Au Apiianga Puapinga Mei te au Ariki o Iseraela

1-2. Eaa ta te Pipiria e akakite maira no te au ariki o Iseraela?

TE AKAKITE maira te Pipiria i te au ingoa o tetai 40 tuma tangata tei tutara ei au ariki no Iseraela.a Te akakite katoa ra te reira i te tika no runga ia ratou. Ei akaraanga, kua rave tetai au ariki meitaki i te kino. E akamanako i te Ariki ko Davida. Karanga a Iehova nona: “Ko tei akono i taku au akauenga, e tei aru mai iaku ma tona ngakau katoa ra, i te akono anake anga i tei tau ki toku mata nei.” (1 Ari. 14:8) Inara, kua akaturi a Davida ki tetai vaine akaipoipo e kua parani kia tamateia tana tane i roto i te tamaki.—2 Samu. 11:​4, 14, 15.

² I tetai tua, kua rave te au ariki tiratiratu kore i te meitaki. Akamanako ana ia Rehoboama. I roto i te mata o Iehova, “kua rave aia i te kino.” (2 Para. 12:14) Noatu ra, kua akarongo a Rehoboama i te akauenga a te Atua kia akatakake te kopu tino ngauru mei tona patireia. Pera katoa, kua puapingaia te iti tangata no te mea kua akaketaketa aia i tona au oire.—1 Ari. 12:​21-24; 2 Para. 11:​5-12.

3. Eaa te uianga puapinga ta tatou ka ui, e eaa ta tatou ka uriuri i roto i teia atikara?

³ Ka ui i reira tatou i teia uianga puapinga: Me kua rave ana te au ariki o Iseraela i te meitaki e te kino, akapeea a Iehova te akava anga i tetai ariki ei ariki meitaki? Ka tauturu te pauanga ia tatou kia mārama i ta tatou ka rave ei akamareka ia Iehova. I roto i teia atikara, ka uriuri tatou e toru tumu ka akamanako a Iehova me akava aia i te au ariki o Iseraela: te turanga o to ratou ngakau, to ratou tu tataraara e ta ratou akamori anga ia Iehova anake.

KUA TAU TO RATOU NGAKAU KIA IEHOVA

4. Eaa tetai tuke i rotopu i te au ariki meitaki e te au ariki kino?

⁴ Ko te au ariki tei akamareka ia Iehova, kua akamori ratou iaia ma te ngakau katoa.b Ko te Ariki ko Iehosaphata, kua “kimi [aia] ia Iehova ma tona ngakau katoa.” (2 Para. 22:9) Karanga te Pipiria no Iosia: “Kare takiri ïa ariki e aite iaia mei muatangana mai, tei ariu kia Iehova ma te ngakau katoa.” (2 Ari. 23:25) Akapeea a Solomona tei rave i te kino i muri mai? “Kare akenei tona ngakau i tau ki tona Atua kia Iehova.” (1 Ari. 11:4) Karanga katoa te Pipiria no te ariki tiratiratu kore ko Abiama: “Kare oki tona ngakau i tau ki tona Atua ki[a] Iehova.”—1 Ari. 15:3.

5. E akamārama mai i te aiteanga kia tavini ia Iehova ma te ngakau katoa.

⁵ Eaa te aiteanga kia tavini ia Iehova ma te ngakau katoa? Ko tetai tangata kua tau tona ngakau kia Iehova, kare aia e akamori i te Atua no te mea ka anoanoia aia kia rave i te reira. Mari ra, ka akamori aia i te Atua no tona inangaro e te akangateitei iaia. Pera katoa, ka akono tamou aia i teia nga tu i roto i tona oraanga.

6. Akapeea tatou me tavini ia Iehova ma te ngakau katoa? (Maseli 4:23; Mataio 5:​29, 30)

⁶ Akapeea tatou me aru i te au ariki tiratiratu e te tavini ia Iehova ma te ngakau katoa? Na te kopae anga i te au peu viivii. Ei akaraanga, ka akatupu te tamataoraanga tau kore i te ngakau rua i roto ia tatou. Kapiti mai ki teia te au pirianga oa kino e te anoano maata i te moni e te apinganui. Me kite tatou i tetai apinga te ka akaparuparu i to tatou inangaro ia Iehova, kia viviki tatou i te takore i te reira.—E tatau ia Maseli 4:23; Mataio 5:​29, 30.

7. Eaa i puapinga ai kia kopae tatou i te au peu viivii?

⁷ Auraka tatou e akatupu i te ngakau rua. Me kare tatou e matakite, penei ka manako tatou e me maata ta tatou angaanga pae vaerua e rave ra, kare tatou e akakeuia kia rave i te au peu viivii. Ei akatutuanga, akamanako ana e tei vao koe i tetai ngai anuanu tikai e te matangitangi. E oti, me tomo koe ki roto i te are, ka pata koe i te matini no te tamaana i te are. Eaa te puapinga o te reira me te tuera ua ra te ngutupa? Ka tae viviki mai te anu ki roto i te are. Eaa te apiianga? E maata atu ta tatou ka rave i te kai i te au kai pae vaerua ei akamatutu i to tatou pirianga kia Iehova. Ka anoano katoaia tatou kia topiri i te ngutupa ki te au peu viivii kia kore te “reva” anu o teianei ao, koia oki te au tu akono kore i te Atua e akatupu i te ngakau rua i roto ia tatou.—Ephe. 2:2.

KUA TATARAARA RATOU MA TE NGAKAU TAE

8-9. Akapeea te Ariki ko Davida e te Ariki ko Hezekia te āriki anga i te akoanga? (Akara katoa i te tutu.)

⁸ Mei tei taikuia i mua ana, kua rave te Ariki ko Davida i te ara kino. Inara te ako anga te peroveta ko Natana iaia, kua tataraara a Davida ma te ngakau akaaka. (2 Samu. 12:13) Mei tana i tata i roto ia Salamo 51, ka kite tatou e kua tataraara aia ma te ngakau tae tikai. Kare to Davida tu tataraara i te mea akatutu ua ei akavare ia Natana e kia kore aia e akautungaia no tana ara i rave.—Sala. 51:​3, 4, 17, tataanga i runga.

⁹ Kua ara katoa te Ariki ko Hezekia i mua ia Iehova. Akakite te Pipiria: “Akateiteiia akera tona ngakau: i tupu ei te riri iaia, e ia Iuda, e Ierusalema.” (2 Para. 32:25) Eaa ra a Hezekia i ngakau parau ei? Penei no tana apinganui, te autu anga aia i to Asura, me kore te rapakauia anga tona maki na roto i te temeio. E penei na te tu parau i akakeu iaia kia akaariari i tana au apinga ki te aronga no Babulonia mai. No reira, kua ako pakari te peroveta ko Isaia iaia. (2 Ari. 20:​12-18) Inara mei ia Davida rai, kua taakaaka a Hezekia iaia uaorai e kua tataraara. (2 Para. 32:26) Tei tupu, kua riro mai aia ei ariki tiratiratu e “kua rave aia i te mea tika i mua i te aroaro o Iehova.”—2 Ari. 18:3.

10. Akapeea te Ariki ko Amazia te ariu anga ki te akoanga?

¹⁰ Kareka ra te Ariki ko Amazia o Iuda, “Kua rave aia i te mea tika i mua i te aroaro o Iehova, kare ra i tika meitaki rava [tona] ngakau.” (2 Para. 25:2) Eaa tana tarevake? I muri ake te tauturu anga a Iehova iaia kia autu i te tamaki i to Edoma, kua akamata a Amazia i te akamori i to ratou au atua.c E oti te ako anga ta Iehova peroveta iaia, kare aia i akarongo.—2 Para. 25:​14-16.

11. Ia 2 Korinetia 7:​9, 11, eaa ta tatou ka rave kia akakoreia mai ta tatou ara? (Akara katoa i te au tutu.)

¹¹ Eaa ta tatou ka apii mei teia au akaraanga? Me rave tatou i te ara, ka anoanoia tatou kia tataraara e kia kore e rave akaou i te reira. Akapeea me akoia mai tatou e te aronga pakari, noatu ka manako tatou e kare e tau te reira ako? Auraka tatou e manako e kua akaruke a Iehova ia tatou e pera te aronga pakari. E akamaara, kua anoanoia te au ariki meitaki o Iseraela kia akoia e kia akatikatikaia. (Ebe. 12:6) Me akoia mai tatou, kia (1) āriki akaaka i te reira, (2) rave i te au tauianga, e te (3) tavini ua atu rai ia Iehova ma te ngakau katoa. Me tataraara tatou ma te tu ngakau tae, ka akakore mai a Iehova i ta tatou ara.—E tatau ia 2 Korinetia 7:​9, 11.

KUA AKAMORI RATOU IA IEHOVA ANAKE

12. Eaa tei akataka tikai i te au ariki meitaki?

¹² Ko te au ariki ta Iehova i akava ei au ariki meitaki, kua akamori ratou Iaia anake. Kua akamaroiroi katoa ratou i te iti tangata kia akamori i te Atua. E tika, kua rave ratou i te au tarevake mei ta tatou i apii mai. Inara, kua akamori ratou ia Iehova anake e kua angaanga pakari i te takore i te akamorianga itoro mei to ratou patireia.d

13. Eaa a Iehova i akava ei i te Ariki ko Ahaba ei ariki tiratiratu kore?

¹³ Eaa ra a Iehova i akava ei i tetai pae ei au ariki tiratiratu kore? E tika, kare ta ratou au angaanga pouroa i te mea kino. Kua akaari te ariki kino ko Ahaba i te tu akaaka, e kua tataraara aia no te tamate anga ia Nabota. (1 Ari. 21:​27-29) Kua pātu katoa aia i te au oire e kua autu i te au tamaki o Iseraela. (1 Ari. 20:​21, 29; 22:39) Inara, kua akakeuia a Ahaba e tana vaine kia akamori i te au atua pikikaa e kua rongonui aia no te reira. Kare rava aia i tataraara no teia.—1 Ari. 21:​25, 26.

14. (a) Eaa a Iehova i akava ei i te Ariki ko Rehoboama ei ariki tiratiratu kore? (e) Eaa ta te maata anga o te au ariki tiratiratu kore i rave?

¹⁴ Akamanako akaou i tetai ariki tiratiratu kore ko Rehoboama. Mei tei taikuia mai, e maata tana angaanga meitaki i rave i tona tutaraanga. Inara te tinamou anga tona taoonga ariki, kua akaruke aia i te Ture a Iehova e kua akamori i te au itoro. (2 Para. 12:1) No te reira, kua akamori aia ia Iehova i tetai au atianga e pera katoa te au atua pikikaa. (1 Ari. 14:​21-24) Kare ko Rehoboama e Ahaba te nga ariki anake tei akaruke i te akamorianga mou. Ko te tika, kua akamori te maataanga o te au ariki tiratiratu kore i te au atua pikikaa e kua akamaroiroi i te iti tangata kia aru ia ratou. Te taka meitaki ua ra e i roto i te mata o Iehova, ko te akamori anga iaia anake te tumu maata i akava ei aia i tetai ei ariki meitaki me kore ei ariki kino.

15. Eaa i puapinga ai te akamorianga mou kia Iehova?

¹⁵ Eaa i puapinga ai te akamorianga mou kia Iehova? Ko te tika, e apainga ta te au ariki no te arataki i te iti tangata kia akamori ia Iehova. Me akamori te tangata i te au atua pikikaa, ka akakeu te reira ia ratou kia rave i te au ara kino e te takinokino i tetai ke. (Hose. 4:​1, 2) Pera katoa, kua akatapuia te au ariki e te ngati Iseraela kia Iehova. No reira te Pipiria i akaaite ei i ta ratou akamorianga itoro ki te akaturi. (Iere. 3:​8, 9) Me akaturi tetai tangata, ka tiratiratu kore aia ki tona tokorua e ka akatupu i te mamae maata kiaia. Mei te reira rai, me piri tetai tavini akatapuia o Iehova ki roto i te akamorianga pikikaa, ka rave aia i te ara i mua iaia e ka tamamae i Tona ngakau.e—Deu. 4:​23, 24.

16. Eaa te tuke i rotopu i te tangata tuatua tika e te tangata kino i roto i to Iehova mata?

¹⁶ Eaa te apiianga no tatou? Mea papu, ka tauta pakari tatou i te kopae i te akamorianga pikikaa. Inara, kia rave maroiroi katoa tatou i te akamorianga mou. Kua akataka meitaki te peroveta ko Malaki i te tuke i rotopu i te tangata meitaki e te tangata kino i roto i to Iehova mata. Kua tata aia: “Ei reira kotou e kite akaou ei i te tu ke anga i te tangata tuatua-tika e te tangata kino, i te tangata i akamori i te Atua, e i tei kore i akamori iaia.” (Mala. 3:18) No reira auraka tatou e tuku i to tatou tu apa e te tarevake kia akaparuparu ia tatou e kia akamutu i te akamori i te Atua. Me pera tatou, e ara kino te reira.

17. Eaa ra tatou ka matakite ei me iki i tetai tokorua akaipoipo?

¹⁷ Me te manako nei koe kia akaipoipo, akapeea ta Malaki tuatua no te akamori i te Atua me tauturu ia koe kia iki i tetai tokorua tau noou? Penei e au tu meitaki to tetai tangata, inara me kare aia e tavini ana i te Atua mou, i toou manako e tangata tuatua tika ainei aia i roto i to Iehova mata? (2 Kori. 6:14) Me iki koe i te akaipoipo iaia, ka akamaroiroi ainei aia ia koe kia vai tiratiratu kia Iehova? Akamanako ana: Penei e au tu meitaki to te au vaine a te Ariki ko Solomona. Inara kare ratou i akamori ana ia Iehova, e kua akakeu marie ratou i te ngakau o Solomona kia akamori i te au atua pikikaa.—1 Ari. 11:​1, 4.

18. Eaa ta te au metua ka apii i ta ratou tamariki?

¹⁸ E te au metua, e apii i te akaraanga o te au ariki i roto i te Pipiria ki ta kotou tamariki kia tavini ratou ia Iehova ma te maroiroi. E tauturu ia ratou kia mārama e ko te au ariki ta Iehova i mareka, kua akamori ratou ia Iehova e kua akamaroiroi i te iti tangata kia pera katoa. Na roto i taau tuatua e toou akaraanga, e apii i taau tamariki e ko te au angaanga pae vaerua mei te apii i te Pipiria, te aere ki te au uipaanga e te tutu aere, ko te au mea puapinga ïa i roto i te oraanga. (Mata. 6:33) Me kare koe e rave i te reira, penei ka manako taau tamariki e na te nga metua teia akonoanga e kare i te mea puapinga kia akamori ia Iehova. E tei tupu, ka akamutu ratou i te akamori iaia.

19. Eaa te manakonakoanga no te aronga tei akamutu i te akamori ia Iehova? (Akara katoa i te pia “Ka Rauka ia Koe i te Oki Mai Kia Iehova!”)

¹⁹ Me akamutu tetai tangata i te akamori ia Iehova, ko te aiteanga ainei e kare aia e riro akaou ei oa Nona? Kare, no te mea ka rauka iaia i te tataraara e te oki mai kia Iehova. Penei ka anoanoia aia kia taakaaka iaia uaorai e te āriki i te tauturu a te aronga pakari. (Iako. 5:14) Ka paunaia tona taime e te maroiroi kia akamori akaou ia Iehova ei oa nona!

20. Me aru tatou i te au ariki tiratiratu, eaa to Iehova manako no tatou?

²⁰ Eaa ta tatou i apii mai mei te au ariki o Iseraela? Ka aru tatou i te au ariki tiratiratu me tavini ia Iehova ma te ngakau katoa. E apii mei to tatou au tarevake, e tataraara e te rave i te au tauianga. E akamaara katoa i te puapinga kia akamori ia Iehova anake. Me vai tiratiratu koe kiaia, ka riro mai koe ei tangata tuatua tika i roto i tona mata.