Kia Puapinga Ua Mei te Mataku ia Iehova

1-2. Mei ia Lota, eaa te manamanata te tupu nei ki te au Kerititiano i teia tuatau?

ME KITE atu tatou i te kino o te tangata i teia tuatau, kua manako tatou ia Lota tuatua tika ra. “Ko tei mamae i te tuatua viivii a te aronga kino ra” kua kite aia te rikarika maira to tatou Metua i te rangi i te tu tau kore. (2 Pete. 2:7, 8) No tona mataku e te akaperepere i te Atua i akakeu ia Lota kia rikarika i te tu tau kore o te tangata. Maata katoa te au tangata i teia tuatau kare e akangateitei ana i to Iehova au turanga tau. Noatu ra, kia vai ma ua tatou me akaperepere i te Atua e te akangateitei iaia.—Mase. 14:2.

² Ka tauturu aroa mai a Iehova ia tatou na roto i te puka o Maseli. Ka puapingaia te au Kerititiano katoatoa, te au tane e te au vaine, te mapu e te pakarikari me akamanako ratou i te akoanga meitaki i roto i reira.

TE MATAKU I TE ATUA KA PARURU IA TATOU

3. Ia Maseli 17:3, eaa tetai tumu ka paruru tatou i to tatou ngakau? (Akara katoa i te tutu.)

³ Tetai tumu kia paruru i to tatou ngakau no te mea te akara matatio ra a Iehova i to tatou ngakau. E maata atu tana e kite maira e kua kite meitaki aia i to tatou tu. (E tatau ia Maseli 17:3.) Ka akaperepere aia ia tatou me akamanako tatou i tana akoanga pakari e ka rauka te ora mutu kore. (Ioa. 4:14) Kare i reira ta Satani au tu tau kore e te poitini e takino ia tatou. (1 Ioa. 5:18, 19) Me akavaitata atu tatou kia Iehova, ka tupu te aroa e te akangateitei iaia. No te mea kare tatou e inangaro i te tamamae i to tatou Metua, e mea rikarika na tatou i te rave i te ara. Me timataia kia rave i te tarevake, e ui tatou, ‘Eaa au ka tamamae ei i Tei aroa mai iaku nei?’—1 Ioa. 4:9, 10.

4. Akapeea te mataku ia Iehova te paruru anga i tetai tuaine kia kore e timataia?

⁴ Tata a Marta, e tuaine i Croatia tei timataia kia rave i te ainga tau kore e: “Ngatā iaku te akamanako e kia akakore atu i te anoano kia reka i te au mea navenave o te ara. Inara na te mataku ia Iehova i tauturu iaku.”b Akapeea te mataku ia Iehova te paruru anga iaia? Karanga a Marta e kua akamanako oonu aia eaa ta te kino ka tupu me rave aia i te reira. Kia pera rai tatou. Te mea kino roa atu, ka tamamae tatou i to Iehova ngakau e kare e akamori iaia e tuatau ua atu.—Gene. 6:5, 6.

5. Eaa taau ka apii mai mei tei tupu kia Leo?

⁵ Me mataku tatou ia Iehova, ka matakite tatou kia kore tatou e rave i te kino ei kotoe anga. Kua kite mai a Leo, e noo ra i Congo, i te apiianga. E a mataiti i muri ake i tona papetitoanga, kua piri atu aia ki te au oa kino. Kua manako aia me kare aia e rave ana i te kino, kare aia i apa i mua ia Iehova. Kare i roa i muri mai, kua akakeu tona au oa iaia kia kai kava e kia rave i te ainga tau kore. E oti kua akamata aia i te akamanako i ta tona nga metua Kerititiano i apii kiaia e te mataora tana e ngere ra. Eaa tei tupu mai? Kua rako tangata atura aia. Ma te tauturu a te aronga pakari, kua oki mai aia kia Iehova. I teia rā te tavini mataora nei aia ei tangata pakari e ei painia takake.

6. Eaa te akaraanga o te nga vaine ka uriuri tatou i teianei?

⁶ Ka uriuri ana tatou ia Maseli pene 9, no runga i te pakari e te neneva, mei tei akatutuia mai e te nga vaine. (Akaaite ia Roma 5:14; Galatia 4:24.) Ia tatou e uriuri ra i teia, e akamanako ana i to Satani ao kua kī i te ainga tau kore e te au peu ainga viivii. (Ephe. 4:19) E mea puapinga kia akatupu tatou i te mataku i te Atua e kia akaruke i te kino. (Mase. 16:6) No reira, ka puapingaia tatou pouroa, te tane e te vaine, mei teia pene. Te akataka maira teia i tetai nga vaine tei oronga i te patianga ki te aronga kamakura—te aronga “kite kore.” Kua karanga raua, ‘E aere mai ki toku are e kai i taku kai.’ (Mase. 9:1, 5, 6, 13, 16, 17) Inara e mea tuke te ka tupu mai.

KOPAE I TE AERENGA NENEVA

7. Ia Maseli 9:13-18, eaa tei tupu ki tetai o te nga patianga? (Akara katoa i te tutu.)

⁷ Akamanako ana i te patianga a te “vaine neneva.” (E tatau ia Maseli 9:13-18.) Kua kapiki maata aia ki te aronga kite kore, “E ariu mai” e kai i te kai. Eaa tei tupu? “E turama mate rava tei reira.” Penei, te maara nei ia koe te au tuatua tei kitea i mua atu i roto ia Maseli. Te akamatakite maira te reira no runga i te “vaine ke ra, i te akaturi.” Kua akakiteia mai: “Te eke ra oki tona are ki raro i te mate.” (Mase. 2:11-19) Te akamatakite maira a Maseli 5:3-10 i tetai “vaine akaturi” te “eke nei tona vaevae ki raro i te mate.”

8. Eaa te ikianga ka iki tatou?

⁸ E ikianga ta te aronga tei akarongo ki te “vaine neneva” ra: Ka āriki ainei ratou i tana patianga me ka kopae i te reira? Penei ka tupu katoa te reira kia tatou. Me maro mai tetai tangata kia rave tatou i te ainga tau kore, me kare kia akara i te au tutu ainga viivii tei akaariia i roto i te media e te Initaneti, eaa ta tatou ka rave?

9-10. Eaa tetai au tumu ka kopae tatou i te ainga tau kore?

⁹ Te vaira te au tumu ka kopae tatou i te ainga tau kore. Kua akakite te “vaine neneva” e: “E mangaro to te vai keiaia ra.” Eaa te “vai keiaia ra”? Kua akaaite te Pipiria i te pirianga ainga i rotopu i te tane e te vaine akaipoipo ki te vai anuanu. (Mase. 5:15-18) Mataora te tane e te vaine akaipoipo i te pirianga ainga. Inara, e tuke tikai te “vai keiaia.” Penei ko te ainga tau kore te reira. Ka rave uunaia te reira i te ngai muna, mei te keia rai. Penei ka akaraanga venevene te “vai keiaia” me manako te reira aronga e kare ratou e kiteaia mai. E neneva ratou! No te mea te kite maira a Iehova. Me ngere tatou i ta Iehova akameitakianga, e kino tikai te reira, kare i te mea “mangaro” e te vene reka. (1 Kori. 6:9, 10) Inara e maata atu te ka tupu.

¹⁰ Ka akatupu te ainga tau kore i te akamā, te manako puapinga kore, te nui kare e inangaroia, e te ke i roto i te ngutuare tangata. No reira, e kopae i te patianga a te vaine neneva ki tona “are” e te kai i tana kai. I te pae i te ngere anga i te pirianga oa kia Iehova, e manganui tei tuia e te au maki piri e kua mate atura. (Mase. 7:23, 26) Kua taopenga te irava 18 o te pene 9: “E tei raro rava tana tei Ade.” Eaa te manganui i ariki ei i taua patianga pikikaa te ka taki atu ki te mate?—Mase. 9:13-18.

11. Eaa te akarakara tutu ainga viivii ka riro ei ei mea kino tikai?

¹¹ Tetai ereere tei matauia ko te akarakara i te au tutu ainga viivii. Manako tetai pae kare te akarakara tutu ainga viivii i te mea kino. Inara, e peu kino tikai te akarakara i te au tutu ainga viivii, e rikarika, e e ngata i te akamutu. Me akara ua te tangata i te au tutu viivii, e ngatā i te akakore i roto i te manako. E kare te au tutu ainga viivii e akakore i te au anoano tau kore, ka akamura atu te reira. (Kolo. 3:5; Iako. 1:14, 15) Ae, e maata te aronga tei akarakara i te au tutu ainga viivii kua rave atu ratou i te au angaanga viivii.

12. Akapeea tatou me akaari e te patoi ra tatou i te au tutu tei akakeu i te ainga?

¹² Eaa ta tatou ka rave me ata mai te tutu ainga viivii i runga i ta tatou apinga uira? Auraka e akara i te reira. E kopae i te reira me akamaara tatou i to tatou pirianga akaperepere kia Iehova. Ko tetai au tutu tei manakoia kare i te au tutu ainga viivii penei ka akakeu katoa i te pirianga ainga. Eaa tatou ka kopae ei i te reira? No te mea kare tatou e inangaro i te akatupu i te akaturi i roto i to tatou ngakau. (Mata. 5:28, 29) Karanga tetai tangata pakari i Thailand ko David e: “Ka ui au kiaku uaorai: ‘Noatu kare teia au tutu i te au tutu ainga viivii, ka mareka ainei a Iehova me akara ua au i te reira?’ Na te akamanako anga i teia ka tauturu iaku kia rave i te ikianga pakari.”

13. Eaa te ka tauturu ia tatou kia rave i te ikianga pakari?

¹³ Ka tauturuia tatou me rave i te ikianga pakari na te akatupu anga i te mataku ia Iehova. Ko te mataku i te Atua ra “ko te akamataanga [ïa] o te pakari.” (Mase. 9:10) Kua akatutu papuia teia i te akamataanga o Maseli pene 9, kua akaaiteia te reira vaine ei vaine “pakari” mou.

ĀRIKI I TE PATIANGA MEI TE VAINE “PAKARI” MOU

14. Eaa te patianga tuke i roto ia Maseli 9:1-6?

¹⁴ E tatau ia Maseli 9:1-6. Te tatau nei tatou i tetai patianga no ko mai i te Tumu o te pakari, Tei Anga mai ia tatou. (Mase. 2:6; Roma 16:27) I roto i te irava te taiku ra i tetai are e nga pou e itu. Te akatutu maira i to Iehova tu oronga ua e te āriki ra i te aronga tei inangaro i te akono i tona tu pakari i te oraanga.

15. Eaa ta te Atua e pati maira kia rave tatou?

¹⁵ Kua riro a Iehova ei Atua Oronga meitaki rava atu. Te akaari maira teia au tu i te “pakari” mou, tei akatutuia e Maseli pene 9 ei vaine. Karanga te irava e kua akapapa aia i tana au kai, kua akapapa i tana wina, e kua akapapa i tana kaingakai i roto i tona are. (Mase. 9:2) I roto i te irava 4 e te 5: “Ko tei kite kore ra, te karanga atura aia [tei akatutu i te pakari] kiaia, E aere mai, e kai i taku nei kai.” Eaa tatou ka aere ei ki te are o te vaine pakari mou e ka kai i tana kai? Inangaro a Iehova i tana tamariki kia manako pakari e kia meitaki. Kare aia e inangaro kia rave tatou i te au tarevake—te ka tamamae ia tatou. No reira aia i ‘vaoo ua ai i te ora no te aronga tiratiratu.’ (Mase. 2:7) Me mataku tatou ia Iehova, ka inangaro tatou i te akamareka iaia. Ka akarongo tatou ki tana akoanga pakari, e ka mataora tatou i te akono i te reira.—Iako. 1:25.

16. Akapeea te mataku ia Iehova te tauturu anga ia Alain kia rave i tetai ikianga pakari, e eaa tei tupu?

¹⁶ Akamanako ana akapeea te mataku ia Iehova te tauturu anga ia Alain kia rave i te ikianga pakari. Akakite teia tangata pakari Kerititiano e puapii katoa e, “E maata toku au oa puapii te manako ra i te au teata ainga viivii ei ravenga no te apiianga i te ainga.” Inara kare a Alain i akavareia. “No toku mataku e te akangateitei ia Iehova,” karanga aia, “kare au i inangaro i te akara i taua au teata. Kua akamārama katoa au i te tumu ki toku au oa puapii.” Te aru ra aia i te akoanga “pakari” mou kia ‘aere na te ara kite ra.’ (Mase. 9:6) Umere tikai ratou i to Alain tu, kua apii tetai o tona au oa puapii i te Pipiria e kua aere ki te au uipaanga Kerititiano.

17-18. Eaa te au akameitakianga te mataora nei te aronga tei āriki i te patianga no te “pakari” mou, e eaa ta ratou ka tapapa atu? (Akara katoa i te tutu.)

¹⁷ Na te taangaanga anga i te akaraanga o nga vaine e rua, kua akanoo a Iehova i te tango kia mataora to tatou oraanga. Ko te aronga tei āriki i te patianga a te “vaine neneva” ra e kua kimi i te au anoano navenave “mangaro” ra. Te reka ra ratou i te oraanga o teianei, ma te kopae i te oraanga a te tuatau ki mua. ‘Tei raro rava to ratou openga ia Ade.’—Mase. 9:13, 17, 18.

¹⁸ E tuke te aronga tei āriki i te patianga a te vaine tei akatutu i te “pakari” mou! Mataora tana au manuiri i tetai kaingakai ma te au kai tei akapapa meitakiia, e au kai memeitaki i te pae vaerua. (Isa. 65:13) Karanga a Iehova na roto i te peroveta ko Isaia e: “Ka akarongo meitaki mai ana iaku, ka kai ei i te mea meitaki; e kia mareka to kotou vaerua i te kai matu ra.” (Isa. 55:1, 2) Te apii nei tatou i te inangaro i ta Iehova e inangaro ra e kia rikarika i tana e rikarika ra. (Sala. 97:10) Mataora katoa tatou i te pati i te katoatoa kia puapingaia mei teia “pakari” mou. Mei te mea te ‘kapiki nei tatou mei te au ngai teitei o te oire. Ko tei auouo ra, e ariu mai ki aku nei.’ Kare te aronga te ka ariu mai e puapinga uaia i teianei. Mari ra ka puapingaia ratou no tetai tuatau roa, e “kia ora” e tuatau ua atu ia tatou ‘e aere ra na te ara kite.’—Mase. 9:3, 4, 6.

19. Ia Koheleta 12:13, 14, eaa ta tatou ka tauta i te rave? (Akara katoa i te pia “Puapingaia Tatou me Mataku i te Atua.”)

¹⁹ E tatau ia Koheleta 12:13, 14. Ka riro te mataku ia Iehova ei paruru i to tatou ngakau e te tauturu ia tatou kia vai tiratiratu ua rai i teia tuatau kino. Ka riro taua mataku i te Atua ei akakeu ia tatou kia pati ua rai i te tangata kia kimi i te “pakari” mou e kia puapingaia.