e mataara ke atu rai tetai ka rauka ia koe i te ariu meitaki atu ki te manako o tetai tangata.