Me Akara te Tane i te au Mea Ainga Viivii

• “Iaku, kore ake rai e te rave ra taku tane i te akaturi.”

• “Iaku, akamā au, kare e tau e kare e puapinga ana.”

• “Kare e rauka iaku i te akakite i te reira. Akakoromaki ua au.”

• “Iaku, kare a Iehova e manako mai ana.”

Te akaari maira te au tuatua i runga akenei i te mamae ngakau o tetai vaine me akara tana tane i te au mea ainga viivii. Me kua uuna te tane i te reira no tetai au marama me kore au mataiti, penei kare tana vaine e irinaki akaou iaia. Karanga ra tetai vaine: “Manako ana au e, ‘Koai teia tangata i te pae mai iaku? Eaa tana e uuna ra?’”

Kua akapapaia teia atikara no te au vaine te akara ra ta ratou tane i te au mea ainga viivii.a Ka uriuri teia atikara i te au kaveinga Pipiria te ka akapumaana e ka akapapu ki te vaine i ta Iehova tauturu i te pae manako ngakau e te pae vaerua.b

EAA TA TE VAINE E MAMAE RA KA RAVE?

Noatu e kare e rauka ia koe i te tāpu i ta to tane e rave ra, ka rauka ia koe i te akaiti mai i te manamanata na te akatupu anga i te ʼau. Akamanako ana i teia.

Auraka e akaapa ia koe. Penei ka manako te vaine e koia te tarevake me akara tana tane i te au mea ainga viivii. Kua manako ana a Alicec e kare aia e akara anga tau ki tana tane. Karanga aia, ‘Eaa ra taku tane i reka ai i te akara i tetai vaine ke, kare iaku?’ Kua akaapa tetai au vaine ia ratou uaorai, te irinaki anga e no reira i kino ei te turanga. Karanga ra a Danielle, “Kite mai au e e vaine riririri au e te akatupu pekapeka i roto i to maua akaipoipo.”

Me ko teia toou manako, e akamaara e kare a Iehova e akaapa ana ia koe no te tu o taau tane. Karanga ra a Iakobo 1:14: “Kia akatatipakeia tetai, e kia riro ua atu i te kino, kua pikikaaia te reira tangata i tona uaorai anoano tika kore.” (Roma 14:12; Phili. 2:12) Kare a Iehova e akaapa mai ia koe, te akaperepere ra aia i toou tu tiratiratu kiaia.—2 Para. 16:9.

Kia mārama katoa rai e me akara tetai tane i te au mea ainga viivii, kare te tikaanga e kare tana vaine i te vaine tau. Karanga ra te aronga kite i teia tu e te akakeu ra te au mea ainga viivii i te au anoano tau kore, kare e rauka i te vaine i te akatupu.

Auraka e manamanata. Karanga ra a Catherine e manako ua ana aia no runga i tana tane i te akara anga i te au mea ainga viivii. Karanga mai a Frances: “Manamanata au me kare au i kite e te aere ra taku tane kiea. Taitaia tikai au.” E akamā ana tetai au vaine i te pae i te au taeake e te au tuaine Kerititiano tei kite i te manamanata o ta ratou tane. Maromaroa tetai au vaine no te mea kua manako ratou e kare tetai tangata e mārama ana i to ratou turanga.

Tika rai, e tupu ana teia au manako. Ka manamanata rai koe me te manako ra koe i te reira. E tauta i te akamanako meitaki i toou pirianga kia Iehova. Na teia e akamaroiroi ia koe.—Sala. 62:2; Ephe. 6:10.

E tatau e e akamanako i te au vaine i roto i te Pipiria tei taitaia e tei akapumaanaia na te pure anga kia Iehova. Kare aia i akaatea pouroa ana i te manamanata, mari ra kua oronga aia i te ʼau kia ratou. “Kua tumatetenga rava” to Hana ngakau no tona manamanata. Muri ake te ‘pure anga ki mua i te aroaro o Iehova’ kua maru mai tona ngakau, noatu kare aia i kite e me ka taui rai tona turanga.—1 Samu. 1:10, 12, 18; 2 Kori. 1:3, 4.

E pati i ta te aronga pakari tauturu. Ka riro ratou ei “punanga i te uriia ra, mei te pipinianga i te matangi maata ra.” (Isa. 32:2) Ka pati ratou i tetai tuaine kia pukapuka korua e kia akamaroiroi mai ia koe.—Mase. 17:17.

KA RAUKA TE TAUTURU IAIA?

Ka rauka ainei i te tauturu i taau tane kia kore aia e akara i te au mea ainga viivii? Penei. Te akakite maira te Pipiria e “e meitaki nga tangata toko rua i te takitai” kia akatikatika i te manamanata. (Kohe. 4:9-12) Karanga ra te aronga apii i te reira e me tauturu te nga tokorua i tetai e tetai, ka rauka i te tane i te kopae ke atu i tona inangaro i te akara i te au mea ainga viivii e kia irinaki akaou mai tana vaine iaia.

Inara, ka anoanoia te tane kia tauta pakari i te akamutu i te akara i te au mea ainga viivii. Kua pati ainei aia kia Iehova e te aronga pakari no te tauturu e te maroiroi i te akamutu i teia peu? (2 Kori. 4:7; Iako. 5:14, 15) Kua akanoo ainei aia i tetai ravenga kia akamutu i teia peu penei kia akaiti i tona taime i te taangaanga i tana apinga electronic e te kopae i te au mea ka timata iaia? (Mase. 27:12) Ka āriki ainei aia i taau tauturu e kia akakite mai i te tika kia koe? Me rave aia i teia, ka rauka ia koe i te tauturu iaia.

Akapeea ra? Akamanako ana i teia akaraanga. Kua akaipoipo a Felicia ia Ethan, tei inangaro i te akara ua i te au mea ainga viivii mei tona meangiti anga mai. Kua akarongo ua a Felicia me akakite mai aia i tona inangaro i te akara i te au mea ainga viivii. Akamārama mai a Ethan: “E akakite ana au i te tika ki taku vaine. Kua tauturu aroa mai aia iaku kia kore e timataia e ka ui putuputu mai aia e peea ua nei. Ka tauturu mai aia iaku kia kore e aere putuputu ki runga i te Initaneti.” Mamae ngakau tikai a Felicia no to Ethan inangaro i te akara ua i te au mea ainga viivii. Karanga ra a Felicia, “Kare toku riri e te mamae i tauturu ana iaia kia akamutu i teia peu. I muri ake i ta maua uriuri anga i tona manamanata, kua rauka i taku tane i te tauturu mai iaku kia maru toku mamae.”

Ka tauturu te reira uriuri anga i te tane kia kore e akara i te au mea ainga viivii e pera katoa i te vaine kia irinaki akaou i tana tane. Me kare te tane e uuna i tana e akara ra, e rave ra e te ngai e aere ra ka mama ua i te vaine i te irinaki iaia.

Ka rauka ainei ia koe te tauturu i taau tane? Me ka rauka, e meitaki kia tatau e kia uriuri korua i teia atikara. Ko te akakoroanga o te tane kia akamutu i te akara i te au mea ainga viivii e kia rauka i tana vaine i te irinaki akaou iaia. Kare aia e riri mai ia koe, mari ra ka tauta aia kia mārama i te kino ta teia i akatupu kia koe. Ko te akakoroanga o te vaine kia tauturu i tana tane kia akamutu i tana peu e kia rauka i te tane i te akatupu akaou i to raua irinakianga. Ka anoanoia kia apii korua i te tumu i akara ai te tane i te au mea ainga viivii e akapeea me akamutu i tera peu.d

Me ka mataku koe e kare korua e tuatua maru ki tetai e tetai, e pati atu i tetai tangata pakari kia kapiti mai kia korua me uriuri korua no runga i te manamanata. Akamaara katoa e noatu kua rauka i te tokorua i te akakore atu i te inangaro i te akara i te au mea ainga viivii, penei ka roa rai te tuatau i te irinaki akaou iaia. Auraka e tuku i te au. E akara i te au mea meitaki i tupu i roto i to korua pirianga. E tapapa marie e ma te akakoromaki maata ka ketaketa akaou to korua pirianga akaipoipo.—Kohe. 7:8; 1 Kori. 13:4.

AKAPEEA ME KARE AIA E AKAMUTU?

Me akara akaou taau tane i te au mea ainga viivii, ko te aite anga ainei e kare e rauka iaia i te akamutu i teia peu? Kare. Me pakari tikai tona inangaro i te akara i te reira, ka ngatā iaia i te akamutu i teia peu. Ka oki akaou mai taua inangaro viivii noatu te au mataiti i akamutu ana aia i te reira. Kia kore e rave akaou i te reira, kia patoi pakari aia. (Mase. 28:14; Mata. 5:29; 1 Kori. 10:12) Ka anoanoia aia kia akatupu i te ‘vaerua ou o te ngakau’ e kia “rikarika i te kino”—mei te au mea ainga viivii e tetai atu au peu ainga viivii mei te amirimiri i te mero ainga. (Ephe. 4:23; Sala. 97:10; Roma 12:9) Ka tauta ainei aia i te taui? Me e ae, ka puapingaia tana tauta anga.e

Akapeea me kare toou tokorua e inangaro ana i te akamutu i tana peu? Penei ka taitaia e ka riri koe. Inara, ka rauka ia koe te ʼau na te uri anga i toou tumatetenga kia Iehova. (1 Pete. 5:7) Akavaitata atu kia Iehova na roto i te apii, te pure, e te akamanako oonu. Ia koe e rave ra i teia, te akavaitata katoa maira aia kia koe. Mei ta Isaia 57:15 e akakite maira, te noo nei aia i te pae i te aronga “tei tataraara, e tei akaaka,” i te tauturu ia ratou. E tauta kia riro koe ei Kerititiano meitaki rava atu. E pati i ta te aronga pakari tauturu. Kia irinaki ua e a tetai tuatau ki mua, ka rauka i taau tane i te rave i te taui anga ngakau tae.—Roma 2:4; 2 Pete. 3:9.