Au Taeake Mapu​—Aru ia Mareko e Timoteo

1-2. Eaa te au turanga te ka arai ia Mareko e Timoteo kia tavini maata atu i tetai ke?

E TE au taeake mapu, ka inangaro ainei kotou i te tavini maata atu ia Iehova e te tauturu i te au taeake i roto i te putuputuanga? E mea papu. Te kite nei matou i to kotou inangaro i te tauturu i te au taeake! (Sala. 110:3) Inara, kare teia i te mea māmā i te tavini maata atu ia Iehova. Te emiemi ra ainei koe i te rave maata atu i taau angaanga tutu aere e kare koe i kite eaa te ka tupu? Kare koe i āriki i tetai angaanga ou no te mea kare koe i tukatau te rave i te reira? Me ko tera te tumu, kare ko koe anake ua te manako akapera ra.

² Kua na roto katoa a Mareko e Timoteo i teia au turanga. Noatu kare raua i tukatau i te rave i tetai angaanga, kua iki ra raua i te tavini maata atu ia Iehova. Tei roto a Mareko i te are o tona metua vaine te pati anga te apotetoro ko Paulo e Banaba iaia, kia kapiti mai kia raua i te tutu aere. (Anga. 12:​12, 13, 25) Kua akaruke a Mareko i tona ngutuare kia tavini maata atu aia ia Iehova. Mea mua, kua neke aia ki Anetioka. E oti, kua teretere ratou ko Paulo e Banaba ki te au ngai mamao. (Anga. 13:​1-5) Te noo katoa ra a Timoteo e tona nga metua, te pati anga a Paulo iaia kia rave kapiti raua i te angaanga tutu aere. Penei e mapu ua a Timoteo e e iti ua tana i kite, kua manako aia e kare aia i tukatau i te aru ia Paulo. (Akaaite kia 1 Korinetia 16:​10, 11 e 1 Timoteo 4:12.) Noatu rai, kua āriki a Timoteo i ta Paulo patianga e kua kite atu aia i te au akameitakianga mei tana tavini anga ia Iehova.—Anga. 16:​3-5.

3. (a) Akapeea tatou i kite ei e kua akaperepere a Paulo ia Mareko e Timoteo? (2 Timoteo 4:​6, 9, 11) (Akara katoa i te au tutu.) (e) Eaa te au uianga ka uriuri tatou i roto i teia atikara?

³ Kua apii a Mareko e Timoteo akapeea me akono i te au apainga tukeke i roto i te putuputuanga i to raua mapu anga. Akameitaki tikai a Paulo i teia nga mapu taeake e i muri mai kua pati aia ia raua kia noo i te pae iaia i mua ake ka mate ei aia. (E tatau ia 2 Timoteo 4:​6, 9, 11.) Eaa te au tu o Mareko e Timoteo tei akaperepereia e Paulo? Akapeea te au mapu taeake me aru i to raua tu? E akapeea to Paulo tu akamaroiroi me tauturu i te au mapu tane i teia rā?

ARU IA MAREKO TEI PUAREINGA UA I TE TAVINI

4-5. Akapeea a Mareko te akaari anga i tona inangaro i te tavini i tetai ke?

⁴ Akakite tetai tataanga i te aiteanga o te tuatua tavini, koia oki kia maroiroi i te tauturu i tetai ke noatu ka ngatā i tetai taime. Ko Mareko tetai akaraanga meitaki. Penei kua mamae a Mareko no te mea kare a Paulo i akatika kia aru aia ia raua ko Banaba i te tutu aere. (Anga. 15:​37, 38) Inara, kua tāpu ainei te reira ia Mareko kia tavini atu i tona au taeake e te au tuaine? Kare.

⁵ Kua aru a Mareko ia Banaba i te tutu aere ki tetai ngai ke. E 11 mataiti i muri mai te tapekaia anga a Paulo i Roma, kua aere atu a Mareko i te tauturu iaia. (Phile. 23, 24) Kua akaperepere a Paulo i ta Mareko tauturu e kua karanga aia, koia “tei akapumaana mai iaku nei.”—Kolo. 4:​10, 11.

6. Eaa a Mareko i puapingaia ai mei te kapiti anga ki te au taeake tukatau? (Akara i te tataanga rikiriki i raro.)

⁶ Kua puapingaia a Mareko mei te kapiti anga ki te au taeake tukatau. I muri mai i tona tuatau kia Paulo i Roma, kua aere atu a Mareko ki Babulonia no te angaanga kapiti kia Petero. E oa piri mou raua, kua kapiki a Petero iaia ko “taku tamaiti nei oki ko Mareko.” (1 Pete. 5:13) Ia raua e angaanga ra, kua akakite a Petero i to Iesu oraanga ki tona oa mapu, i muri mai kua tata a Mareko ki roto i te puka Pipiria ko Mareko.a

7. Akapeea tetai mapu taeake ko Seung-Woo te aru anga i te akaraanga o Mareko? (Akara katoa i te tutu.)

⁷ Kua maroiroi a Mareko i te tavini ia Iehova e kua piri vaitata atu ki te au taeake tukatau. Akapeea koe me aru ia Mareko? Penei kua inangaro koe i te rave maroiroi i ta Iehova angaanga, ei tavini tauturu me kore ei tangata pakari, inara kare i rauka ake ia koe te reira apainga. No reira, eiaa e maromaroa. E kimi i tetai ravenga ke atu kia tavini ia Iehova e te putuputuanga. Ko teia tei tupu kia Seung-Woo, e tavini nei aia ei tangata pakari. I tona mapu anga, kua akaaite aia iaia ki tetai au taeake mapu. Kua oronga te aronga pakari i te au apainga i roto i te putuputuanga kia ratou e kare kiaia. Kua taitaia tikai a Seung-Woo, i muri mai kua akakite aia i tona manako ki te aronga pakari. Akamaroiroiia aia kia tauturu i tetai ke, noatu kare e kiteia mai tana angaanga meitaki. No reira, kua tauturu a Seung-Woo i te aronga pakarikari e te aronga tei inangaro i tetai mataara ki te au uipaanga. Me akamanako au i tei tupu, karanga aia: “Kua mārama au i te aiteanga kia tavini atu i tetai ke. Mataora tikai au i te oronga i taku ka rauka no te tauturu ia ratou.”

ARU IA TIMOTEO TEI AKAARI I TE AROA KI TETAI KE

8. Eaa a Paulo i iki ei ia Timoteo kia aru atu iaia? (Philipi 2:​19-22)

⁸ Kua inangaro a Paulo i tetai au taeake ngakau toa kia aru iaia me atoro akaou i te au oire te patoi ra iaia. Kua pati aia na mua i te taeake ko Sila kia aru iaia. (Anga. 15:​22, 40) I muri mai, kua iki katoa a Paulo ia Timoteo kia kapiti mai kiaia. Eaa a Paulo i iki ei ia Timoteo? No te mea, e turanga meitaki tona. (Anga. 16:​1, 2) Kua akono katoa a Timoteo i te tangata ma te aroa.—E tatau ia Philipi 2:​19-22.

9. Akapeea a Timoteo te akaari anga i tona aroa maata i tona au taeake e te au tuaine?

⁹ Mei te tuatau i tavini ei raua ko Paulo, kua akaari a Timoteo i tona aroa maata i tetai ke. No te reira tumu, kua irinaki a Paulo ia Timoteo kia akamaroiroi i te au pipi ou i Berea. (Anga. 17:​13, 14) I te reira atianga, penei kua apii maata atu a Timoteo mei te akaraanga o Sila, tei noo katoa ki Berea. Inara i muri mai, kua tono a Paulo ia Timoteo ki Tesalonia kia akamaroiroi i te au taeake i reira. (1 Tesa. 3:2) E 15 mataiti i aereia, kua apii a Timoteo kia ‘aue katoa [aia] ki te aronga e aue ra,” kia akaari aia i te tu tangi no te aronga e mamae ra. (Roma 12:15; 2 Timo. 1:4) Akapeea te au taeake mapu me aru ia Timoteo?

10. Akapeea te taeake ko Woo Jae te akaari anga i te aroa ki tetai ke?

¹⁰ Kua akaari tetai taeake ko Woo Jae i te aroa ki tetai ke. I tona mapu anga, kua ngatā ia Woo Jae i te pukapuka ki te au taeake e te au tuaine pakarikari. No reira, me kite aia ia ratou i te au uipaanga ka tuatua ua aia kia orana. Kua akamaroiroi tetai tangata pakari ia Woo Jae kia akamata i te pukapuka ki te au taeake i tana i reka no ratou. E kia akamanako katoa i to ratou inangaro. Kua rave a Woo Jae i te reira. I teianei e tangata pakari aia, karanga a Woo Jae: “Māmā ua iaku i te pukapuka ki te au taeake, noatu to ratou mataiti. Mataora au i te kite maata atu i to ratou turanga, au anoano e akapeea me akamaroiroi ia ratou.”

11. Akapeea te au taeake mapu me akaari i te aroa ki tetai ke i roto i ta ratou putuputuanga? (Akara katoa i te tutu.)

¹¹ Ka rauka katoa ia kotou te au taeake mapu i te akaari i te aroa ki tetai ke. E pukapuka ki te au taeake i te au uipaanga, noatu to ratou mataiti e noea mai ratou. E ui e te peea ua ra ratou, e oti e akarongo. Ka kite i reira koe akapeea me tauturu ia ratou. Penei ka kite mai koe te anoano ra tetai tokorua pakarikari i te tauturu no te taangaanga i te JW Library^® app. Me kore te angaanga kapiti kia ratou i te tutu aere. Ka rauka ainei ia koe i te tauturu ia ratou na roto i teia nga ravenga, te taangaanga i te apinga electronic me kore i te tutu aere? Me tauturu koe ia ratou, te oronga ra koe i tetai akaraanga meitaki no te katoatoa.

TAUTURU TE AKO A PAULO IA KOE

12. Akapeea te au taeake mapu me puapingaia mei ta Paulo akoanga kia Timoteo?

¹² Kua ako a Paulo ia Timoteo akapeea aia me rave meitaki i tana angaanga ma te mataora. (1 Timo. 1:18; 2 Timo. 4:5) Me e taeake mapu koe, ka tauturu te ako a Paulo ia koe. Akapeea ra? E tatau i ta Paulo nga reta kia Timoteo, mei te mea atura te tata ra aia kia koe e eaa te apiianga. Akamanako i tetai au akaraanga.

13. Eaa te ka tauturu ia koe kia tiratiratu kia Iehova?

¹³ “E akamātau ua ra koe i te akono i te Atua.” (1 Timo. 4:7e) Eaa te aiteanga kia akono i te Atua? Akakite ra a Paulo kia Timoteo kia tiratiratu kia Iehova e te akamareka iaia. Kare tatou i anauia mai ma teia tu, no reira ka anoanoia tatou kia apii e kia taangaanga i teia. Akapeea ra? Ko te tuatua Ereni e “akamātau ua,” tona aiteanga kia tereni pakari tetai tangata e kia papa aia no te taemoemo oro. Ka anoanoia aia kia akamou i tona manako ki runga i tana terenianga ei akatupu i tona akakoroanga kia rē aia. Kia pera katoa tatou no te akavaitata atu kia Iehova.

14. Eaa to tatou akakoroanga me tatau tatou i te Pipiria? Oronga mai i tetai akaraanga.

¹⁴ E mea puapinga i te tatau i te Pipiria i te au rā. Inara ko te akakoroanga, kia akavaitata atu kia Iehova. Ei akaraanga, me tatau koe i te tua o Iesu e tetai tutara mapu, eaa taau ka apii mai no runga ia Iehova? (Mare. 10:​17-22) Kua irinaki te mapu tane e ko Iesu te Mesia, inara kare aia i maroiroi i te aru ia Iesu. Noatu te reira, kua “aroa atura [Iesu] iaia.” Kua tuatua marū a Iesu ki te mapu tane. Akaraanga kua inangaro a Iesu i te mapu tane kia mataora i te tavini ia Iehova. Kua akaari a Iesu i te tu aroa o tona Metua. (Ioa. 14:9) Ia koe e akamanako ra i teia turanga e ui kia koe, ‘Eaa taku ka anoanoia kia rave no te akavaitata atu kia Iehova e te tavini maata atu i tetai ke?’

15. Eaa i puapinga ai kia akaari tetai taeake mapu i te akaraanga meitaki? (1 Timoteo 4:​12, 13)

¹⁵ “Ei akaraanga ra koe na tei akarongo.” (E tatau ia 1 Timoteo 4:​12, 13.) Kua akamaroiroi a Paulo ia Timoteo kia apii i te tatau e te ako atu i tetai ke, kia akaari katoa i te au tu meitaki mei te aroa, te akarongo e te mā. Eaa te tumu? E mea puapinga kia rave tetai tangata i te angaanga e eiaa e tuatua ua. Ei akaraanga, penei ka oronga koe i tetai ako ei akamaroiroi i te katoatoa kia tutu aere. Ka māmā ua ia koe i te oronga i te ako, me te maroiroi ra koe i te tutu aere. I reira, ka akakeuia te au taeake kia aru i toou akaraanga.—1 Timo. 3:13.

16. (a) Eaa te au ravenga e rima ka riro tetai taeake mapu ei akaraanga meitaki? (e) Akapeea tetai taeake mapu me akaari i te tu karape “i te tuatua”?

¹⁶ Ia 1 Timoteo 4:​12, kua taiku a Paulo e rima ravenga te ka tauturu i tetai taeake mapu kia riro ei akaraanga meitaki. E mea puapinga kia apii koe i teia au ravenga tatakitai. Ei akaraanga, penei ka inangaro koe kia karape “i te tuatua.” Akamanako eaa taau ka tuatua no te akamaroiroi i tetai ke. Me te noo ra koe ki te pae i toou nga metua, ka rauka ainei ia koe i te akameitaki ia raua? Me akamutu te uipaanga, ka rauka ainei ia koe i te akameitaki i tetai taeake no tana tuanga i rave? Penei ka tauta koe i te paupau. Me aruaru koe kia riro ei akaraanga meitaki i te tuatua, ka kite te katoatoa e tavini meitaki koe no Iehova.—1 Timo. 4:15.

17. Eaa te ka tauturu i tetai mapu taeake kia tavini maata atu ia Iehova? (2 Timoteo 2:22)

¹⁷ “E rere ke koe i te au anoano o to mea ou anga ra: e aruaru ra i te tuatua-tika.” (E tatau ia 2 Timoteo 2:22.) Kua ako a Paulo ia Timoteo, kia patoi i te au anoano te ka arai iaia i te tavini maata atu ia Iehova e te ka akaparuparu i tona pirianga oa. Penei ka kite mai koe e kua pou toou tuatau ki runga i te au tamataora e kare e taime no te apii no runga ia Iehova. Ei akaraanga e akamanako i te maata o te tuatau e akapou ana koe no te tipoti, initaneti e te kanga vitio. Ka rauka ainei ia koe i te tavini maata atu ia Iehova e tetai ke? Penei e tauturu i te tamā e te akono i te Are Uipaanga Patireia e te kapiti ki te angaanga i runga i te pereoo puka. Me rave koe i teia, ka tauturu te au oa ia koe kia tavini maata atu ia Iehova e kia akatupu i taau akakoroanga.

AKAMEITAKIANGA ME TAVINI I TETAI KE

18. Eaa tatou ka tuatua ai e kua mataora a Mareko e Timoteo i te tavini ia Iehova?

¹⁸ Kua rave a Mareko e Timoteo i te au tauianga i roto i to raua oraanga, e tei tupu kua mataora raua i te reira. (Anga. 20:35) Kua teretere a Mareko ki te au enua mamao no te tauturu i te au taeake e te au tuaine. Tata katoa aia i te oraanga o Iesu e tana angaanga tutu aere. Kua tauturu a Timoteo ia Paulo kia akamata i tetai putuputuanga ou e te akamaroiroi i tona au taeake e te au tuaine. No reira, kua mareka a Iehova i te akaraanga meitaki o Mareko e Timoteo.

19. Eaa te au taeake mapu ka akarongo ei ki te ako a Paulo kia Timoteo, e eaa te ka tupu?

¹⁹ I roto i tana reta, kua akaperepere maata a Paulo ia Timoteo. Kua riro teia au reta tei akauruia e Iehova i te akaari i tona inangaro ia kotou e te au taeake mapu. Kia mataora koe i taau tavinianga ia Iehova. No reira, e taangaanga meitaki i ta Paulo ako e kia tavini maata atu i tetai ke. Me rave koe i teia, ka mataora toou oraanga i teianei e ka rauka ia koe “te ora mutu kore” a te tuatau ki mua.—1 Timo. 6:​18, 19.