Kia Matakite ua Rai i te au Timataanga

1-2. (a) Eaa te au akamatakiteanga ta Iesu i oronga ki tana au pipi? (e) Eaa tana au pipi i akaruke ei iaia? (Akara katoa i te au tutu.)

“KUA tika oki i te vaerua [me kore te anoano], te parukaua nei ra te kopapa.”a (Mata. 26:41e) Mei teia au tuatua, kua mārama a Iesu i to tatou tu apa ua. Inara, kua oronga katoa mai tana au tuatua i tetai akamatakiteanga: Auraka tatou e manako e kare tatou e inga. I taua po rai, kua akakite papu tana au pipi e kare ratou e akaruke i to ratou Atu. (Mata. 26:35) Kua inangaro ratou i te rave i te tika. Inara, kare ratou i manako ana e ka timataia ratou. No reira a Iesu i akamatakite ei ia ratou: “E ara, e e pure oki kia kore kotou e rokoia e te timataanga.”—Mata. 26:41a.

² Te mea tangi ra, kare te au pipi i rave i te reira. Te tapekaia anga a Iesu, kua noo ainei ratou i te pae iaia, me kua mataku ratou e kua oro? No te mea kare ratou i matakite, kua rave te au pipi i te au mea kare i manakoia ana e kua akaruke ratou ia Iesu.—Mata. 26:56.

3. (a) Kia vai tiratiratu kia Iehova, eaa ra tatou ka matakite ua ai? (e) Eaa ta tatou ka uriuri i roto i teia atikara?

³ Auraka tatou e manako e kare tatou e inga. E tika, kare tatou e inangaro i te rave i tetai apinga te ka akamareka kore ia Iehova. Inara, ka māmā ua ia tatou i te rave i te au tarevake no to tatou tu ara. (Roma 5:12; 7:​21-23) Me kare tatou e matakite, ka tupu poitirere ua te au timataanga e ka ngatā i te kopae i te reira. Kia vai tiratiratu kia Iehova e tana Tamaiti, ka anoanoia tatou kia aru i ta Iesu akoanga kia vai matakite ua tatou i te au timataanga. Ka tauturu teia atikara ia tatou kia rave i teia. Te mea mua, ka uriuri tatou eaa te au turanga kia matakite tatou. E oti akapeea me paruru ia tatou mei teia au timataanga. Te openga, ka akamanako tatou akapeea me vai matakite ua.

KIA VAI MATAKITE UA —I TEEA TURANGA?

4-5. Eaa i puapinga ai kia patoi pakari tatou i te ara?

⁴ Noatu kare e kino ana tetai au ara, ka akaparuparu ra te reira i to tatou pirianga kia Iehova. E pera katoa, ka taki atu ki te au ara kino tikai.

⁵ Ka rokoia tatou pouroa e te au timataanga. Inara e tuke to tatou au turanga paruparu, e ka ngatā tetai au timataanga i te kopae. Ei akaraanga, penei ka timataia tetai tangata kia rave i te ara kino mei te ainga tau kore. E penei tetai pae ka timataia kia rave i te au peu viivii mei te amirimiri i te mero ainga e te akarakara i te au tutu e te au teata ainga viivii. E tetai pae, e ngatā ia ratou i te takore i te tu riririri, ngakau parau, te aru i te manako tangata me kore tetai ua atu mea ke. Mei ta Iakobo i tuatua, “kua pikikaaia te reira tangata i tona uaorai anoano tika kore.”—Iako. 1:14.

6. Eaa ta tatou ka akara matatio atu?

⁶ Kua kite ainei koe i te au turanga te ka timata ia koe? Me kopae tatou i to tatou au tu paruparu e me manako tatou e kare tatou e inga, ka tupu te tumatetenga. (1 Ioa. 1:8) E akamaara, kua akakite a Paulo ki te au taeake “tei akono i ta te vaerua ra,” e ka timataia ratou me kare ratou e matakite. (Gala. 6:1) No reira, kia akara matatio ia tatou uaorai e kia matakite i to tatou tu paruparu.—2 Kori. 13:5.

7. Eaa tikai ta tatou ka matakite? Akatutu mai.

⁷ Me kite tatou i tetai turanga te ka timata pakari ia tatou, eaa ta tatou ka rave? E tauta pakari i te patoi atu i te reira! Ei akatutuanga, i te tuatau Pipiria ko te ngai paruparu roa atu o te au oire, ko te au ngutupa. No reira i maata ei te au tiaki i ko i te ngutupa kia paruru i te oire. Ka anoano katoaia tatou kia akara matatio i to tatou au tu paruparu e kia kopae atu i te au timataanga.—1 Kori. 9:27.

AKAPEEA ME PARURU IA TATOU UAORAI?

8-9. Akapeea te mapu tane tei taikuia i roto ia Maseli pene 7 me kopae i te au ara kino? (Maseli 7:​8, 9, 13, 14, 21)

⁸ Akapeea tatou me paruru ia tatou uaorai? Akamanako i ta tatou ka apii mai mei te mapu tane i roto ia Maseli pene 7. Kua piri ainga aia ki tetai vaine akaturi. Te taiku ra te irava 22 e kua arumaki atura te mapu tane iaia. Inara, te akaari ra te au irava i mua atu e kua rave aia i tetai au takainga tei taki atu iaia kia rave i te ara.

⁹ Eaa tei taki atu iaia kia rave i te ara kino? Te mea mua, i te aiai “te aere ua ra aia na te arataa i vaitatao [i to te vaine akaturi] ngai.” E oti, kua aere tika atu aia ki tona are. (E tatau ia Maseli 7:​8, 9.) Aru mai, te kite anga aia i te vaine, kare aia i uri ke. Mari ra, kua ongi te vaine iaia e kua akarongo aia i te au tuatua akavare a te vaine e kare e kino ta raua e rave ra. (E tatau ia Maseli 7:​13, 14, 21.) Naringa te mapu tane i kopae i te au turanga tei taki atu iaia ki te ara, ka paruruia aia kia kore e timataia.

10. I teia tuatau, akapeea tetai tangata me rave i te tarevake mei ta te mapu tane i rave?

¹⁰ Te akatutu maira ta Solomona i tata eaa te ka tupu ki tetai ua atu tavini o Iehova. Penei ka rave aia i te ara kino e i muri mai, ka karanga e kua tupu poitirere ua te reira. Me kore ka karanga aia, “Kare i te mea akakoro.” Inara me akamanako aia eaa tei tupu kiaia, penei ka kite mai aia i te au tarevake tana i rave tei taki atu ki te ara. Te ō maira te kapitianga kino, te au teata tau kore, me kore te au ngai e te au website kare e tau no te au Kerititiano. Penei kua akamutu aia i te pure, te tatau i te Pipiria, te aere ki te au uipaanga me kore te tutu aere. Mei te mapu tane i roto ia Maseli, kua rave aia i te au ikianga tarevake tei taki atu ki te ara kino.

11. Eaa ta tatou ka kopae kia kore tatou e rave i te ara?

¹¹ Eaa te apiianga no tatou? E kopae tatou i te ara e te au takainga te ka taki atu ki te reira. Ko tera ta Solomona i akamārama i tona akakite anga i te tua o te mapu tane e te vaine akaturi. Kua tuatua aia no te vaine: “Auraka koe e aere ke na tona ra au mataara.” (Mase. 7:25) Karanga katoa aia: “Kia atea ke atu toou aerenga iaia; auraka e akavaitata atu ki te ngutupa o tona are.” (Mase. 5:​3, 8) Ae, ka paruru tatou ia tatou uaorai mei te rave anga i te ara kino na te kopae anga i te au turanga te ka taki atu ia tatou kia rave i te reira.b Ko te aiteanga, noatu kare i te mea tarevake tetai angaanga ki te au Kerititiano, ka kopae tatou i te reira me ka timataia tatou kia rave i te ara.—Mata. 5:​29, 30.

12. Eaa te ikianga papu ta Iobu i rave, e akapeea te reira te paruru anga iaia mei te au timataanga? (Iobu 31:1)

¹² Kia kopae i te au turanga te ka taki atu ki te ara, ka anoanoia tatou kia rave i te au ikianga meitaki. Ko teia ta Iobu i rave. Akakite aia e “kua papau [aia] i te koreromotu i [tona] mata” auraka rava aia e akara i tetai vaine ke ma te akainangaro iaia. (E tatau ia Iobu 31:1.) Na te akono anga i tana i koreromotu, kare rava aia i akaturi. Pera katoa, kia rave tatou i te au ikianga papu kia kore tatou e rokoia e te timataanga.

13. Eaa tatou ka paruru ei i to tatou manako? (Akara katoa i te tutu.)

¹³ Ka paruru katoa tatou i to tatou manako. (Exo. 20:17) Irinaki tetai pae e kare e kino ana kia akamanako ia ratou e rave ra i te ara. E tarevake teia. Me akamanako ua rai te reira tangata i te au mea tarevake, ka akakeuia aia kia rave i te ara. Me pera aia, ka ngatā iaia i te kopae i te au tarevake. E tika, i tetai au atianga ka ō mai te au manako tarevake. Me tupu teia, te mea puapinga e patoi viviki i te au manako tarevake e te tauta i te akamanako i te mea meitaki. Me rave tatou i teia, ka paruruia tatou kia kore e rave i te au ara kino no te mea kare tatou e tuku i te au manako tarevake kia akatere ia tatou.—Phili. 4:8; Kolo. 3:2; Iako. 1:​13-15.

14. Eaa atu ta tatou ka rave kia paruru ia tatou uaorai mei te au timataanga?

¹⁴ Eaa atu ta tatou ka rave kia paruru ia tatou uaorai mei te au timataanga? Kia irinaki papu tatou i te puapinga me akono tatou i ta Iehova au ture. Tetai taime, penei ka ngatā ia tatou i te akarotai i to tatou au manako e te au inangaro kia tau ki to Iehova anoano. Inara me tauta pakari tatou i te rave i te reira, ka mataora tatou.

15. Akapeea te akatupu anga i te au anoano meitaki me paruru ia tatou mei te au timataanga?

¹⁵ Ka rauka ia tatou i te akatupu i te au anoano meitaki. Kua apii tatou “kia rikarika i te kino, e kia inangaro i te meitaki.” Ka tauturu teia ia tatou kia rave i te meitaki e te kopae i te au turanga te ka taki atu ki te ara. (Amo. 5:15) Me e anoano meitaki to tatou, ka viviki tatou i te kopae i te au timataanga me tupu poitirere ua mai te reira.

16. Akapeea te au angaanga pae vaerua me tauturu ia tatou kia vai ara ua? (Akara katoa i te tutu.)

¹⁶ Akapeea tatou me akatupu i te au anoano meitaki? E rave maroiroi tatou i te au angaanga pae vaerua. Me aere putuputu tatou ki te au uipaanga e me tutu aere, kare tatou e timataia i te rave i te tarevake. Mari ra, ka inangaro tatou i te akamareka ia Iehova. (Mata. 28:​19, 20; Ebe. 10:​24, 25) Na te tatau e te apii anga i te Tuatua a te Atua e te akamanako oonu i te reira, ka akaketaketaia to tatou inangaro i te rave i te meitaki e kia rikarika i te kino. (Iosu. 1:8; Sala. 1:​2, 3; 119:​97, 101) E akamaara, kua akakite a Iesu ki tana au pipi: “E pure oki kia kore kotou e rokoia e te timataanga.” (Mata. 26:41) Me pure tatou ki to tatou Metua i te rangi, ka tauturu mai aia ia tatou kia akaketaketa i to tatou inangaro i te akamareka iaia.—Iako. 4:8.

KIA VAI ARA UA

17. Eaa te au tu paruparu tei tamanamanata ia Petero?

¹⁷ Penei ka rauka ia tatou i te takore takiri i tetai au tu paruparu o tatou. Inara ka riro tetai au tu paruparu i te tamanamanata ia tatou. Akamanako ana i te akaraanga o te apotetoro ko Petero. No tona mataku i te tangata kua uuna aia ia Iesu e toru taime. (Mata. 26:​69-75) I te akaraanga kua autu a Petero i tona tu mataku i te tutu aere anga aia ma te ngakau toa ki mua i te aroaro o te Sunederi. (Anga. 5:​27-29) Inara i te au mataiti i muri mai, kua akamutu aia i te kaikai kapiti ki te au Kerititiano kare i te ngati Iuda no “te mataku i to te peritome,” koia te au Kerititiano ngati Iuda. (Gala. 2:​11, 12) I te reira taime, kua mataku akaou a Petero. Penei kare i rauka iaia i te akaruke takiri i tona tu mataku.

18. Eaa tatou ka matakite ei i to tatou au tu paruparu?

¹⁸ Penei ka ō katoa tatou i roto i teia turanga? Akapeea ra? Ko tetai tu paruparu ta tatou i manako e kua ngaro takiri, penei ka oki akaou mai i te timata ia tatou. Ei akaraanga, kua akakite tetai taeake: “No tetai 10 mataiti, kua akamutu au i te akarakara i te au teata ainga viivii e kua papu iaku e kare oku manamanata no te reira. Inara i tetai au atianga, kua timataia au kia akara akaou i te reira.” Ko te mea meitaki ra, kare aia i tuku i te ’au. Kua kite mai aia e ka tauta pakari aia i te patoi i te reira timataanga i te au rā ravarai. Ma te tauturu a tana vaine e te aronga pakari i roto i te putuputuanga, kua vai matakite ua aia e kua akaruke takiri i te akarakara i te au teata ainga tau kore.

19. Akapeea tatou me patoi atu i te tu paruparu?

¹⁹ Akapeea tatou me patoi atu i te tu paruparu? Na te aru anga i te ako a Iesu: “E ara,” koia oki kia matakite i te au timataanga. Noatu te manako ra koe e kare koe e inga, e kopae i te au turanga te ka taki atu ki te timataanga. (1 Kori. 10:12) E rave i te au mea te ka tauturu ia koe kia autu i toou tu paruparu. Karanga a Maseli 28:14: “E ao to te tangata kare i tivata i te mataku [koia oki kia vai matakite] ua.”—2 Pete. 3:14.

TE AU AKAMEITAKIANGA ME VAI ARA UA

20-21. (a) Eaa te au akameitakianga me patoi ua rai tatou i te au timataanga? (e) Me rave tatou i ta tatou tuanga, eaa ta Iehova ka rave no tatou? (2 Korinetia 4:7)

²⁰ E mea papu, me vai ara ua tatou e te patoi i teia au timataanga ka puapingaia tatou. Noatu “te navenave poto ua” o te ara, me akono tatou i ta Iehova au kaveinga ka mataora to tatou oraanga. (Ebe. 11:25; Sala. 19:8) No te mea kua angaia tatou kia akono i tona au aerenga i roto i to tatou oraanga. (Gene. 1:27) Me pera tatou, ka mā to tatou akava ngakau e ka rauka ia tatou te ora mutu kore.—1 Timo. 6:12; 2 Timo. 1:3; Iuda 20, 21.

²¹ E tika te parukaua nei te kopapa. Inara ka rauka te tauturu. Ka oronga ua mai a Iehova i tona mana kia tatou. (E tatau ia 2 Korinetia 4:7.) E mana maata ta te Atua ka oronga mai inara kia taangaanga tatou i to tatou uaorai maroiroi kia patoi atu i te au timataanga. Me rave tatou i ta tatou tuanga, e mea papu e ka pau mai a Iehova i ta tatou au pure e ka akamaroiroi ia tatou. (1 Kori. 10:13) Ae, ma te tauturu a Iehova ka matakite ua rai tatou i te au timataanga.