1 | Pure—‘E Uri i to Kotou Tumatetenga Kiaia’

KARANGA TE PIPIRIA: “E uri i to kotou tumatetenga katoa ki [te Atua]; koia oki te tiaki.”—1 PETERO 5:7.

Te Aiteanga

Te pati maira te Atua ko Iehova ia tatou kia tuatua kiaia no tetai ua atu apainga teiaa i roto i to tatou manako e te ngakau. (Salamo 55:22) Noatu te manamanata nunui e te iti, e pure atu kiaia. Me e puapinga te reira kia tatou, e puapinga katoa kia Iehova. E mea puapinga kia pure kiaia kia rauka te ’au o te manako.—Philipi 4:6, 7.

Te Tauturu

Me tupu te maki manako kia tatou, ka maromaroa tatou me ko tatou ua. Kare tetai pae e mārama ana i ta tatou e na roto ra. (Maseli 14:10) Inara me akakite tatou i te reira ki te Atua na roto i te pure, ka akarongo mai aia ma te tu akaaroa e te mārama. Te kite maira a Iehova ia tatou, kua kite aia i to tatou mamae e te manamanata, e te inangaro maira aia kia pure tatou kiaia.—2 Paraleipomeno 6:29, 30.

Na te tuatua anga kia Iehova na roto i te pure, ka akaketaketa te reira i to tatou irinaki e te akaperepere maira aia ia tatou. Ka aite tatou mei te tata salamo tei pure: “Kua kite mai koe i toku vaerua i te au mate noku nei.” (Salamo 31:7) Na te mārama anga e te kite maira a Iehova ia tatou e akakoromaki ra, ka tauturu te reira ia tatou i te au tuatau ngatā. Inara e maata atu tana ka rave i te kite ua mai i to tatou taitaia. Kua mārama aia i ta tatou e na roto ra e ka akapumaana mai e ka akamaroiroi mai ia tatou na roto i te Pipiria.

Tauturu te Pipiria Ia Julian

Kua Apiapi Kino Au

“Tupu te apiapi kino e te maki obsessive-compulsive disorder (OCD) kiaku. E apiapi kino ana au i tetai au taime manako koreia. Tetai taime mako ua e oti kua apiapi kino akaou au e kare e tumu. Ka apiapi kino au i te ngai tangata. Ka manata kino au i ta ratou e manako ra iaku.

“Te aronga tei kite i toku turanga ka turuturu mai iaku. Tetai taime kare ta ratou tuatua e tauturu ana iaku. Inara āriki ua au i ta ratou tauturu pumaana.

“I tetai au taime, no toku apiapi kino e te OCD e ngatā iaku kia pure. Ka roiroi au i te akamanako anga i taku ka tuatua kia Iehova na roto i te pure. Ka rere ke toku manako—e kare e mou ana. Me taii toku manako, e ngatā i te akamanako i taku ka tuatua.”

Tauturu te Pipiria Iaku

“Apii mai au mei te Pipiria e kare e anoanoia kia roa te pure e kia karape te tuatua kia ārikiia e te Atua. Tetai taime me kare e rauka iaku te kite i taku ka tuatua, ka pure ua au: ‘E Iehova e, tauturu mai iaku ine.’ Kua kite au e te mārama maira a Iehova e kua tauturu mai iaku i taua taime. I te pae i te pure, kua rauka mai te rapakau anga a te taote. Te rekareka nei au i te akakite, mari ua ake teia nga tauturu, kua maru mai toku turanga. Kua pauna rai toku taime kia aere ki to tatou Metua i te rangi na roto i te pure no tana tauturu aroa.”