Me Tauturu i te Aronga Maki Manako

Te Aiteanga

Ka taitaia to tatou ngakau me rokoia tetai oa e te maki manako. Ka akaari tatou i to tatou aroa na te tauturu anga i to tatou oa kia akakoromaki i tona turanga maki manako. Akapeea ra?

Te Tauturu

‘Kia rapurapu i te akarongo.’​—IAKOBO 1:19.

Tetai mataara meitaki i te tauturu i toou oa koia oki kia akarongo me tuatua mai aia. Kare koe e anoanoia kia pau atu. E āriki i tana tuatua, e e akapumaana iaia. E akarongo ua i tona manako, eiaa e akaapa i tana tuatua. Akamaara e ka tuatua mai aia i te au tuatua tau kore kare i te mea akakoro.​—Iobu 6:2, 3.

“E akapumaana atu.”​—1 TESALONIA 5:14.

Penei te apiapi ra toou oa, me kore te manako puapinga kore ra iaia uaorai. Na te akaperepere anga iaia, ka akapumaana e ka akamaroiroi koe iaia, noatu kare koe e kite eaa taau ka tuatua.

“E aroa mairai te [oa] i te au tuatau katoa ra.”​—MASELI 17:17.

E oronga i te tauturu. E pati eaa taau ka rave, kare i taau e manako ra. Me ngatā i toou oa i te akakite mai i tona anoano, e pati kia rave korua i tetai angaanga, mei te aaere kapiti. Me kare kia aere korua ki te toa, te tāmā are, e te rave i tetai atu au angaanga.​—Galatia 6:2.

‘Kia akakoromaki.’​—1 TESALONIA 5:14.

Penei kare toou oa e inangaro i te tuatua mai. E akakite ki toou oa te inangaro ra koe i te akarongo kiaia me papa aia i te pukapuka mai. No tona maki, penei ka tuatua mai toou oa e ka rave aia i tetai mea ka mamae koe. Penei ka taui aia i ta korua parani me kore ka akariri. Kia akakoromaki e kia mārama me tauturu koe iaia.​—Maseli 18:24.

E Mea Meitaki te Tauturu Atu

“Ka akapapu au kiaia e e oa au nona. Noatu kare e rauka iaku i te akatikatika i tona manamanata, ka tauta ua au i te akarongo. I tetai au taime na te akarongo anga kiaia ko tana ïa e inangaro ra.”​—Farrah,a e maki akakore kai e te apiapi kino e te taitaia tona oa.

“E oa meitaki e te oraora tetai o toku au oa. Kua pati mai aia iaku ki tetai kaikai reka i tona kainga. Ma te turanga pumaana e te aroa, kua rauka iaku i te akakite i toku manako. Kua akamaroiroiia au!”​—Ha-eun, e maki taitaia tona.

“E puapinga maata te akakoromaki. Me rave taku vaine i tetai apinga te ka akariri iaku, ka akamaara ua au e e vaine makimaki aia, kare ko tera tona tu. Na teia e tauturu iaku kia kore e riri ua e kia aroa ua iaia.”​—Jacob, e maki taitaia tana vaine.

“Kua riro taku vaine ei tauturu e ei akapumaana iaku. Me tupu te manako apiapi, kare aia e māro mai kia rave au i tetai apinga kare au e inangaro i te rave. Tetai taime kare e rauka iaia i te rave i te au mea tana e inangaro ra i te rave. Kua riro tona tu akaatinga e te takinga meitaki ei akaperepere iaku.”​—Enrico, e maki apiapi kino tona.