Akaari i te jw.org i Roto i te Angaanga Orometua

E ravenga meitaki tikai ta tatou Web site ei tauturu ia tatou kia akakitekite i te tuatua meitaki “e tae ua atu ki te openga o te enua.” (Anga. 1:8) Maata te tangata kare e rauka i te kimi i te jw.org ko ratou anake ua. Mari ra, ka kite mai ratou me akaari tetai papuritia i te reira kia ratou.

Kua kopi mai tetai akaaere tutaka i te vitio Eaa te Tumu ka Apii ei i te Pipiria? ki roto i tana terepaoni apaipai, e oti akaari aia i te reira ki te tangata i te au atianga ravarai. Ei akaraanga, i roto i te angaanga tutuanga, karanga aia e: “Te atoro mai nei au i te tangata ei tauturu ia ratou kia kite i te au pauanga ki teia au uianga e toru: Eaa te tumu i maata ai te au manamanata? Ka akapeea te Atua me taui i te reira? Akapeea tatou me akakoromaki i teia tuatau? Te pau maira teia vitio i taua au uianga ra.” Kare aia e pati ana ki te pu ngutuare me ka inangaro aia i te akara, mari ra e akatangi ua ana aia i te vitio e te akara ra aia me te reka ra te pu ngutuare. E reka tikai ana te tangata i te akara i teia vitio e e akamou ana ratou i to ratou mata ki runga i te reira. E oti karanga te akaaere tutaka e: “Koi akarongo ua akenei koe e ka rauka ia koe i te pati no tetai apii Pipiria i runga i te Initaneti. I te mea e kua aere mai au ki ko i toou kainga, penei naku rai e akaari atu kia koe akapeea teia e raveia ai.” Me akatika te pu ngutuare, e taangaanga ana te akaaere tutaka i te poroutia Nuti Meitaki ei akamata i te apii. Me kare e taime no te pu ngutuare, ka akanoo aia kia oki akaou i te akaari akapeea me rave i te apii Pipiria. Me aere te akaaere tutaka ki tetai toa inu kaope, e tuatua akapera ana aia ki te tangata e noo vaitata ra kiaia. Te akaari ra ainei koe i te jw.org i roto i te angaanga orometua?