Mei ia Petero, E Aruaru Ua Koe

1. Eaa to Petero manako te rauka anga te au ika?

KUA roa akera i te po i to Petero tautai anga e kare e apinga. Kua tuatua atu a Iesu kiaia: “O atu ki te moana, tuku atu ei i ta kotou kupenga i tetai aronga ika.” (Luka 5:4) Kua ekoko a Petero me ka rauka mai te ika, inara kua ariu ua atu aia. Kua akamata te kupenga i te ngaae no te teiaa maata i te ika. Te kite anga ratou e kua tupu tetai semeio, kua “poitirere” a Petero e te aronga angaanga. Kua karanga atu a Petero: “E aere ke koe, e te Atu, e tangata ara oki au.” (Luka 5:​6-9) Kare a Petero i manako ana e kua tau aia i te pae ia Iesu.

2. Eaa te apiianga me akamanako tatou i to Petero akaraanga?

² E tika ta Petero—e “tangata ara” ua aia. Kua akakite mai te Tuatua Tapu e kua tuatua aia i tetai apinga e kua rave i tetai angaanga kua tataraara akera. Kua kite ana ainei koe i tei tupu kia Petero? Te tupu ra ainei te tu paruparu kia koe? E akamaroiroi ka rauka te apiianga mei to Petero akaraanga. Akapeea? Akamanako ana i teia: Ka mama ua kia kore e kapitiia atu te au tarevake o Petero ki roto i te tataanga Pipiria. Inara, kua tataia ei apiianga no tatou. (2 Timo. 3:​16, 17) Ka tauturu te akaraanga o teia tangata, tona tu paruparu e te au manako rererere, kia kite tatou kare a Iehova e anoano ana i te tu tiama. Inara kua inangaro aia e kia tauta ua rai tatou noatu te tu paruparu.

3. Eaa tatou ka aruaru ua?

³ Eaa ka anoanoia ai te tu aruaru? Te vaira tetai aerenga tuatua, E apiipii, ka meitaki atu ei. Ei akatutuanga: Ka akapou tetai tangata akatangi imene i te au mataiti i te apiipii kia karape aia i te taangaanga i tetai apinga akatangi. I taua taime ra, penei ka akatangi aia i te tangi anga ereni, inara me apiipii ua aia, ka meitaki mai tana akatangi anga. Noatu e kua karape aia i te akatangi, ka tarevake rai. Kare ra aia e tuku i te au. Ka apiipii ua atu aia kia nakirokiro i te reira. Pera katoa, me kua manako tatou e kua autu ia tatou te tu paruparu, ka unui rai ki muri. Inara ka apiipii ua atu tatou kia tupu te akakoroanga. Ka tuatua tatou e ka rave i tetai apinga ka tataraara a muri mai; inara kare tatou e tuku i te au, ka tauturu ua rai a Iehova ia tatou kia akameitaki ua atu. (1 Pete. 5:10) Akamanako ana i to Petero akaraanga i te aruaru ua. Kua aroa ua a Iesu iaia noatu tona tu ara ua e ka akamaroiroi ia tatou kia tavini pu ia Iehova.

TO PETERO AU TU PARUPARU E TE AU AKAMEITAKIANGA

4. Ia Luka 5:​5-10, eaa ta Petero i tuatua nona, inara akapeea a Iesu i te akamaroiroi anga iaia?

⁴ Kare te Tuatua Tapu i akakite mai i te tumu i kapiki ei a Petero iaia e e “tangata ara” ua e eaa tana ara e manako ra. (E tatau ia Luka 5:​5-10.) Inara kua rave aia i te au tarevake kino. Kua kite a Iesu i to Petero mataku, penei no tona au manako ekoko. Kua kite katoa a Iesu e ka vai tiratiratu a Petero. No reira kua akakite a Iesu kia Petero “eiaa e mataku.” Kua akamaroiroi ta Iesu tuatua papu ia Petero. I muri maira kua akaruke a Petero raua ko tona teina ko Anederea i ta raua angaanga tautai e kua riro ei pipi na te Mesia, e ikianga manea tei akatupu i te au akameitakianga.—Mare. 1:​16-18.

5. Eaa te au akameitakianga tei rauka ia Petero no te autu anga i tona mataku e te āriki anga i ta Iesu patianga?

⁵ Kua rauka ia Petero te au tupuanga manea ei pipi na Karaiti. Kua kite ana aia ia Iesu i te akaora i te maki, tuaru i te temoni, e te akatu mai i tei mate.b (Mata. 8:​14-17; Mare. 5:​37, 41, 42) Kua kite ana a Petero i te orama o Iesu i te Patireia kakā, tei akamaroiroi maata iaia. (Mare. 9:​1-8; 2 Pete. 1:​16-18) Ae kua kite atu a Petero i te au mea kare aia i manako ana. Kua mataora aia e kare i tuku i tona au manako ekoko kia arai iaia mei te kite anga i te au akameitakianga!

6. I autu viviki ainei a Petero i tona tu paruparu? Akamārama mai.

⁶ Noatu tana i kite e i akarongo ana, kua tupu rai te tu paruparu kia Petero. Akamanako ana i teia akaraanga. I te akamārama anga a Iesu e ka mamae aia e ka mate i te akatupu anga i te au totou Pipiria, kua ako atu a Petero iaia. (Mare. 8:​31-33) Ma te putuputu, kua tauetono a Petero e te au apotetoro i tei maata atu ia ratou. (Mare. 9:​33, 34) I te po i mua ake i to Iesu matenga, kua tipu a Petero i te taringa o tetai tavini. (Ioa. 18:10) I te reira po, kua mataku a Petero e e toru taime kua pikikaa aia i te kite anga i tona oa ko Iesu. (Mare. 14:​66-72) Kua aue maata atura a Petero.—Mata. 26:75.

7. Eaa akaou tetai angaanga i rauka ia Petero i muri ake i to Iesu tuakaouanga?

⁷ Kare a Iesu i akaruke ana i tana apotetoro taitaia. I te akatuakaouia anga a Iesu, kua rauka ia Petero te atianga kia aroa pu ua ia Iesu. Kua pati a Iesu ia Petero kia tiaki i tana mamoe ma te akaaka. (Ioa. 21:​15-17) Kua ariu ua a Petero. Tei Ierusalema aia i te rā Penetekote ma te aronga mua tei akatainuia e te vaerua tapu.

8. Eaa te tarevake kino ta Petero i rave i Anetioka?

⁸ Muri mai i tona riro anga ei Kerititiano akatainuia, kua tupu akaou te tu paruparu kia Petero. I te 36 T.N., tei reira a Petero i te akatainu anga te vaerua tapu i te Tutara ko Korenelio, e akairo taka meitaki e “kare te Atua e akono i te tu o te tangata” e ka piri mai te aronga Enua ke ki te putuputuanga Kerititiano. (Anga. 10:​34, 44, 45) Kua rauka atura ia Petero i te kaikai kapiti ma te aronga Enua ke, kare mei to mua ana. (Gala. 2:12) Inara, te manako ra tetai pae Kerititiano ngati Iuda e auraka ratou e kaikai kapiti ki te aronga Enua ke. Te tae anga mai tetai pae e ko to ratou manako ïa ki Anetioka, kua akamutu a Petero i te kaikai kapiti ki tona au taeake Enua ke, kua mataku aia i te au Kerititiano ngati Iuda. Kua kite atu te apotetoro ko Paulo i te reira tu pikikaa e kua ako atu ia Petero ki mua i te tangata. (Gala. 2:​13, 14) Noatu ra, kua aruaru ua a Petero. Eaa tei tauturu?

EAA TEI TAUTURU IA PETERO KIA ARUARU UA?

9. Akapeea a Ioane 6:​68, 69 te akaari mai anga i to Petero tu tiratiratu?

⁹ E tu tiratiratu to Petero; kare aia i tuku vave i te au. Kua tiratiratu aia i tetai atinga i te akakite anga a Iesu i tetai apinga kare tana au pipi i mārama. (E tatau ia Ioane 6:​68, 69.) Kare i tiaki i te akamārama anga, kua akamutu te manganui i te aru ia Iesu. Kare a Petero. Kua kite aia e tei ia Iesu anake “te tuatua o te ora mutu kore.”

10. Akapeea a Iesu i te irinaki anga ia Petero? (Akara katoa i te tutu.)

¹⁰ Kare a Iesu i akaruke katoa ia Petero. I te po openga o tona oraanga i te enua nei, kua kite a Iesu e ka akaruke a Petero e tetai au apotetoro iaia. Kua akakite a Iesu i tona irinaki e ka maroiroi akaou a Petero e ka vai tiratiratu kiaia. (Luka 22:​31, 32) Kua mārama a Iesu e “kua tika oki i te vaerua, te parukaua nei ra te kopapa.” (Mare. 14:38) Noatu e kua pikikaa a Petero i te kite anga ia Iesu, kare a Iesu i akaruke ana i tana apotetoro. Kua mama mai a Iesu tei akaoraia mai kia Petero—e koia anake ua. (Mare. 16:7; Luka 24:34; 1 Kori. 15:5) Kua akamaroiroi te reira i te apotetoro taitaia!

11. Akapeea a Iesu i te akamaroiroi ia Petero e ka tauturu ua a Iehova iaia?

¹¹ Kua akapapu a Iesu kia Petero e ka tauturu ua a Iehova iaia. Kua oronga mai a Iesu tei akaoraia mai i te ika ei semeio na Petero e tona au taeake apotetoro. (Ioa. 21:​4-6) Kua akamaroiroi teia semeio ia Petero e ka rauka ia Iehova i te oronga ua mai i te au mea o te kopapa kiaia. Penei kua maara i te au apotetoro i ta Iesu au tuatua e ka akono ua a Iehova i te aronga tei ‘na mua ra i te kimi i te basileia.’ (Mata. 6:33) I te aru anga i te reira kua akariro a Petero i te angaanga tutu aere e ko te mea mua i tona oraanga. Kua tuatua mataku kore aia i te rā Penetekote 33 T.N., te tauturu anga i te tauatini ua atu kia āriki i te tuatua meitaki. (Anga. 2:​14, 37-41) I muri mai kua tauturu aia i te aronga Samaria e te Enua ke kia āriki ia Karaiti. (Anga. 8:​14-17; 10:​44-48) Papu e kua taangaanga meitaki a Iehova ia Petero kia akaariu mai i te au tangata ravarai ki te putuputuanga.

EAA TE APIIANGA?

12. Te akamanako anga i to Petero akaraanga, eaa ta tatou ka akamaara me tupu putuputu te tu paruparu?

¹² Ka rauka ia Iehova te tauturu ia tatou me aruaru ua tatou. Penei ka ngatā i te aere ua atu, me tupu akaou tetai tu paruparu. Tetai taime kua akaraanga e kua kino atu to tatou tu paruparu i to Petero. Inara ka rauka ia Iehova te oronga mai i te maroiroi kia tauta ua atu tatou. (Sala. 94:​17-19) Ei akaraanga, kua rave tetai taeake i te oraanga homosexual no tetai au mataiti i mua ake ka apii ei i te tuatua mou. Kua akaruke tinamou aia i te reira peu ainga viivii. Inara i tetai taime, ka tupu ua mai teia anoano tarevake. Eaa tei tauturu iaia kia aruaru ua? Karanga aia: “Ka akamaroiroi a Iehova ia tatou.” E oti: “Ma tona vaerua . . . , kua kite mai au i te puapinga kia [akono ua] i te tuatua mou . . . kua taangaanga a Iehova iaku, noatu toku au tu paruparu e kua akamaroiroi mai iaku.”

13. Akapeea tatou me aru i te akaraanga o Petero, tei tataia ia Angaanga 4:​13, 29, 31? (Akara katoa i te tutu.)

¹³ Mei ta tatou i kite, kua tupu ua te tu paruparu te mataku tangata kia Petero. Na te pure anga kia rauka te tu mataku kore, kua ngakau toa a Petero. (E tatau ia Angaanga 4:​13, 29, 31.) Ka rauka katoa ia tatou te autu i te mataku. Akamanako ana i tei tupu kia Horst, e mapu taeake te ora ra i te tuatau o te Nazi i Tiamani. E maata te taime, kua tuku aia i te au i te apii e kua tuatua “Heil Hitler!” Kare i ako atu iaia, kua pure kapiti ratou ko te nga metua o Horst, i te pati anga kia Iehova kia o mai i te tu mataku kore kia Horst. Ma te tauturu a tona nga metua e te irinakianga ia Iehova, kua maroiroi e kua tu ngaueue kore a Horst. Akakite maira aia: “Kare roa a Iehova i akaruke ana iaku.”c

14. Akapeea te au tiaki akaperepere me akamaroiroi i te aronga paruparu?

¹⁴ Kare roa a Iehova e Iesu e akaruke ia tatou. Kua tupu te ikianga pakari kia Petero i tona pikikaa anga ia Karaiti. Ka tuku ainei aia i te au, me ka aruaru ua ei pipi na Karaiti? Kua pati akatenga ana a Iesu kia Iehova e auraka to Petero akarongo e akaruke iaia. Kua akakite a Iesu i te reira pure kia Petero e kua tuatua e ka rauka ia Petero i te akamaroiroi i tona au taeake. (Luka 22:​31, 32) Kua akamaroiroi te reira ia Petero i tona manako anga i ta Iesu au tuatua! Me tupu ana te ikianga pakari i roto i to tatou oraanga, ka taangaanga a Iehova i te au tiaki akaperepere i te akamaroiroi ia tatou kia vai tiratiratu. (Ephe. 4:​8, 11) E tauta ana te taeake ko Paul e tangata pakari no tetai tuatau roa i te akapumaana ua atu i te au taeake. Ka pati aia ki te aronga e manako paruparu ra kia akamanako i to Iehova akavaitata anga mai ia ratou ki te tuatua mou. I reira ka akapumaana aia ia ratou kare roa te aroa tiratiratu o Iehova e akariro Iaia kia akaruke ia ratou. Kua karanga aia, “Kua kite ana au i te aronga paruparu e manganui i te aruaru ua i te tavini ia Iehova ma Tana tauturu.” 

15. Akapeea to Petero e Horst akaraanga i te akakite mai i te tika anga o te tuatua a Mataio 6:33?

¹⁵ Mei ia Iehova i akono ia Petero e tetai atu apotetoro i te pae kopapa, ka akono rai Aia i to tatou anoano i te pae kopapa me tuku tatou i te angaanga tutu aere na mua. (Mata. 6:33) I muri mai i te Tamaki II i te Ao, ko Horst, tei taikuia i mua ana, kua painia aia. E tangata putaua aia e kua ekoko me ka rauka rai iaia te akono i tona anoano i te pae kopapa e te rave tamou i te angaanga tutu aere. Eaa tana ka rave? Kua timata aia ia Iehova, te akapouanga i te epetoma katoa i roto i te angaanga tutu aere i te tuatau te atoro maira te akaaere kotinga ia ratou. I te openga o te epetoma, kua poitirere aia i te oake anga te akaaere kotinga i tetai tikiro pakau aroa mei tetai taeake kiaia. E moni tei riro ei akono iaia i roto i te angaanga painia no tetai au marama. Kua irinaki a Horst i teia apinga aroa e ei akapapuanga mei ia Iehova e ka akono ua Aia ia Horst. Kua akapou aia i te katoa anga o tona oraanga i te tuku anga na mua te au mea o te Patireia.—Mala. 3:10.

16. Eaa i tau ei kia akamanako tatou i to Petero akaraanga e tana tataanga?

¹⁶ Kua mataora tikai a Petero e kare a Iesu i akaruke ana iaia, mei ta Petero i pati! Kua tereni ua atu a Karaiti ia Petero kia riro ei apotetoro tiratiratu e ei akaraanga meitaki ki te au Kerititiano. Te vaira te apiianga mei tei tataia o te reira terenianga kia tatou. Kua akakite mai a Petero i te au apiianga i roto i tana nga reta i tuku atu ki te au putuputuanga o te anere mataiti mua. Ka uriuri te atikara ka aru mai i teia au akamaaraanga mei teia nga reta e ka akapeea tatou me taangaanga i teia tuatau.