Aru i te Akaraanga o te au Peroveta—Nahuma
1. Eaa ta tatou i rauka mai mei te puka a Nahuma?
1 Te akapapu maira te au ngai tanea o Nineve e kua akaoko a Iehova i Tona au enemi mei ta Nahuma tikai i totou, e kare takiri i rauka ana i te au enemi kino rava atu i te tamaki atu Iaia. (Nahu. 1:2, 6) Me akara meitaki tatou i te totou a Nahuma, ka riro te reira ei tauturu ia tatou i roto i te angaanga orometua.
2. Eaa ta tatou ka rave kia riro ta tatou karere ei mea pumaana?
2 Oronga i te Akapumaana e te Manakonakoanga: I te akaraanga, e tuatua tumatetenga ua tei roto i te puka a Nahuma no Nineve, te oire maata o Asura i taito. (Nahu. 1:1; 3:7) Inara, kua riro teia tuatua ei nuti mataora ki to Iehova iti tangata. Ko Nahuma, te aiteanga o tona ingoa “Tei Akapumaana,” kua akapumaana aia i tona au taeake ngati Iuda e kare e roa atu ka takoreia to ratou enemi! Kua akapapu katoa atu a Nahuma e ‘e akapuanga ketaketa a Iehova i te rā tumatetenga.’ (Nahu. 1:7) Ia tatou e tutu aere ra, te oronga katoa nei tatou i te tuatua meitaki, e te akamaroiroi i etai ke kia akariro ia Iehova ei akapuanga no ratou.—Nahu. 1:15.
3. Akapeea tatou i te aru anga ia Nahuma i te taangaanga i te au akaraanga e te au akatutuanga?
3 Taangaanga i te au Akaraanga e te au Akatutuanga: Kua akauru a Iehova ia Nahuma kia akaaite i te mate o Nineve ki to te oire maata o Aiphiti i taito ko No-amona tei takoreia e to Asura i mua atu. (Nahu. 3:8-10) Me tuatua tatou ki te tangata no runga i te openga o teia akatereanga kino, e akakite tatou i te au totou e akaari papu maira e e akatupu ua ana a Iehova i tana tuatua e kare okotai i pōkā. Ei akaraanga, i te tamaki anga atu to Babulonia e to Madai ia Nineve i te mataiti 632 M.T.N., kua puke te Kauvai Tigerisi e no te maata o te ua kua ngaʼangaʼa tetai tuanga o te patu ngaueue kore o te oire. I reira rai kua nina takiriia a Nineve, mei ta Iehova tikai i totou.—Nahu. 1:8; 2:6.
4. Eaa ta tatou ka rave kia taka meitaki e kia māramarama ua ta tatou tuatua i roto i te angaanga orometua?
4 Kia Taka Meitaki e Kia Māramarama Ua: Tataia te puka a Nahuma na roto i te tu akamāramarama e te akatutu. Taka taka meitaki tona au manako. (Nahu. 1:14; 3:1) Kia akapera rai tatou me taangaanga i te au tuatua te ka māma ua i te mārama. (1 Kori. 14:9) I te aravei anga mua, akamārama taka meitaki i te tumu i atoro atu ei koe. Ia koe e apii atura i te Pipiria ki te tangata, tauturu ia ratou kia akatupu i te akarongo i roto ia Iehova e Tana Tuatua e kia mārama e eaa teia karere i puapinga ai no ratou.—Roma 10:14.
5. Eaa te akapumaanaanga te ka rauka ia tatou i roto i te totou a Nahuma?
5 I roto i te puka o te Pipiria tana i tata, te kite pu uaia ra to Nahuma irinaki papu i roto i te akatupuanga o ta Iehova tuatua. I te openga o to Satani akatereanga e vaitata maira, ka rauka ia tatou te pumaana i roto i te tuatua a te ture a te Atua e na ko ra e: “Kare e tu rua mai te mate i te tupu anga.”—Nahu. 1:9.