Ka Tauturu te Aronga Pakari i te Aronga Tei Akatakakeia

1-2. (a) Eaa to Iehova manako no te au ara tei rave akakoroia? (e) Eaa tana e tapapa ra no te aronga rave ara?

KARE a Iehova e mareka ana i te au ara kino, e rikarika ana aia i te reira. (Sala. 5:​4-6) Te umuumu maira aia e kia akono tatou i tana au kaveinga tuatua tika i roto i te Pipiria. Inara, kua kite a Iehova e e aronga ara tatou e kare tatou e akono tiratiratu i tana au kaveinga. (Sala. 130:​3, 4) E i taua taime rai, kare aia e mareka ana i te ‘aronga akono kore i te Atua’ tei akariro i tona aroa e kia rave ratou i te au peu viivii. (Iuda 4) Te akakite ra te Pipiria e ka takoreia “te aronga akono kore i te Atua” i te tamaki o Aramakito.—2 Pete. 3:7; Apo. 16:16.

² Inara, kare a Iehova e inangaro i tetai kia takoreia. Mei ta tatou i uriuri mai i roto i te au atikara o teia makatini, te akakite maira te Pipiria e kua inangaro a Iehova i te ‘katoatoa kia tataraara.’ (2 Pete. 3:9) Mei ia Iehova rai, ka tauta te aronga pakari i te tauturu i te aronga tei rave i te ara kino kia tataraara e kia akavaitata akaou kia Iehova. Inara, i tetai taime kare te aronga rave ara e tataraara. (Isa. 6:9) Noatu kua tauturu ana te aronga pakari i tetai kia tataraara, kua rave ua rai ratou i te kino. Eaa ta te aronga pakari ka rave?

“E AKATAKA KE ATU KOTOU I TAUA TANGATA TUATUA KINO”

3. (a) Eaa ta te Pipiria e akakite ra no te aronga tei rave i te ara e kare i tataraara? (e) Me patoi tetai, eaa aia ka akatakakeia ai mei te putuputuanga?

³ Me kare te tangata rave ara e tataraara, ka anoanoia te aronga pakari kia aru i te aratakianga ia 1 Korinetia 5:13: “E akataka ke atu kotou i taua tangata tuatua kino i roto ia kotou na.” Ko tera te aiteanga kua iki aia kia akatakakeia aia, e kua kokoti aia i tana i ruru. (Gala. 6:7) Eaa tatou ka tuatua ai i te reira? No te mea kua patoi aia i te taui i tona oraanga, noatu te tauturu a te aronga pakari. (2 Ari. 17:​12-15) Kua akaari aia na roto i tana angaanga e kare aia e akarongo ki ta Iehova au akauenga.—Deu. 30:​19, 20.

4. Eaa i akakiteia ai e kua akatakakeia tetai tangata kare i tataraara mei te putuputuanga?

⁴ Me akatakakeia tetai tangata kare i tataraara mei te putuputuanga, ka orongaia te akakiteanga e kare aia i te Kite no Iehova.a Te akakoroanga o te reira, kare kia taakamāia aia. Mari ra, kia akono te putuputuanga i te kaveinga Pipiria “auraka kotou e kapiti atu” ki te reira tangata e “auraka katoa e kai atu i te manga” kiaia. (1 Kori. 5:​9-11) E tumu meitaki tetai no teia kaveinga. Kua tata te apotetoro ko Paulo: “E opue te putunga katoa i te akaopue mea ngiti ra.” (1 Kori. 5:6) Me kare tei rave i te ara e akatakakeia, ka akakeu tana au peu i tetai pae kia manako e kare ratou e anoanoia kia akono i ta Iehova akauenga.—Mase. 13:20; 1 Kori. 15:33.

5. Me kua akatakakeia tetai mei te putuputuanga, eaa to tatou manako iaia e no teaa ra?

⁵ Eaa i reira to tatou manako me akatakakeia tetai mei te putuputuanga? Noatu kare tatou e kapiti atu kiaia, auraka tatou e manako e kare aia e tauturuia. Mari ra, kua aite aia mei tetai mamoe ngaro. Me ngaro tetai mamoe ka rauka iaia i te oki mai ki te anana. E akamaara, kua akatapu teia tangata i tona oraanga kia Iehova. Inara, kare aia e akono ana i ta Iehova au kaveinga e kua takino i tona pirianga kiaia. (Eze. 18:31) Koi vai ei te tuatau e to Iehova aroa, te tapapa atu nei tatou kia taui te reira tangata i tona oraanga e kia oki mai kia Iehova. Akapeea te aronga pakari me tauturu i tetai tangata rave ara tei akatakakeia mei te putuputuanga?

AKAPEEA TE ARONGA PAKARI ME TAUTURU I TE ARONGA TEI AKATAKAKEIA

6. Eaa ta te aronga pakari ka rave no te tauturu i tetai tei akatakakeia mei te putuputuanga?

⁶ Me akatakakeia tetai mei te putuputuanga, ka akamutu ainei te aronga pakari i te tauturu iaia kia oki mai kia Iehova? Kare rava! Me akakite te aronga pakari ki tetai tei akatakakeia, ka akakite katoa ratou eaa tana ka rave kia oki mai kia Iehova. Inara e maata atu ta te aronga pakari ka rave. Ka akakite ratou ki te tangata rave ara, e ka aravei ratou iaia i muri ake i tetai nga marama i te kite me kua taui aia i tona manako. E i muri mai i tetai nga marama, me āriki aia e kia aravei akaou te aronga pakari iaia, ka akamaroiroi ratou iaia kia tataraara e kia oki mai kia Iehova. Noatu kare aia i tataraara ake i te reira taime, ka tauta ua rai te aronga pakari i te akamaroiroi iaia kia tataraara.

7. Akapeea te aronga pakari me aru i to Iehova aroa, me tauturu i tetai tangata ara tei akatakakeia? (Ieremia 3:12)

⁷ Ka aru te aronga pakari i te akaraanga o Iehova me akono i tetai tangata ara tei akatakakeia. Ei akaraanga, kare a Iehova e tiaki i tona iti tangata kia tataraara. Mari ra, ka tono aia i tana au peroveta kia tauturu ia ratou, noatu kare ratou i tataraara ake. Akakite te rua o te atikara, kua tuatua a Iehova kia Hosea kia akakore i te ara a tana vaine e kia āriki akaou iaia, noatu kua rave aia i te ara kino. Na roto i teia akaraanga, te apii ra a Iehova i tona iti tangata no runga i tona aroa. (Hose. 3:1; Mala. 3:7) Na te aru anga i te akaraanga o Iehova, kua inangaro te aronga pakari i te tauturu i te tangata rave ara kia tataraara e kia oki mai Kiaia.—E tatau ia Ieremia 3:12.

8. Akapeea ta Iesu parapore o te tamaiti ngaro i te tauturu ia tatou kia mārama i to Iehova aroa? (Luka 15:7)

⁸ Akamaara i ta Iesu parapore no te tamaiti ngaro tei uriuriia i roto i te atikara rua. Te kite anga te metua tane i tana tamaiti i te oki mai anga, kua “oro maira, takave maira i runga i tona kaki, kua ongi maira iaia.” (Luka 15:20) Kare te metua tane i tiaki ana i tana tamaiti kia pati e kia akakoreia tana ara. Mari ra, kua oro aia i te aravei i tana tamaiti. Ka aru katoa te aronga pakari i te reira tu ki te aronga tei akaruke ia Iehova. No te mea, kua inangaro ratou kia oki mai teia aronga kia Iehova. (Luka 15:​22-24, 32) Me oki mai te tangata rave ara, ka rekareka a Iehova, a Iesu, te au angera e te putuputuanga!—E tatau ia Luka 15:7.

9. Eaa ta Iehova e akamaroiroi ra i te aronga ara kia rave?

⁹ Kua kite tatou e kare a Iehova e āriki i tetai tangata rave ara i roto i te putuputuanga. Inara, ka tauturu aia ia ratou kia tataraara e kia oki mai kiaia. Kua karanga a Iehova: “Naku e akaora i to ratou kotoe anga ki muri, naku e aroa ua atu ia ratou: kua ruri keia oki taku riri ia ratou.” (Hose. 14:4) No reira, ka tauta te aronga pakari i te akara i te au akairo e kua tataraara te tangata rave ara. E akamaroiroi anga teia no te aronga tei akaruke ia Iehova, kia oki mai Kiaia.

10-11. Akapeea te aronga pakari me tauturu i te aronga tei akatakakeia no tetai tuatau roa?

¹⁰ Akapeea te aronga pakari me tauturu i tetai pae tei akatakakeia no tetai tuatau roa? Penei kua akamutu ratou i te rave i te ara kino. I tetai atianga, kare e maara ana ia ratou i te tumu i akatakakeia ai ratou. Noatu eaa te roa, ka tauta te aronga pakari i te kimi e te aravei atu i teia aronga. Penei ka pure ratou nona e ka akamaroiroi iaia kia oki mai kia Iehova. Noatu kua akaruke aia i te putuputuanga, ka anoanoia aia kia apii akaou no runga ia Iehova e te Pipiria. Me oki mai aia, ka akanoonoo te aronga pakari i tetai taeake kia apii i te Pipiria kiaia, noatu kare aia i ārikiia mai ake ki te putuputuanga. Na te aronga pakari e pati i tetai taeake kia apii akaou i te Pipiria kiaia.

¹¹ Te aru anga i to Iehova aroa, ka kimi te aronga pakari i te aronga tei akaruke ia Iehova e ka akamaroiroi ia ratou kia oki mai. Me kua tataraara te reira tangata, kua taui i tona oraanga e kua akamutu i tana au peu, ka āriki akaouia aia ki te putuputuanga.—2 Kori. 2:​6-8.

12. (a) Eaa tetai au turanga kia matakite te aronga pakari? (e) Eaa te tumu ka manako tatou e kare a Iehova e aroa i te tangata rave ara tei tataraara? (Akara katoa i te tataanga rikiriki i raro.)

¹² I tetai atianga, ka matakite te aronga pakari i mua ake ka āriki akaou mai ei i tetai i roto i te putuputuanga. Ei akaraanga, me kua apa tetai tangata no te kanga i tetai tamaiti, patoi i te tuatua mou, akakoro i te akatakake i tetai akaipoipo, ka akapapu te aronga pakari e kua tataraara tikai te reira tangata. (Mala. 2:14; 2 Timo. 3:6) Ka paruru ratou i te putuputuanga. Inara, ka anoanoia tatou kia kite e ka āriki akaou a Iehova i te tangata rave ara tei tataraara tikai e kua akamutu i tana au peu viivii. Noatu ka akapapu te aronga pakari e kua tataraara tikai aia, eiaa ratou e manako e kare tera tangata e aroaia e Iehova.b—1 Pete. 2:10.

TA TE PUTUPUTUANGA KA RAVE

13. Akapeea tatou me akono i tetai tangata tei akoia mei tetai tei akatakakeia mei te putuputuanga?

¹³ Mei tei uriuriia i te atikara i mua ana, tetai taime me orongaia te akakiteanga e kua akoia tetai tangata. No reira, ka rauka rai ia tatou i te kapiti atu kiaia ma te kite kua tataraara aia e kua akamutu i tana au peu kino. (1 Timo. 5:20) Koia rai tetai i roto i te putuputuanga e te anoano ra aia kia akamaroiroiia e te au taeake. (Ebe. 10:​24, 25) Inara, e tuke te turanga o te tangata tei akatakakeia mei te putuputuanga. “Auraka [tatou] e kapiti atu” kiaia e “auraka katoa e kai atu i te manga” kiaia.—1 Kori. 5:11.

14. Akapeea tetai Kerititiano me akono i tetai tangata tei akatakakeia mei te putuputuanga? (Akara katoa i te tutu.)

¹⁴ Ka kopae ainei tatou i tetai tangata tei akatakakeia mei te putuputuanga e kare e aravei iaia i te uipaanga? Kare. Inara, kare tatou e pukapuka atu kiaia. Ka aru tetai Kerititiano i tona akava ngakau tei tereniia e te Pipiria kia pati i tetai tei akatakakeia penei e kopu tangata me kore e oa piri mou ki te uipaanga. Akapeea me tae mai aia? I mua ana, kare tatou e aravei i te reira tangata. Inara, ka anoanoia tatou kia aru i to tatou akava ngakau eaa ta tatou ka rave. Penei ka aravei e ka turou atu tetai i te reira tangata ki te uipaanga. Inara kare tatou e pukapuka kiaia no tetai tuatau roa.

15. Eaa te au tu ara te akakiteia ra ia 2 Ioane 9-11? (Akara katoa i te pia “Kua Aiteite Ainei te au Tu Ara ta Ioane e Paulo i Tata?”)

¹⁵ Inara ka manako tetai pae, ‘Kare ainei e te akakite ra te Pipiria e me aroa tetai i te tangata rave kino, te kapiti atura aia ki tana au tuatua akakino?’ (E tatau ia 2 Ioane 9-11.) Inara, te akataka ra teia irava no te aronga pikikaa tei akakeu i tetai tangata kia rave i te ara kino. (Apo. 2:20) Me te apii ra te reira tangata i teia au apiianga pikikaa, kare te aronga pakari e aravei atu iaia. Noatu ra, ka rauka i tera tangata i te tataraara. Me tupu ake te reira, kare tatou e aroa e te pati atu i tera tangata ki te uipaanga.

ARU I TO IEHOVA TU TANGI E TE AROA

16-17. (a) Eaa ta Iehova e anoano ra no te aronga rave ara? (Ezekiela 18:32) (e) Akapeea te aronga pakari me aru ia Iehova me tataraara tetai tangata rave ara?

¹⁶ Eaa ta tatou i kite mai mei roto i teia makatini? Kare a Iehova e inangaro i tetai tangata kia takoreia! (E tatau ia Ezekiela 18:32.) Mari ra, kia oki mai ratou Kiaia. (2 Kori. 5:20) No reira a Iehova i akamaroiroi ei i tona au tavini tei akaruke iaia, kia tataraara e kia oki mai Kiaia. Ka angaanga kapiti te aronga pakari kia Iehova me tauturu ratou i te tangata rave ara kia tataraara.—Roma. 2:4; 1 Kori. 3:9.

¹⁷ Ka rekareka to te rangi me tataraara tetai tangata rave ara! Ka maata atu to Iehova rekareka, me oki mai tetai o tana mamoe ki te putuputuanga. Ka akaperepere maata tatou i to Iehova au tu me akamanako tatou i tona ngakau aroa, tu tangi e te takinga meitaki.—Luka 1:78.