To te Atua Manako no te Inu Kava

E MEA akaperepere maata ta Iehova au apinga aroa, mei te tikaanga kia iki i ta tatou ka rave. Te akataka maira te Pipiria i te wina me kore te kava ei apinga aroa no ko mai i te Atua. Karanga te reira: “I akonoia te kaingakai ei akatupu i te kata, e rekareka te aronga e ora nei i te wina.” (Kohe. 10:19; Sala. 104:15) Inara, kua riro te inu kava ei manamanata no tetai aronga. Pera katoa, e tukeke te manako e te ture a te tangata no te inu kava. Eaa te ka tauturu i te au Kerititiano kia rave i te ikianga meitaki no te reira?

Me rave tatou i tetai ikianga, ka aru tatou i te manako o te Atua auraka i to te tangata. Ka mataora i reira to tatou oraanga.

Penei kua kite ana koe e e inu maata ana te tangata o teianei ao. Ka inu tetai pae kia mataora ratou e tetai pae kia akakore i te manamanata. I tetai au ngai, ka karangaia e na te aronga tumutoa e inu i te kava.

Inara, e kaveinga meitaki ta Tei Anga mai ia tatou i oronga no te au Kerititiano. Kua akakite aia i te kino ka tupu me inu maata i te kava. Ka kite tatou i te reira i roto ia Maseli 23:​29-35, te akataka maira i tetai tangata kua kona i te kava.a Karanga a Daniel, e Kerititiano no Europa mai no runga i tona oraanga i mua ake ka riro mai aia ei Kerititiano, “Kua inu maata au i te kava e kua rave i te au ikianga tau kore. Ko te tumu teia i tupu ei te au mea kino kiaku e tae mai ki teia rā.”

Akapeea tatou me rave i te ikianga meitaki no te inu kava kia kore te au manamanata e tupu? E mea puapinga kia aru tatou i to te Atua manako me iki i te inu kava.

Ka uriuri tatou i ta te Pipiria e karanga ra no te inu kava e te tumu i inu ei tetai pae i te reira.

TA TE PIPIRIA E AKAKITE MAIRA

Kare te Pipiria e ture i te inu tau ua i te kava. Te akakite maira te reira e ka riro te inu kava ei tamataora ia tatou. Karanga te irava: “Ka kai i taau kai ma te rekareka; ka inu ei i taau wina ma te pereperekavana o te ngakau.” (Kohe. 9:7) I tetai atianga, kua inu a Iesu e tetai au tavini tiratiratu o Iehova i te wina.—Mata. 26:​27-29; Luka 7:34; 1 Timo. 5:23.

Inara, noatu kare te Pipiria e ture i te inu kava, te akaapa ra te reira i te konā kava. Karanga ra: “Auraka e kona i te wina.” (Ephe. 5:18) Te akakite katoa maira te Pipiria, e ko “te konā kava, . . . kare anake ïa e noo i te basileia o te Atua.” (1 Kori. 6:10) Ae, e mea rikarika na Iehova te aronga inu maata i te kava e te konā kava. No reira, auraka tatou e aru ua i te peu a te tangata mari ra, e aru tatou i to te Atua manako.

Penei ka manako tetai pae kare ratou e kona i te kava noatu ka inu maata ratou i te reira. Inara e tarevake tera manako. Akapapu mai te Pipiria ko te “inu maata i te wina,” ka akakeu i tetai aronga kia rave i te tarevake te ka takino i to ratou pirianga kia Iehova. (Tito 2:3; Mase. 20:1) Akamatakite mai a Iesu e no ‘te maata o te kona,’ penei kare tetai pae e tae ki roto i te ao ou o te Atua. (Luka 21:​34-36) Eaa i reira te ka tauturu ia tatou kia kopae i te au manamanata no te inu maata i te kava?

AKAMANAKO I TE TUMU I INU EI KOE E TOOU TU

Me iki tatou i te inu kava, e mea kino kia aru i te peu a te tangata i to tatou ngai. Ka inangaro te au Kerititiano i te akamareka ia Iehova me iki i ta ratou ka kai e ka inu. Karanga te Pipiria: “E teianei, te kai ra e te inu ra oki, e te au mea ravarai ta kotou e rave na, e rave anake ïa ma te akakakā i te Atua.” (1 Kori. 10:31) No reira, e akamanako i teia au uianga e te au kaveinga Pipiria:

Ka inu ainei au i te kava kia rekaia mai au e tetai ke? Karanga a Exodo 23:2: “Auraka koe e aru i te urupu tangata.” Te akamatakite ra a Iehova i te ngati Iseraela, auraka kia aru i te au tangata tei akamareka kore iaia. Ka tau katoa teia no te au Kerititiano i teia tuatau. Me akatika tatou i tetai ke kia akakeu i to tatou manako e te ikianga no te inu kava, penei ka akamamao te reira ia tatou mei ia Iehova e tana au turanga.—Roma 12:2.

Ka inu kava ainei au kia manakoia mai ei tangata tumutoa? I tetai au ngai, e mea mātau ua no te tangata kia inu maata e te putuputu. (1 Pete. 4:3) Inara, akamanako ana i teia akamaroiroianga ia 1 Korinetia 16:13: “Kia matakite; kia mou piri tikai te akarongo; e akatangata pakari kotou; e akamaroiroi.” Ka tauturu ainei te kava i tetai tangata kia maroiroi atu? Kare. Ka akaparuparu te kava i te manako o tetai tangata e kare aia e rave i te au ikianga tau. No reira, me inu maata tetai tangata i te kava, kare tera i te akairo e e tumutoa aia mari ra, e neneva ïa. Kua akataka a Isaia 28:7 i te tangata tei inu maata e kua arara aere ratou i te kona e kua turoriia.

No ko mai ia Iehova te maroiroi kia matakite; e kia mou piri tikai te akarongo. (Sala. 18:32) Ka akapera tetai Kerititiano me matakite aia e me paruru viviki iaia uaorai mei te au mea te ka takino i tona pirianga kia Iehova. Kua akaari a Iesu i teia tu maroiroi iaia i te enua nei e no reira, kua akangateiteiia aia ei tangata tumutoa.

Ka inu ainei au i te kava ei akakore i toku manamanata? Kua akauruia te tata salamo kia karanga: “I rotopu i toku nei manako mirimiri-ngata i roto iaku nei, na to [Iehova] akapumaana e akarekareka mai i toku vaerua.” (Sala. 94:19) Me taitaia tatou i te au manamanata, e uri tatou kia Iehova kare ki te kava. Tetai ravenga meitaki no te rave i teia, ko te pure putuputu kia Iehova. Pera katoa, ka puapingaia tatou me pati i te tauturu a tetai oa meitaki i roto i te putuputuanga. E akamaara, me inu tetai tangata i te kava ei akakore i tona au manamanata, ka akaparuparuia aia e ka ngatā iaia i te rave i te mea tika. (Hose. 4:11) Karanga a Daniel tei taikuia i mua ana: “Kua taitaia au e kua manako puapinga kore. Ei akakore i toku au manamanata, kua inu au i te kava. Inara, kua kino atu te manamanata, kua ngere au i toku au oa, e kare au i manako meitaki ana iaku uaorai.” Eaa tei tauturu ia Daniel? Akakite aia: “Kua kite mai au e ka anoanoia au kia irinaki kia Iehova no te tauturu kare i te kava. Ma te tauturu a Iehova, kua rauka iaku i te akakoromaki i te manamanata.” Ae, ka tauturu ua rai a Iehova ia tatou noatu to tatou manamanata.—Phili. 4:​6, 7; 1 Pete. 5:7.

Me iki koe i te inu kava, e ui i teia au uianga kia kite e mei teaa rai toou turanga: ‘Kua tuatua ainei tetai kopu tangata me kore oa kiaku no runga i taku inu kava?’ Me koia ïa, penei te akaari ra teia e te akamata ra tetai manamanata i te tupu no te inu kava. ‘Te inu maata ra ainei au i teianei mei to mua ana?’ Penei ka akaari mai te pauanga e kua riro taau inu kava ei peu mātau ua. ‘E ngatā ainei noku i te akakore i te kava no tetai au rā?’ Me kare e rauka ia koe, e peu mātau ua te reira. Penei ka anoanoia te tauturu a te taote kia akakore i toou manamanata no te inu kava.

No te mea ka akatupu te kava i te manamanata, kua iki tetai au Kerititiano i te akakore takiri i te inu kava. E no tetai pae, kare ratou e inu kava no te mea kare ratou e reka ana i te reira. Me iki tetai taeake kia kore e inu i te kava, e akangateitei i tana ikianga e eiaa e akakino iaia.

Me kore, penei kua kite koe e mea meitaki kia akaiti i taau ka inu. Penei ka akanoo tetai Kerititiano eaa te maata tana ka inu. Ka akanoo aia i tetai ture no te putuputu o tana inu kava, penei e tai taime i te epetoma me kore me kaikai aia. E kua akanoo tetai pae i te kotinga no te inu i te wina me kore te kava, kare ra e inu i te kava pakari noatu e kua kairoia ki te vai venevene. Me akanoo tetai Kerititiano i te kotinga no tana ka inu, ka māmā ua i reira iaia i te rave i te tika. E kare tetai Kerititiano pakari e akamā i ta tetai ke ka manako no tana ikianga no te inu kava.

Me ka iki tatou i te inu kava, e akamanako tatou i tetai ke. Karanga a Roma 14:21: “E mea meitaki oki kia kore e kai i te puaka, e kia kore e inu i te wina, e kia kore e rave i te au mea ravarai e turori ei to taeake ra, e e maitu ei.” Akapeea koe me taangaanga i teia akoanga? E akaari i te aroa taeake. Me kite koe e ka turoriia toou taeake me inu koe i te kava, kare ainei te aroa e akakeu ia koe kia akakore i te reira? Me akapera koe, ka akaari koe i te aroa e te akangateitei no tetai ke, e ka kimi koe i to ratou meitaki, kare i toou uaorai.—1 Kori. 10:24.

Pera katoa, ka akanoo te au kavamani i te ture no te inu kava e kia aru te au Kerititiano i te reira. Penei ka akanoo te kavamani i te ture no te mataiti ka akatikaia tetai kia inu kava. Ka akanoo katoa te reira i te ture no te inu kava e te taangaanga i te apinga akaoro e tetai au matini angaanga.—Roma 13:​1-5.

Kua oronga mai a Iehova i te au apinga aroa, kapiti mai te tikaanga kia iki i ta tatou ka rave. Te ō maira te ikianga eaa ta tatou ka kai e ka inu. Kia akaari ta tatou ikianga e te akaperepere ra tatou i teia tikaanga e kia akamareka tatou i to tatou Metua i te rangi.