Te Akono ra Ainei Koe i te Au Akamatakiteanga?

1. Eaa ta Iesu ka rave kare e roa atu?

TE NOO nei tatou i tetai tuatau ka tupu te tauianga maata! Kare e roa atu ka akava a Iesu i te au tangata ravarai. Karanga a Iesu e te vaitata maira teia akavaanga. Kua akakite aia ki tana au pipi i te “akairo o tona aerenga mai e te openga o teianei ao.” (Mata. 24:3) Kua tataia teia au totou i roto ia Mataio pene 24 e te 25 e tetai atu au irava i roto ia Mareko pene 13 e Luka pene 21.

2. Eaa ta tatou ka uriuri i teia atikara e akapeea teia me tauturu ia tatou?

² Kua akamatakite mai a Iesu ia tatou na roto i tana parapore e toru. Koia oki, te parapore o te mamoe e te puakanio, te au paretenia pakari e te neneva e te au tareni. Ka tauturu teia au parapore ia tatou kia kite akapeea a Iesu me akava i tetai tangata kia tau ki tana e rave ra. I roto i teia atikara, ka uriuri tatou i teia au parapore e te apiianga no tatou. Teianei ka uriuri tatou i te parapore o te mamoe e te puakanio.

TE MAMOE E TE PUAKANIO

3. Aea a Iesu e akava ei i te tangata?

³ I roto i te parapore o te mamoe e te puakanio, kua akakite a Iesu akapeea aia me akava i te au tangata to ratou āriki anga i te tuatua meitaki e te turuturu i tona au taeake akatainuia. (Mata. 25:​31-46) I te tuatau o te “mate maata,” ka akava aia i te tangata ei mamoe me kore ei puakanio i mua ake ka tupu ei a Aramakito. (Mata. 24:21) Mei tetai tiaki ka akatakake i te mamoe mei te puakanio pera katoa a Iesu ka akatakake aia i te aronga tei turuturu i tona au taeake akatainuia mei te aronga kare i rave ana i te reira.

4. Ia Isaia 11:​3, 4, eaa i papu ei ia tatou e ka akava a Iesu i te tangata ma te tuatua tika e te tau? (Akara katoa i te tutu.)

⁴ Karanga te Pipiria e ka akava a Iesu ma te tika e te tau. (E tatau ia Isaia 11:​3, 4.) Ka akamanako aia i ta te tangata e rave ra, to ratou manako e ta ratou au tuatua e pera katoa, to ratou tu ki tona au taeake akatainuia. (Mata. 12:​36, 37; 25:40) Ka kite a Iesu i te aronga tei turuturu i tona au taeake akatainuia e ta ratou angaanga.a Ko tetai ravenga puapinga ei turuturu i te au taeake o Iesu na te rave anga i te angaanga tutu aere. Ka akava a Iesu ia ratou ei aronga “tuatua-tika” e tei ia ratou te manakonakoanga o te “ora mutu kore” i te enua nei. (Mata. 25:46; Apo. 7:​16, 17) E tutaki maata ta te aronga tei vai tiratiratu kia Iehova! Na te rave anga i te reira i te tuatau o te mate maata e aere ua atu, ka kitea to ratou ingoa i te tata angaia ki roto i te buka ora.—Apo. 20:15.

5. Eaa te apiianga o te parapore no te mamoe e te puakanio, e koai ma ka puapingaia mei te reira?

⁵ Kia vai tiratiratu. Kua akakite a Iesu i te parapore o te mamoe e te puakanio no te aronga te ka noo ki te enua e tuatau ua atu. Ka akaari ratou i to ratou irinaki na te tauturu anga i te au taeake o Iesu i te tutu aere. Ka akono ratou i te aratakianga a te tavini akono meitaki e te pakari ta Iesu i iki. (Mata. 24:45) Pera katoa, ka anoanoia te aronga akatainuia kia akono i te akamatakiteanga o teia parapore. Eaa te tumu? No te mea te akamanako ra a Iesu i ta ratou e rave ra, to ratou manako, e ta ratou au tuatua. Ka anoanoia ratou kia vai tiratiratu. No reira kua akakite a Iesu e rua nga parapore ei akamatakite i te aronga akatainuia. Ka kite katoaia teia i roto ia Mataio pene 25. Teianei ka uriuri tatou i te parapore o te au paretenia pakari e te neneva.

TE AU PARETENIA PAKARI E TE NENEVA

6. Akapeea te au paretenia e rima i te akaari anga i te tu pakari? (Mataio 25:​6-10)

⁶ I roto i te parapore o te paretenia, kua tuatua a Iesu no te nga paretenia tino ngauru tei aere i te aravei i te tane akaipoipo. (Mata. 25:​1-4) Kua tapapa ratou i te kapiti atu ki te tane akaipoipo i te oroa akaipoipoanga. Kua akamārama a Iesu, e rima ia ratou e aronga “pakari” e e rima e aronga “neneva.” Kua papa ua te au paretenia pakari e kua vai matakite. Kua tiaki ratou i te tane akaipoipo noatu e ka taeria te turuaipo e tae mai ei aia. Kua apai mai ratou i te au lamepa ei turama i te po. E kua apai katoa ratou i te inu no ta ratou au lamepa. No reira, me tae mai te tane akaipoipo kua kā ua ta ratou lamepa. (E tatau ia Mataio 25:​6-10.) Te tae anga mai aia, kua piri te au paretenia pakari kiaia i te oroa akaipoipoanga. Pera katoa, no te au taeake akatainuia tei vai matakite e te tiratiratu e tae ua mai a Iesu, ka tutakiia ratou na te kapitianga kiaia, te Tane Akaipoipo i te Patireia i te rangi.b (Apo. 7:​1-3) Akapeea ra te au paretenia neneva e rima?

7. Eaa tei tupu ki te au paretenia neneva e rima, e no teaa ra?

⁷ Kare te au paretenia neneva e rima i papa i te tae anga mai te tane akaipoipo. Kua matemate ta ratou au lamepa, e kare e inu no te akakī i te reira. No reira kua aere atu ratou i te oko i tetai inu na ratou. I te tae anga mai te tane akaipoipo kare ratou i reira. Ko te au paretenia pakari tei papa, “kua aere atura ratou ma ia katoa ki roto i te oroa akaipoipoanga ra; topiriia iora te pa.” (Mata. 25:10) I te oki mai anga te au paretenia neneva e kua inangaro i te tomo ki roto i te ngutupa, kua karanga atu te tane akaipoipo kia ratou: “Kare au i kite ia kotou.” (Mata. 25:​11, 12) Kare te au paretenia i papa no te tiaki kia tae mai te tane akaipoipo. Eaa te apiianga no te aronga akatainuia?

8-9. Eaa te apiianga ka kite mai te aronga akatainuia mei te parapore o te au paretenia? (Akara katoa i te tutu.)

⁸ Kia papa ua e kia matakite. Kare a Iesu i karanga ana e e rua pupu tuke o te aronga akatainuia—okotai pupu kua tiaki e tae ua atu ki te openga o teia akatereanga e tetai pupu kare i papa. Mari ra, te akamārama maira aia i te ka tupu ki te aronga akatainuia me kare ratou e akakoromaki e tae ua atu ki te openga. Kare ratou e tutakiia. (Ioa. 14:​3, 4) E akamatakiteanga puapinga teia! Noatu e no te rangi me kore no te enua to tatou manakonakoanga, ka anoanoia tatou kia akono i te akamatakiteanga mei te parapore o te au paretenia. Kia vai matakite ua tatou e kia akakoromaki e tae ua atu ki te openga.—Mata. 24:13.

⁹ Aru mai i te parapore o te au paretenia tei akamaroiroi i te tu papa e te matakite, kua akakite a Iesu i te parapore o te au tareni. Te apii maira teia parapore ia tatou e kia angaanga pakari e te maroiroi.

TE AU TARENI

10. Akapeea te nga tavini i te vai tiratiratu anga ki te pu? (Mataio 25:​19-23)

¹⁰ I roto i te parapore o te au tareni, kua akakite mai a Iesu no te nga tavini tei tiratiratu ki to raua pu, e e okotai tavini kare i akarongo. (Mata. 25:​14-18) Kua angaanga pakari te nga tavini kia maata mai te moni a te pu. I mua ake ka aere ei aia ki te ngai mamao, kua oronga te pu i te au tareni kia ratou—e āka moni i tera tuatau. Kua angaanga pakari te nga tavini e rua e kua akamaata i te moni a te pu. Eaa tei tupu? I te oki mai anga te pu, kua maata tana moni i rauka i te nga tavini tiratiratu. Kua akameitakiia raua e te pu, e kua “aere [raua] ki roto i te rekarekaanga o [to raua] pu.” (E tatau ia Mataio 25:​19-23.) Akapeea te toru o te tavini? Eaa tana i rave ki te moni a te pu?

11. Eaa tei tupu ki te tavini “kope” e no teaa ra?

¹¹ Kua orongaia e tai tareni ki te toru o te tavini inara kua “kope” aia i te akamaata i te moni a te pu. Kua inangaro te pu iaia kia taangaanga meitaki i tana tareni. Inara, kua tanu te tavini i te reira. Te oki mai anga te pu, kua akaoki te tavini i te tareni a te pu. E tu kino to te tavini. Kare aia i tataraara no tei kore i akamaata i te moni a te pu mari ra kua akaapa aia i te pu ei “tangata rotoriri.” Kare te pu i mareka i te tavini. Kua rave atu i tana tareni e kua uriia te tavini puapinga kore ki vao.—Mata. 25:​24, 26-30.

12. Koai ma te akatutuia maira e te nga tavini tiratiratu?

¹² Te akatutu maira te nga tavini tiratiratu i te au taeake akatainuia tei vai tiratiratu. Karanga te Pu ko Iesu kia ratou kia ‘aere ratou ki te rekarekaanga o to ratou pu.’ Kua rauka ia ratou ta ratou tutaki i te rangi koia oki te tuakaouanga mua. (Mata. 25:​21, 23; Apo. 20:5) I tetai tua, ka riro te akaraanga kino o te tavini kope ei akamatakiteanga ki te aronga akatainuia. Akapeea?

13-14. Eaa te apiianga ka kite mai te aronga akatainuia mei te parapore o te au tareni? (Akara katoa i te tutu.)

¹³ Kia angaanga pakari e te maroiroi. I roto i te parapore o te au tareni e to te au paretenia, kare a Iesu i totou e ka kope te aronga akatainuia. Mari ra, kua akamārama aia i te ka tupu me kope ratou. Kare e rauka to ratou “kapiki angaia e te iki angaia,” e kare ratou e tomo ki roto i te Patireia i te rangi.—2 Pete. 1:10.

¹⁴ Te akakite maira ta Iesu parapore no te au paretenia e te au tareni e ka anoanoia te aronga akatainuia kia papa ua e kia matakite, e pera kia angaanga pakari e te maroiroi. E apinga ke atu ainei ta Iesu i tuatua ei akamatakite i te aronga akatainuia? Ae! Ka kitea ta Iesu akamatakite anga i roto ia Mataio 24:​40, 41.

KOAI MAI TE KA “ORA ATU”?

15-16. Akapeea a Mataio 24:​40, 41 te tauturu anga i te aronga akatainuia kia vai ara ua?

¹⁵ I mua ake ka akakite mai ei a Iesu i te au parapore e toru, kua akataka mai aia i te akavaanga openga o te aronga akatainuia te ka rauka ta ratou tutaki. Akakite mai aia e toko rua puke tangata i roto i te koro e e toko rua puke vaine i te taviri anga sitona. I te akaraanga e aiteite te angaanga a te toko rua e rave ra, inara kua karanga a Iesu “e riro tetai e ora atu tetai.” (E tatau ia Mataio 24:​40, 41.) E oti kua akamaroiroi aia i tana au pipi: “Kia matakite oki, kare kotou i kite i te ora e tae mai ei to kotou Atu.” (Mata. 24:42) Kua akakite katoa a Iesu i te reira i muri ake i te parapore o te au paretenia. (Mata. 25:13) E aiteite ainei teia au manako? Akara anga ae. Ko te aronga akatainuia tei vai tiratiratu ka “ora atu,” e ka kapiti atu kia Iesu i te Patireia i te rangi.—Ioa. 14:3.

¹⁶ Kia vai ara ua. Ko tetai ua atu aronga akatainuia kare i vai ara ua i te pae vaerua kare ratou e piri atu ki te “aronga ikiia.” (Mata. 24:31) Pouroa te au iti tangata o te Atua, ka anoanoia ratou kia akono i te akamatakiteanga a Iesu kia vai ara ua e kia tiratiratu.

17. Eaa tatou kare e manata me kua akatainu a Iehova i tetai au taeake i to tatou tuatau?

¹⁷ Kua kite meitaki tatou ia Iehova, e ka akava aia ma te tuatua tika e te tau. No reira kare tatou e manata me kua akatainu a Iehova i tetai au taeake tiratiratu i to tatou tuatau.c Ka maara ia tatou ta Iesu i tuatua no te aronga angaanga i te ora ngauru ma tai i roto i tana akatutuanga o te kainga vine. (Mata. 20:​1-16) Kua aiteite te tutaki a te aronga tei angaanga e tai ora i roto i te kainga vine ki te aronga tei angaanga i te rā katoa. Mei te reira rai, noatu e no naea te au taeake akatainuia i ikiia, aiteite ua ta ratou tutaki i te rangi me vai tiratiratu ratou.

AKONO I TE AKAMATAKITEANGA

18-19. Eaa te au apiianga e te akamatakiteanga ta tatou i kite mai?

¹⁸ Eaa ta tatou i uriuri? No te aronga te tapapa nei i te noo ki runga i te enua e tuatau ua atu, te apii maira te parapore o te mamoe e te puakanio i te puapinga kia vai tiratiratu kia Iehova i teianei e te tuatau o te mate maata. A te reira tuatau, ka akava a Iesu i te aronga tiratiratu tei tau no “te ora mutu kore.”—Mata. 25:46.

¹⁹ Kua uriuri mai tatou i te nga parapore e rua tei akamatakite i te aronga akatainuia. I roto i ta Iesu parapore o te au paretenia pakari e te neneva, e rima ia ratou tei akaari i te tu pakari. Kua papa ua ratou e te matakite, i te tiaki kia tae mai te tane akaipoipo noatu te roa. Kareka te au paretenia neneva kare ratou i papa. No reira kare te tane akaipoipo i akatika ia ratou kia tomo ki roto i te oroa akaipoipoanga. Pera katoa ka anoanoia tatou kia tiaki noatu te roa ia Iesu kia tae mai no te takore i teia akatereanga kino. I roto i ta Iesu parapore o te au tareni, kua uriuri tatou i te nga tavini tiratiratu tei angaanga pakari e te maroiroi. Kua angaanga pakari raua no to raua pu e kua mareka te pu ia raua. Inara kua uriia te tavini kope ki vao. Te apiianga? Kia maroiroi tatou i te rave i ta Iehova angaanga e tae ua atu ki te openga. Ei taopenga, kua uriuri tatou i te puapinga kia vai ara ua te aronga akatainuia e “ora atu ei” i te kapiti atu kia Iesu i te rangi. Te tapapa atu nei ratou, i to ratou “putuputu anga” kia Iesu i te rangi. I muri ake i te tamaki o Aramakito, ka riro ratou ei vaine akaipoipo na te Punua-mamoe ko Iesu.—2 Tesa. 2:1; Apo. 19:9.

20. Eaa ta Iehova ka rave no te aronga tei akono i tana au akamatakiteanga?

²⁰ Noatu e te vaitata mai nei te akavaanga, kare tatou e anoanoia kia mataku. Me vai tiratiratu tatou, ka oronga mai to tatou Metua aroa i te rangi i te “mana maata meitaki” kia “tu [tatou] ki mua i te aroaro o te Tamaiti a te tangata.” (2 Kori. 4:7; Luka 21:36) Noatu e no te rangi me kore no te enua to tatou manakonakoanga, ka akamareka tatou i to tatou Metua me akono tatou i te au akamatakiteanga i roto i ta Iesu parapore. No te mea e Atua aroa takinga meitaki a Iehova ka tataia to tatou ingoa “ki roto i te buka” ora.—Dani. 12:1; Apo. 3:5.