E Aru i te Au Angera Meitaki

1-2. (a) Akapeea tatou i tuke ei mei te au angera? (e) Akapeea tatou i aite ei mei te au angera?

TE AKAVAITATAANGA a Iehova ia koe ki te tuatua mou, kua pati aia ia koe kia piri mai ki tona ngutuare aroa tei akamori iaia. Te kapiti maira to tatou au taeake e te au tuaine takapini i teianei ao e pera te mirioni ua atu au angera. (Dani. 7:​9, 10) Me akamanako tatou no runga i te au angera, penei ka kite tatou i te tuke i rotopu ia ratou e tatou. Ei akaraanga, kua angaia te au angera i mua roa ake ka angaiia ai te tangata. (Iobu 38:​4, 7) E ririnui atu ratou ia tatou. Pera katoa, e tu tapu e te tuatua tika to ratou me akaaiteia kia tatou.—Luka 9:26.

² Inara, noatu e tuke tatou mei te au angera, kua aite katoa to ratou au tu ki to tatou. Ei akaraanga, ka rauka katoa ia tatou i te akaari i te au tu manea o Iehova. Ka rave tatou i te au ikianga, mei te au angera rai. E ingoa to ratou e e tuke to ratou au tu. E tukeke ta ratou au angaanga no te tavini ia Iehova, mei ia tatou. E mei te au angera, ka inangaro tatou i te akamori i Tei Anga ia tatou.—1 Pete. 1:12.

3. Eaa ta tatou ka apii mai mei te au angera meitaki?

³ No te mea e maata to tatou tu tei aite ki te au angera, ka riro to ratou akaraanga meitaki ei akamaroiroi ia tatou. E maata te au apiianga puapinga ta tatou ka kite mai mei ia ratou. I teia atikara, ka uriuri tatou akapeea me aru i te tu akaaka o te au angera, to ratou inangaro i te tangata, te akakoromaki e ta ratou ka rave kia vai mā ua te putuputuanga.

E TU AKAAKA TO TE AU ANGERA

4. (a) Akapeea te au angera me akaari i te tu akaaka? (e) Eaa ra te au angera i akaaka ai? (Salamo 89:7)

⁴ E tu akaaka to te au angera. Noatu to ratou kite, te mana ririnui e te pakari, ka akono ratou i ta Iehova au akauenga. (Sala. 103:20) Me rave ratou i ta ratou au angaanga, kare ratou e akapaapaa ia ratou uaorai e kare e akatietie no to ratou mana ririnui. Ka mataora ua ratou i te rave i to te Atua anoano noatu kare e tangata i kite i to ratou ingoa.a (Gene. 32:​24, 29; 2 Ari. 19:35) Kare ratou e āriki i te kakā e te akameitakianga tei tau anake kia Iehova. Eaa ra te au angera i akaaka ai? No to ratou inangaro maata e te akangateitei ia Iehova.—E tatau ia Salamo 89:7.

5. Akapeea tetai angera te akaari anga i te tu akaaka i te akoanga i te apotetoro ko Ioane? (Akara katoa i te tutu.)

⁵ Akamanako ana i tetai tupuanga. I te 96 T.N., kua tuatua tetai angera kare i taikuia tona ingoa ki te apotetoro ko Ioane e kua akaari i tetai orama umere tikai kiaia. (Apo. 1:1) Eaa ta Ioane i rave te kite anga aia i te orama? Kua tupou aia ki raro i te akamori i te angera. Inara, kua tāpu viviki te angera iaia e kua tuatua: “Auraka koe e akapera; e taeake tavini au noou, e no to au taeake . . . e akamori i te Atua.” (Apo. 19:10) E tu akaaka to tera angera! Kare aia i inangaro kia akapaapaaia e kia akangateiteiia aia. Mari ra, kua tuatua viviki aia kia Ioane e akamori i te Atua ko Iehova. I taua taime rai, kare te angera i akavaavaa ana ia Ioane. Noatu kua tavini te angera ia Iehova no tetai tuatau roa e e ririnui atu aia ia Ioane, kua akaari aia i te tu akaaka e kua kapiki iaia uaorai ei tavini no te apotetoro. Kua ako te angera ia Ioane, kare ra aia i karo atu e kare i taakamā iaia mari ra, kua tuatua marū ua te angera kiaia. Kua mārama aia e ko te tumu i pera ai a Ioane no tona umere i te orama tana i kite.

6. Akapeea tatou me aru i te tu akaaka o te au angera?

⁶ Akapeea tatou me aru i te tu akaaka o te au angera? Ka inangaro tatou i te angaanga pakari no te tavini ia Iehova ma te kore e akapaapaa ia tatou uaorai. (1 Kori. 4:7) Me kua tavini tatou ia Iehova no tetai tuatau roa me kore kua orongaia mai tetai au apainga kia tatou, auraka e manako e meitaki atu tatou i tetai ke. Me maata ta tatou au apainga no te tavini ia Iehova, kia akaari ua rai tatou i te tu akaaka. (Luka 9:48) Mei te au angera rai, ka tavini tatou i tetai ke. Kare tatou e inangaro i tetai ke kia manako e meitaki atu tatou ia ratou.

7. Akapeea tatou me akaari i te tu akaaka me ako i tetai ke?

⁷ E akaari katoa tatou i te tu akaaka me ako i tetai taeake me kore ta tatou tamariki. Tetai taime, ka anoanoia tatou kia ako pakari iaia. Inara mei te angera tei ako ia Ioane, ka rauka ia tatou i te ako i tetai tangata ma te kore e taakamā iaia. Me manako tatou e kare tatou e meitaki atu i tetai ke, ka ako tatou iaia ma te marū e te takinga meitaki.—Kolo. 4:6.

INANGARO TE AU ANGERA I TE TANGATA

8. (a) Ia Luka 15:​10, akapeea te au angera me akaari i to ratou inangaro no te tangata? (e) Akapeea te au angera me tauturu ia tatou kia tutu aere? (Akara katoa i te tutu.)

⁸ Kare te au angera e akavaavaa e te manako e puapinga kore ua te tangata. Mari ra, e inangaro to ratou i te tangata. Ka rekareka ratou me tataraara tetai tangata rave ara e me oki mai aia kia Iehova me kore, me taui tetai tangata i tona oraanga e te apii i te tuatua mou. (E tatau ia Luka 15:10.) Ka tauturu katoa te au angera ia tatou kia tutu aere. (Apo. 14:6) Noatu kare ratou e tutu aere ana ki te tangata, penei ka arataki ratou i tetai papuritia ki tetai tangata tei inangaro i te apii no runga ia Iehova. Inara, kare i papu ia tatou me na tetai angera i arataki ia tatou ki te tangata. Penei na roto i tona vaerua tapu, ka tauturu a Iehova i te tangata me kore ka arataki i tona au tavini. (Anga. 16:​6, 7) Inara, ka taangaanga rai aia i tana au angera ei tauturu ia tatou kia tutu aere. No reira, me akakite aere tatou i te nuti meitaki, e mea papu e tei reira te au angera i te tauturu ia tatou.—Akara i te pia “Kua Pauia ta Ratou Pure.”b

9. Akapeea tatou me aru i te tu aroa o te au angera no te tangata?

⁹ Akapeea tatou me aru i to te au angera aroa no te tangata? Me rongo tatou i te tuatua akakite e kua āriki akaouia tetai taeake, ka rekareka tatou mei te au angera rai. E akapapu e kua kite te taeake i to tatou inangaro iaia e to tatou mataora e te tavini akaou nei aia ia Iehova. (Luka 15:​4-7; 2 Kori. 2:​6-8) Ka aru katoa tatou i te au angera me rave maroiroi i te angaanga tutu aere. (Kohe. 11:6) Pera katoa mei te au angera tei tauturu ia tatou kia tutu aere, e kimi tatou i te au ravenga no te tauturu i te au taeake e te au tuaine kia tutu aere. Ei akaraanga, penei ka parani tatou kia angaanga kapiti ki tetai papuritia ou i roto i te angaanga tutu aere? Me kore ka tauturu tatou i te au taeake e te au tuaine pakarikari e tei maki kia aru ia tatou i te tutu aere?

10. Eaa ta tatou ka apii mai mei ia Sara?

¹⁰ Akapeea ra me kotingaia ta tatou tavini anga ia Iehova no to tatou turanga? Ka rauka rai ia tatou i te angaanga kapiti ki te au angera i roto i te angaanga tutu aere. E akamanako i tei tupu kia Sara,c e tuaine i Initia. I muri ake i te painia anga aia e 20 mataiti, kua makiia a Sara e kare e rauka akaou i te aaere. Kua taitaia tikai aia. Ma te tauturu a tona au taeake e te au tuaine e tana tatau Pipiria, kua mataora a Sara. Kua akatanotano aia ki tona turanga e kua kimi i te au ravenga ou no te tutu aere. Kare e rauka iaia i te noo tu ua no te tata reta, no reira ka tutu aere aia na runga i te tereponi. Kua ringi aia i tana aronga atoro akaou e kua akakite mai ratou i te ingoa o tetai aronga tei inangaro i te apii. Eaa tei tupu? I tetai nga marama i muri mai, e 70 aronga tei inangaro i te apii i te Pipiria! Kare ra e rauka iaia i te apii ia ratou pouroa, no reira kua pati aia i tetai ke i roto i te putuputuanga kia tauturu iaia. E maata te aronga apii Pipiria tei tae mai ki te au uipaanga. E mea papu e kua mataora tikai te au angera i te angaanga kapiti ki te au taeake e te au tuaine mei ia Sara, tei rave maroiroi i te angaanga tutu aere!

E TU AKAKOROMAKI TO TE ANGERA

11. Akapeea te au angera meitaki te akakoromaki anga no tetai tuatau roa?

¹¹ E akaraanga manea tikai te au angera no te tu akakoromaki. Kua akakoromaki ratou i te tu tika kore e te kino no te tauatini ua atu mataiti. Kua kite ratou ia Satani e te au angera ke atu tei akarongo kore kia Iehova. (Gene. 3:1; 6:​1, 2; Iuda 6) Te akakite maira te Pipiria i tetai angera tei patoiia e tetai temoni ririnui. (Dani. 10:13) E mei te tuatau ia Adamu e Eva, kua kite te au angera e iti ua te aronga tei iki i te tavini ia Iehova. Noatu teia au mea, te tavini tiratiratu nei rai te au angera ia Iehova ma te rekareka e te maroiroi. Kua kite ratou me tae ki te tuatau tau, ka takore te Atua i te kino.

12. Eaa te ka tauturu ia tatou kia akakoromaki?

¹² Akapeea tatou me aru i te tu akakoromaki o te au angera? Mei te au angera rai, penei ka na roto tatou i te au turanga tika kore e te patoianga. Inara, kua kite tatou e ka takore te Atua i te kino i te tuatau tau. No reira mei te au angera, “auraka tatou e roiroi i te takinga-meitaki.” (Gala. 6:9) Kua taputou mai te Atua i te tauturu ia tatou kia akakoromaki. (1 Kori. 10:13) E pure tatou no te vaerua tapu o Iehova, te ka tauturu ia tatou kia akakoromaki e kia rekareka. (Gala. 5:22; Kolo. 1:11) Akapeea ra me patoiia mai tatou? E irinaki pu tikai kia Iehova, e auraka e mataku. Ka tauturu e ka akamaroiroi ua rai a Iehova ia tatou.—Ebe. 13:6.

KA TAUTURU TE AU ANGERA KIA VAI MĀ UA TE PUTUPUTUANGA

13. Eaa te angaanga puapinga tei orongaia ki te au angera i teia tuatau openga? (Mataio 13:​47-49)

¹³ I teia tuatau openga, e angaanga puapinga ta Iehova i oronga mai ki te au angera. (E tatau ia Mataio 13:​47-49.) E mirioni ua atu tangata takapini i teianei ao tei akaari i te inangaro no te nuti meitaki. Tetai pae ka rave i te au tauianga kia riro mai ei au Kerititiano mou, e tetai pae kare ratou e rave i te reira. Kua akaueia te au angera kia “akataka i te aronga kino no roto i te aronga tuatua-tika.” Tera te aiteanga, ka paruru ratou i te putuputuanga kia vai mā ua te reira. Kare ko te aiteanga e pouroa te aronga tei akamutu i te piri mai kia tatou, kare ratou piri akaou mai. E pera, kare te aiteanga e kare te au manamanata e tupu i roto i te putuputuanga. Noatu ra, e mea papu e te angaanga pakari nei te au angera i te tauturu i te au putuputuanga kia vai mā ua.

14-15. Akapeea tatou me aru i te akaraanga o te au angera kia vai mā ua te putuputuanga? (Akara katoa i te tutu.)

¹⁴ Akapeea tatou me aru i te akaraanga o te au angera kia vai mā ua te putuputuanga? Ka anoanoia tatou kia angaanga pakari i te paruru i to tatou uaorai pirianga kia Iehova. Ka rave tatou i teia na te iki anga i te au oa tei inangaro iaia e te kopae i tetai ua atu apinga te ka takino i to tatou pirianga ki te Atua. Me rave tatou i teia, ka tauturu tatou i te putuputuanga kia vai mā ua. (Sala. 101:3) Ka tauturu katoa tatou i te au taeake e te au tuaine kia vai tiratiratu kia Iehova. Ei akaraanga, eaa ta tatou ka rave me kite tatou e kua rave tetai taeake i te ara kino? No to tatou inangaro iaia, ka akamaroiroi tatou kia tuatua aia ki te aronga pakari. Me kare ra aia e rave i te reira, ka akakite tatou ki te aronga pakari. Ka inangaro tatou i tetai ua atu taeake kua paruparu tona akarongo kia tauturu vivikiia!—Iako. 5:​14, 15.

¹⁵ Te mea tangi, tetai pae tei rave i te au ara kino, ka akaateaia ratou mei te putuputuanga. Me tupu te reira, “auraka [tatou] e kapiti atu” kia ratou.d (1 Kori. 5:​9-13) Ka tauturu teia akanoonooanga i te putuputuanga kia vai mā ua. Pera katoa, me akamutu tatou i te piri atu ki te aronga tei akaateaia, te akaari ra tatou i te aroa kia ratou. Me akarongo tatou kia Iehova e kare e kapiti kia ratou, ka akakeu teia ia ratou kia oki mai kia Iehova. E oti, me oki mai ratou, ka rekareka tatou ma Iehova e tana au angera.—Luka 15:7.

16. Eaa taau ka rave kia aru i te au angera?

¹⁶ E akameitakianga tikai kua tauturu a Iehova ia tatou kia apii no runga i te au angera e te angaanga kapiti kia ratou! E aru tatou i to ratou au tu manea: to ratou tu akaaka, te inangaro i te tangata, te akakoromaki e ta ratou ka rave kia vai mā ua te putuputuanga. Me aru tatou i te au angera, ka piri tatou ki to Iehova aronga akamori e tuatau ua atu.