Tamariki​—Kia Pakari i te Pae Vaerua me Papetitoia

1. Eaa te au mea meitaki ta te au mapu ou i rave?

I TE au mataiti, e tauatini ua atu mapu Kerititiano tei papetitoia. Kua rave ainei koe i teia takainga? Me koia ïa, te rekareka nei toou au taeake e te au tuaine pae vaerua ia koe e Iehova katoa! (Mase. 27:11) Akamanako ana i taau i rave. Kua apii tamou koe i te Pipiria no tetai tuatau roa. Irinaki papu koe i te Pipiria ei Tuatua na te Atua. Tei maata atu, kua kite mai koe e kua akaperepere i Tei Tata i teia puka tapu. Kua tupu toou inangaro ia Iehova e kua akatapu ia koe, ei tavini papetitoia nona. E ikianga manea tikai!

2. Eaa ta tatou ka uriuri i teia atikara?

² Kare e ekoko anga, kua timataia toou akarongo ia koe e aruaru ra kia papetito koe. Inara, ia koe e maata maira kua kite koe i te au timataanga ou. Ka tauta a Satani i te akaparuparu i toou inangaro ia Iehova, e kia akaruke Iaia. Auraka e tuku i te au. (Ephe. 4:14) Eaa te ka tauturu ia koe kia tiratiratu kia Iehova, e kia akatupu i taau tia akatapuanga? E tauta i taau ka rauka kia​—‘aere ua rai ki mua’ kia pakari ei Kerititiano mou. (Ebe. 6:1) Akapeea ra koe me rave i te reira?

AKAPEEA KOE ME TERE KI MUA KIA PAKARI EI KERITITIANO?

3. Eaa tei anoanoia no te au Kerititiano kia tere ki mua i muri ake i te papetitoanga?

³ I muri ake i te papetitoanga, ka anoanoia tatou kia aru i ta Paulo akoanga ki te au taeake i Ephesia. Kua akamaroiroi aia ia ratou “kia taea te aite ra” kia pakari ei au Kerititiano. (Ephe. 4:13) Tera te aiteanga, ‘e aruaru ua atu kia pakari.’ Kia mārama tatou i ta Paulo tuatua kua akaaite aia i te tupuanga pae vaerua ki te tupuanga o tetai tamaiti. Ka ngakau parau te nga metua i ta raua pepe ou. Inara kare aia e vai ua ei pepe. Ka akaruke rai aia i te au “peu a te tamariki.” (1 Kori. 13:11) Aiteite katoa ki te au Kerititiano. I muri ake i te papetitoanga, ka anoanoia tatou kia pakari i te pae vaerua. Ka uriuri tatou i tetai au tauturu.

4. Eaa te tu ka tauturu ia koe kia tere ki mua i te pae vaerua? Akamārama mai. (Philipi 1:9)

⁴ Akatupu i toou inangaro ia Iehova. Kua akaperepere maata koe ia Iehova. Inara ka rauka ia koe i te akaoonu i toou inangaro. Akapeea ra? Kua akakite mai te apotetoro ko Paulo i tetai mataara, ia Philipi 1:9. (E tatau.) Kua pure a Paulo i to Philipi “kia tupu marie” te inangaro. Ka tupu marie rai to tatou inangaro. Na te apii “maata atu rai i te kite, e te utoa o te ngakau.” Te maata i ta tatou apiianga ia Iehova, ka tupu marie to tatou inangaro iaia, tona au tu e tana au angaanga. Ka inangaro ua tatou i te akamareka iaia. Ka tauta pakari tatou kia kite i tona anoano e te angaanga rotai ki te reira.

5-6. Akapeea tatou me akatupu i to tatou inangaro ia Iehova? Akamārama mai.

⁵ Ka tupu to tatou inangaro ia Iehova na te apiianga i tana Tamaiti, tei aru tiama i te tu o tona Metua. (Ebe. 1:3) Te mataara meitaki kia kite ia Iesu na te apiianga i te evangeria e a. Me kare koe i akamatau ake ia koe kia tatau i te Pipiria i te au rā, e akamata i teianei. Ia koe e tatau ra i te tataanga o Iesu, e akamanako meitaki i tona au tu. E ngoie ua i te aravei iaia, kua takave aia i te tamariki. (Mare. 10:13-16) Oaoa ua aia ki tana au pipi e kua va ua ratou i te tuatua kiaia. (Mata. 16:22) Na teia mataara, kua aru a Iesu i tona metua i te rangi. E ngoie rai te aere kia Iehova. Ka aere tatou kiaia na roto i te pure. Me pure tatou, e riringi i to tatou ngakau kiaia. Ma te papu kare aia e akava mai ia tatou. Akaperepere aia ia tatou; e te manako maira ia tatou.​—1 Pete. 5:7.

⁶ Kua tangi aroa a Iesu i te tangata. Akakite te apotetoro ko Mataio: “E kia akara akera aia i te maata o te tangata, aroa atura aia ia ratou, no te mea kua mate ratou i te roiroi, e kua pueurikiriki keia, mei te mamoe tiaki kore ra.” (Mata. 9:36) Eaa to Iehova manako? Karanga a Iesu: “Koia katoa to kotou Metua i te ao ra, kare ïa i inangaro e kia mate tetai o teianei au tangata rikiriki.” (Mata. 18:14) E mea pumaana tikai te reira! Ia tatou e apii marie ra no runga ia Iesu, ka tupu ua atu to tatou inangaro ia Iehova.

7. Akapeea te kapitianga ki te au Kerititiano tukatau me tauturu ia koe?

⁷ Ka rauka katoa ia koe te aroa ua atu ei Kerititiano na te piri vaitata anga ki te au taeake e te au tuaine tukatau i roto i taau putuputuanga. E akara ana i to ratou tu rekareka. Kare i tataraara i ta ratou ikianga kia tavini ia Iehova. E pati ia ratou kia akakite mai i to ratou oraanga tavini ia Iehova. Me e ikianga puapinga taau ka rave e pati i ta ratou tauturu. E akamaara “kia maata ra te aronga kimi tuatua ra, ko te ora ïa.”​—Mase. 11:14.

8. Eaa taau ka rave me ekoko koe i ta te Pipiria e apii ra?

⁸ Kia autu i te au manako ekoko. Mei tei taikuia i te parakarapa 2, ka tauta a Satani i te tāpu ia koe kia kore e tere ki mua i te pae vaerua. Na te akatupu anga i te au manako ekoko no te au apiianga Pipiria. Ei akaraanga, ka kite mai koe i te apiianga o te au mea tupu ua, tei akakino i te Atua. Penei kare koe i manako maata ana i teia i toou meangiti anga, kua maata mai koe i teianei, te kite ra koe i teia apiianga i te apii. Ko tei apiiia e toou puapii no te apiianga tupu ua, penei ka irinakiia. Papu kare ratou i akamanako ana e te vaira Tei Anga. Akamaara i te kaveinga o Maseli 18:17: “Ko tei na mua i te akakite i tana tuatua, e ana nei e te tika ra tana, te aere maira ra tei patoi iaia, ei reira aia e kiteaʼi.” Eiaa e āriki ua i te au manako i te apii, e kimi marie i te au tuatua mou i roto i te Tuatua a te Atua, te Pipiria. E kimikimi i roto i ta tatou au puka. E tuatua ki te au taeake e te au tuaine tei irinaki i te mea tupu ua i mua ana. E ui kia ratou eaa ratou i irinaki ei e te vaira Tei Anga tei akaperepere ia tatou. Ka tauturu teia uriurianga ia koe kia akamou ki runga i te au mea tika.

9. Eaa taau i apii mai mei te akaraanga o Melissa?

⁹ Kua puapingaia te tuaine ko Melissa mei tana kimikimianga no runga i te au mea tei angaia.b Karanga aia: “I te apii kua apiiia te au mea tupu ua kia irinakiia te reira. I te akamata anga, kua mataku au i toku manako ekoko. Kua mataku au penei e tika te au mea tupu ua. Inara, kua manako au kare a Iehova e inangaro ia tatou kia tavini ua iaia ma te kore e tumu. No reira kua rave au i taku kimikimianga. Kua tatau au i te puka Is There a Creator Who Cares About You? e te nga poroutia Was Life Created? e The Origin of Life​—Five Questions Worth Asking. Ko teia tikai. Naringa rai au i apii vave i teia.”

10-11. Eaa te ka tauturu ia koe kia vai ma ua toou oraanga? (1 Tesalonia 4:3, 4)

¹⁰ Kopae i te au tu tau kore. I te tuatau mapu, ka pakari te inangaro i te pirianga ainga, e penei ka māroia koe kia rave i te ainga tau kore. Inangaro a Satani kia rave koe i te reira. Eaa te ka tauturu ia koe kia vai ma ua toou oraanga? (E tatau ia 1 Tesalonia 4:3, 4.) I roto i taau pure e akakite i toou manako ngakau kia Iehova. Taau manata ra, e pati i tana akamaroiroi anga. (Mata. 6:13) Akamaara e te inangaro ra a Iehova i te tauturu ia koe. (Sala. 103:13, 14) E akara ki te Tuatua a te Atua no te tauturu. Kua ngatā ia Melissa te patoi i te au manako tau kore. Karanga aia: “Na te tatauanga i te Pipiria i te au rā, kua tauturuia au kia kore e tuku i te au. Akamaara mai te reira e tei ia Iehova au e tei roto aia i toku oraanga.”​—Sala. 119:9.

¹¹ Eiaa e akatikatika ua i toou manamanata ko koe ua. E tuatua ki toou nga metua. Kare i te mea māmā kia tuatua kia raua inara e puapinga kia pera koe. Karanga a Melissa: “Kua pure au no te tu ngakau toa e oti kua tuatua au i toku manamanata ki toku tati. Kua maru mai au i muri mai. Kite au e kua mareka rava a Iehova iaku.”

12. Akapeea koe me iki i te au ikianga meitaki?

¹² Aratakiia e te au kaveinga Pipiria. Ka rauka ia koe te iki i taau au ikianga. Inara kua kotingaia toou kite. Akapeea koe me matakite anga kia kore toou pirianga kia Iehova e takinoia? (Mase. 22:3) Kua akakite te tuaine ko Kali tei tauturu iaia. Kua kite mai aia kare te au Kerititiano tukatau e anoano i tetai ture kia arataki i to ratou oraanga. Karanga aia: “Kua anoanoia au kia mārama i te au kaveinga Pipiria kare kia manako ua e e au ture ïa.” Me tatau i te Pipiria, e ui kia koe: ‘Eaa ta teia e akakite maira i to Iehova manako? E kaveinga ainei tetai ka aru au ei arataki iaku? Me koia ïa, eaa te puapinga kiaku me aru i te reira? (Sala. 19:7; Isa. 48:17, 18) Na te tatauanga i te Pipiria e te akamanako anga i te au kaveinga, ka māmā ua ia koe te tuku i te au ikianga e te akamareka ia Iehova. Ia koe e pakari maira, ka kite koe kare e anoanoia te ture no te au turanga ravarai no te mea kua mārama koe i to Iehova manako.

13. Eaa ta te au oa meitaki ka akatupu kia koe? (Maseli 13:20)

¹³ Iki i te au oa tei akaperepere ia Iehova. Mei tei taikuia, na taau ikianga i te au oa meitaki e tauturu ia koe i te pae vaerua ei Kerititiano. (E tatau ia Maseli 13:20.) Kua maromaroa a Sara. Inara kua tupu tetai apinga tei taui i tona tu. Akakite mai a Sara: “Kua rauka iaku te au oa meitaki i te tuatau tau. Kua apii kapiti maua ko tetai tuaine i te epetoma i Te Punanga Tiaki. Kua tauturu tetai oa iaku kia paupau i te uipaanga. No te tauturu a toku au oa kua rave au i taku uaorai apii e te pure. Kua piri vaitata au kia Iehova, e kua tupu akaou toku rekareka.”

14. Akapeea i rauka ai ia Julien te au oa meitaki?

¹⁴ Akapeea koe me akaoaoa i te aronga te ka akamaroiroi ia koe? Karanga a Julien, te tavini nei ei tangata pakari: “I toku mapu anga kua rauka toku au oa meitaki na roto i te tutu aere kapiti anga matou. E au oa maroiroi ratou, e kua tauturu iaku kia mataora taku tutu aere. Kua riro te angaanga tutu aere tamou e ko toku oraanga. Kua kite katoa mai au e kua ngere au i te au oa meitaki e te tukeke no te mea kua piri ua au ki te au oa aiteite te mataiti. I muri akera, kua rauka iaku te au oa meitaki i Betela. Kua tauturu te reira iaku kia iki meitaki i te au tarekareka anga tau, e kua akavaitata iaku kia Iehova.”

15. Eaa te akamatakite anga no te pirianga oa ta Paulo i akakite kia Timoteo? (2 Timoteo 2:20-22)

¹⁵ Akapeea me kua kite koe kare tetai i roto i te putuputuanga i te oa meitaki? Kua kite a Paulo kare tetai pae Kerititiano i te anere mataiti mua i te au oa meitaki, no reira kua akamatakite aia ia Timoteo. (E tatau ia 2 Timoteo 2:20-22.) Akaperepere tatou i to tatou pirianga oa kia Iehova. Auraka tatou e tuku i tetai kia akaparuparu ia tatou, kua angaanga pakari tatou i te akatupu i teia pirianga ki to tatou Metua i te rangi.​—Sala. 26:4.

AKAPEEA TE AU AKAKOROANGA ME TAUTURU IA KOE KIA TERE KI MUA I TE PAE VAERUA?

16. Eaa te au akakoroanga ka iki koe?

¹⁶ Akanoo i te au akakoroanga puapinga. E iki i te au akakoroanga te ka akamaroiroi ia koe. (Ephe. 3:16) Ei akaraanga, penei ka iki koe i te akameitaki atu i taau apii naau uaorai e te tatau Pipiria. (Sala. 1:2, 3) Penei ka akamanako meitaki koe i te tu o taau pure e te rave putuputu i te reira. Kia matakite i taau tarekareka anga e toou taime ka pou no te reira. (Ephe. 5:15, 16) Me kite a Iehova ia koe e tauta pakari ra kia tere ki mua i te pae vaerua, ka mareka aia.

17. Eaa te puapinga me tauturu koe i tetai ke?

¹⁷ Ka tupu ua atu koe ei Kerititiano me tauturu koe i tetai ke. Karanga a Iesu: “E mea meitaki i te oronga atu i te rave mai.” (Anga. 20:35) Ka puapingaia koe me taangaanga koe i toou taime e te totomapu ei tauturu i tetai ke. Ei akaraanga, e tauturu i te aronga pakarikari e te apikepike i roto i taau putuputuanga. Penei e tauturu i te oko mai i ta ratou kai e te taangaanga i au apinga apaipai. Me e taeake koe, e akamaroiroi kia riro koe ei tavini tauturu, kia akono i te au taeake e te au tuaine. (Phili. 2:4) Ka aroa katoa koe i te tangata i vao ake i te putuputuanga, na te tutu aere anga i te nuti meitaki o te Patireia kia ratou. (Mata. 9:36, 37) Me ka rauka, e akariro i te angaanga tutu aere tamou ei oraanga noou.

18. Akapeea te angaanga tutu aere tamou te tauturu anga ia koe kia pakari i te pae vaerua?

¹⁸ Ka riro te angaanga tutu aere tamou ei tuatau kia tere koe ki mua i te pae vaerua. Me tavini koe ei painia ka akatuera te reira i te ngutupa ki te Apii Tutu Evangeria Patireia. Penei ka rauka ia koe i te tavini i Betela me kore te angaanga pātuanga are no te Atua. Karanga te mapu painia ko Kaitlyn: “Na te akapouanga i te tuatau ki roto i te angaanga tutu aere ma te au taeake e te au tuaine karape, kua tauturu te reira iaku kia pakari i te pae vaerua i muri ake i toku papetitoanga. Kua riro to ratou akaraanga ei akaoonu i toku kite Pipiria e kia karape atu taku apiianga.”

19. Eaa te au akameitakianga ka rekareka koe me tere koe ki mua i te pae vaerua?

¹⁹ Ia koe e tere ra ki mua i te pae vaerua, ka kite koe i te au akameitakianga. Kare koe e kaimoumou i toou oraanga mapu no te au angaanga puapinga kore. (1 Ioa. 2:17) Kare i reira koe e mamae mei te au ikianga kino. Inara ka kite koe i te oraanga puapinga e te mataora. (Mase. 16:3) Ka riro toou akaraanga meitaki ei akamaroiroi i toou au taeake, te tamariki e te pakarikari. (1 Timo. 4:12) Te mea puapinga, ka rekareka koe i te tu ‘au me akamareka koe ia Iehova ma te pirianga oa kiaia.​—Mase. 23:15, 16.