Au Uianga a te Aronga Tatau

Koai te vaine tei taikuia ia Isaia 60:​1, e akapeea aia me “tu ki runga” e te turama i te “mārama”?

Karanga a Isaia 60:1: “Ka tu ki runga, kia mārama koe, kua tae mai oki toou mārama, e kua iti mai te kakā o Iehova ki runga ia koe.” Te akataka maira te aerenga manako e ko Ziona me kore ko Ierusalema te vaine, koia te oire maata o Iuda i tera taime.a (Isa. 60:14; 62:​1, 2) Te akatutu maira te oire i te ngati Iseraela. Mei ta Isaia au tuatua, ka ui tatou e rua uianga: Te mea mua, Inaea e akapeea a Ierusalema i te ‘tu anga ki runga’ e te turama i te mārama? Te rua, te tupu ra ainei ta Isaia i totou i teia tuatau?

Inaea e akapeea a Ierusalema i te ‘tu anga ki runga’ e te turama i te mārama? Kua vai tanea ua a Ierusalema e tona iero no tetai 70 mataiti i te tuikaa anga te ngati Iuda i Babulonia. Inara te autu anga a Madai Peresia ia Babulonia, kua akarangatiraia te ngati Iseraela i te au enua katoa e kua akaueia ratou kia oki ki to ratou ipukarea no te akamata akaou i te akamorianga mou. (Ezera 1:​1-4) I te 537 M.T.N., kua oki tetai pupu no roto i te 12 kopu ki Ierusalema. (Isa. 60:4) Kua apai ratou i te au atinga na Iehova, kua akono i te au oroa e kua pātu akaou i te iero. (Ezera 3:​1-4, 7-11; 6:​16-22) Tei tupu, kua iti te kakā o Iehova ki runga ia Ierusalema, koia oki ki runga i tona iti tangata. Aru mai, kua riro ratou ei turama i te mārama ki te au pa enua kare i kite ia Iehova.

Inara, e tuanga iti ua o ta Isaia totou i tupu i Ierusalema i taito. Kare te maataanga o te ngati Iseraela i kauraro ki te Atua. (Nehe. 13:27; Mala. 1:​6-8; 2:​13, 14; Mata. 15:​7-9) E i muri, kua kopae ratou i te Mesia ko Iesu Karaiti. (Mata. 27:​1, 2) I te 70 T.N., kua takore takiriia a Ierusalema e tona iero.

Kua totou ke ana a Iehova e ka tupu te reira kia Ierusalema. (Dani. 9:​24-27) Te taka ua ra e kare aia i akakoro kia akatupu pouroa a Ierusalema i taito i te totou i roto ia Isaia pene 60.

Te tupu ra ainei ta Isaia i totou i teia tuatau? Ae, te tupu nei teia ki te vaine tei akatutuia ko “Ierusalema i runga ra.” Kua tata te apotetoro ko Paulo e: “Ko to tatou ravarai ïa metua vaine.” (Gala. 4:26) Ko Ierusalema i runga te akaaereanga a te Atua i te rangi ma te au vaerua ora e te tiratiratu. Ko tana tamariki ko Iesu e te 144,000 Kerititiano akatainuia, mei ia Paulo rai. Ko te au Kerititiano akatainuia te “iti-tangata tapu” e te “Iseraela o te Atua.”—1 Pete. 2:9; Gala. 6:16.

Akapeea a Ierusalema i runga i ‘te tu anga ki runga’ e te turama i tona “mārama”? Kua rave aia i teia na roto i tana tamariki akatainuia i te enua nei. E akaaite i tei tupu kia ratou ki te totou i roto ia Isaia pene 60.

Kua tu mai te au Kerititiano akatainuia ki runga, no te mea kua akapoiriia ratou e te au apiianga pikikaa i muri ake te mateanga te au apotetoro i te rua anere mataiti T.N. (Mata. 13:​37-43) Kua akatuikaaia ratou e Babulonia Maata, koia te au akonoanga pikikaa o teianei ao. Kua vai tuikaa ua te aronga akatainuia e tae ua atu ki “te openga o teianei ao,” tei akamata i te mataiti 1914. (Mata. 13:​39, 40) Aru mai, i te mataiti 1919, kua akarangatiraia ratou e i muri mai, kua turama ratou i te mārama pae vaerua na roto i te angaanga tutu aere.b I te au mataiti i aereia mai, e maata te tangata mei te au pa enua tei āriki i te mārama, kapiti mai te toenga o te Iseraela o te Atua, ko te “au ariki” tei taikuia ia Isaia 60:3.—Apo. 5:​9, 10.

A te tuatau ki mua, ka turama te aronga akatainuia i te mārama i te ao katoa. Akapeea ra? Me mate ratou i te enua nei, ka riro ratou e ko “Ierusalema ou,” me kore ko te vaine akaipoipo a Karaiti e 144,000 te katoa anga te ka tavini ei ui ariki e te kau taunga.—Apo. 14:1; 21:​1, 2, 24; 22:​3-5.

E tuanga puapinga ta Ierusalema Ou no te akatupu i te au tuatua i roto ia Isaia 60:1. (Akaaite ia Isaia 60:​1, 3, 5, 11, 19, 20 e Apokalupo 21:​2, 9-11, 22-26.) Mei ia Ierusalema i te enua nei tei riro ei ngai tutara no te ngati Iseraela, pera katoa a Ierusalema Ou ma Karaiti, ka riro ei tutara i te akatereanga ou. Akapeea a Ierusalema Ou te “eke anga mai mei ko mai i te Atua i runga i te rangi”? Na te tutara anga ki rungao i te enua nei. Ka rauka i te tangata tei mataku i te Atua i te “aaere i roto i tona mārama.” Ka kore katoa te ara e te mate. (Apo. 21:​3, 4, 24) I reira “e tupu ei te au mea katoa nei,” tei totouia e Isaia e te au peroveta. (Anga. 3:21) Kua akamata te tupuanga o te au mea katoa nei, te riro anga a Karaiti ei Ariki e ka taopenga te reira i muri ake i te Tutara Anga Tauatini Mataiti.